Read bura-pabir Fəlippi 2 Bible Online

Fəlippi 2 - bura-pabir bible

Fəlippi 2

¹Ma giri akwa wutə duna atar ndzəndziyir giri akwa Kristi ni, tə hirkurərni akwa shiktə ɗəffa giri, ma giri akwa mwardzi ka Mambələr Hyel, ma har giri akwa hir nvwa giri ka kətadzə nvwa giri,

²to ka giri kuri nghyantə ɗəffi ka kucali bu atar ndzi ka mnya duku, ka hir nvwa giri, ka paktə kəra giri akwa kəthlər ka hangkala giri duku.

³Giri aɗiya hara su ka mbulamkur wa, wala ka kər olkur wa, amma ka giri tərghəi kəra giri. Ka waskəi namta apa nvwa ni təramta ni ka daraja.

⁴Giri aɗiya hara su na ata ndzi msəra aka kər giri daci wa, amma ka giri hara su na ata ndzi msəra aka mji tsuwa.

⁵Ka giri ndzi ka jili hal na ngəni akwa daɓwa giri, jili halər Yesu Kristi ni.

⁶Wala tə tsa ku ndzi akwa dludzər Hyel, tsa aɗi namtə kalkalkurərni ka Hyel ni, su tə mda akəsi ka tsi suɗsuɗə wa.

⁷Amma tsa pumta shanga daraja tə tsa kəgari, ka namtə kərni apa mafa, tə mdə yaɓəla ni akwa dludzər mda.

⁸Akwa dludzər mdə ni antə tsa tərghəi kərari ka kələngkər har aka mta, har mtə na ata udzəm kadləkadla.

⁹Kamnyar ngəni antə Hyel haptə səliyirni ka na alari thləm na olta shang,

¹⁰kamnyar akwa thləma Yesu ni, shang mji ata zuzuri ka ɓunja ɗa akəmari mji na amtazi, ka na akwa duniya, ka na akira duniya.

¹¹Tsuwa waskəi ata pəlari ka mnyari abbər Yesu Kristi an Mthlaku, kamnyar nar səli aka Hyel na Tədda.

¹²Kamnyar ngəni, mjir yeru, I akwa kiɗə giri abbər, apatə giri ana kələngkər ali kəlara sakatə I adzə giri ni, kulini ka giri kələngkər ali swaiswai apatə I aɗi adzə giri wa ni. Ka giri ləkəma ka kəthlər na ɓɗaku ka thlivər ɗəffa Hyel, akwa kədza, kamnyar ka hala giri ncanta abbər jiri giri ku mbantədzi.

¹³Kamnyar Hyel akwa kəthlər akwa ɗəffa giri, akwa na giri mwaɓər hara su na ata kəskərari, ka dunar harari.

¹⁴Ka giri hara shanga su kula nggungguni wala beɗi,

¹⁵kamnyar ka giri ndzi kula sur nggəla adzə giri, kula biku apa maɗa' Hyel na kula manjivar. Ka giri ndzi apa parakəu akwa nca mjir zaman ngəni na mbalmbalari ka hilhilari ni.

¹⁶Ma giri ku kəsi ndər na ar hamta mpikə ni ɓəɓal akwa ɗəffa giri, I ata sə wutə sur gaya ata kəra giri ma vir tə Kristi ku si. Kamnyar ata ncanta abbər bwani tə I ɗari ni ka ghərərna ni aɗi sha gapani wa.

¹⁷I ata hara kucali, wala ma I an ata mta, kəi pumta mamshirna ata di apa saɗakar sur sa aka Hyel. Tsuwa I akwa bara ka shanga mburu hara kucali ata kəma duku.

¹⁸I, giri ata hara kucali ja! I ma I ata hara kucali ata kəma duku kəga giri.

¹⁹I akwa bara abbər ma Mthlaku Yesu an ahira, kəi thlentə Timothli kula shamta saka, ka tsa ra wuli giri, kamnyar I ma kəi jaktə wutə labar akəla giri na ata dunautə ra,

²⁰I aɗi ka mdə damwa na ku damitədzi kamnyar lapiyakur giri apa tsa wa.

²¹Shanga mambila mji ni akwa damitədzi ka su na ku tsəkwar bwar ɗa daci, da aɗi akwa damitədzi ka su na abwar Yesu Kristi wa.

²²Ai, giri asəndə laku tə Timothli akwa. Yeru ku kəthlər ata kəma duku ka tsa apa mdə ka ɓzərni, akwa ngkər labar na msəra ni.

²³I mbərsa aɗi ata fəi wa, I ata thlentə ni ka tsa ra wuli giri, ma I ku nggaɓəla su ata kəra ndzəndziyirna.

²⁴Tsuwa I ku mbərsa abbər ma Mthlaku ku hira, aɗi ata fəi wa, I ata ra wuli giri tsuwa.

²⁵I wuta abbər ata ndzi kalkal tsuwa kəi thlenta ala giri Epafroditus. Tsa an ɓzərma' mburu akwa Kristi, ka mdər kəthlər nvwa ra, ka soja nvwa ra akwa kəthlər ngkər labar ni. Tsa an mdə tə giri thlenta abbər ka tsa sə dlar ra akwa suayeri tə I ata turari ni.

²⁶Tsa akwa bara ka tsa wutə giri shanga giri, har ma tsa ku damitədzi ka duna kamnyar tə giri nggata abbər tsa aɗi lapiya wa ni.

²⁷Jiri, tsa ku hara nggawa na mwavərari, har ma tsa abaka mta! Amma Hyel ku kətadzə ni, ka kətadzə ra na olari ma. Kamnyar ma an apani wa sakani ɗəffi ata ɓzə ka bwa suɗa.

²⁸An su na hara tə I akwa bara thlentə ni ala giri ni, ka giri wutə ni. I mbərsa giri ata nggatə msərakur jaktə wutə ni. Wala I ma, ata kəmta ali damitədzərna ata kəra giri.

²⁹Antə ka giri dlu ni ka kucali, ka na alari daraja, apatə mji ana hara hwatu aka mjir kəthlər ar Mthlaku.

³⁰Kamnyar tsa ku psəmta mpikari kamnyar kəthlər ar Kristi, har tsa abaka mta ata mnya kəthlər ni. Tsa akwa hara ali shanga su ata vəya giri, təng tə giri ciju amzhi dlar wa.