Read bura-pabir Fəlippi 3 Bible Online

Fəlippi 3 - bura-pabir bible

Fəlippi 3

¹I akwa bara hartə gari ni, maɗaməma, ka ndər ngəni, abbər ka giri hara kucali akwa Mthlaku. Aɗi ata ndzi mwavər ali kəi jaktə rəbuta ala giri su tə I rəbutə ntangkəma nə wa, kamnyar I wuta abbər ata dlar giri akwa hamta jiri.

²Ka giri hara hangkal ka kilayeri,[1] mji na akwa hara su na ɗimi ɗimi ni, mjir thlagamta dza mda abbər da akwa thla kaciya ni.

³Ai mburu an mjir kaciya na jirari ni, mburu na akwa vəngkər səli aka Hyel atar Mambəl na Ɓɗakkarkar ni. Kamnyar mburu ana vəkər ka su tə Kristi Yesu ku hara ala mburu, amma aɗi ka su tə mda ata mzhi harari atar dza wa,

⁴wala tə I ma I amzhi mbərsa ka kəthlər na ar dza ni. Kamnyar ma mda aɗi na ata mzhi mbərsa ka suayeri na təbwar dza, I kəgari hangta da.

⁵Mdə thla ali kaciya akwa vir na nciskur, I ma I mdər Israila, akwa nyarmbwar Benjamin, tsuwa I mdər Ibrani bwakəma ka bwahili. Ma atəbwar ɓəla tsawu tsuwa I mdər Farisi.

⁶Ma atar vu duna akwa nu addinər mburu tsuwa I ku ndzi mdər hara bwani aka mjir ikələziya, atar ɓəla tsawur Musa tsuwa I aɗi ka su tə mda anggəl ra akwa wa.

⁷Amma shanga suayeri ngəni ɓɗakɓɗaku tə I jikata abbər I kəgari sakanda ni, I namtə ɗa kulini apa sur shashakur ali, kamnyar kəi wutə su na ku təramta nayeri nda ka səli, watau səndər su na abwar Kristi Yesu, kamnyar Kristi.

⁸Jiri, shanga su kula ampani, ma mdə pəla mda ata gira ɗa ka daraja na akurkur wa akwa səndər Kristi Yesu na Mthlakərna. I ku pumta shanga su kamnyar ni. Kamnyar I ku namtə shanga su apa da mzhiku, kamnyar kəi səndə ni,

⁹kəi paktədzi ka tsa. Tsuwa ngəni aɗi kamnyar ɓɗakkurərna atar ɓəla tsawu wa, amma ɓɗakkur tə I wuta atar hamta jiri akwa Kristi, ɓɗakkur na thlata akəla Hyel atar hamta jiri.

¹⁰Su tə I akwa barari ni an kəi səndə Kristi, ka dunar thlatərni akwa mtəmta. Tsuwa kəi ɗar jili bwani tə tsa ɗari ni, kəi mtə tsu apa mtərni,

¹¹abbər ma ahara, wala I ma kəi mzhi thlata akwa mtəmtə ni.

¹²I aɗi akwa pəla abbər I ku kurtə wutə suayeri ngəni wa, wala abbər I ku kurtə ndzi ɓɗakkarkar wa. Amma I akwa ntsari kamnyar kəi wuta, kamnyar Kristi ku kurtə ka namtə ra abbər I arni.

¹³Antə maɗama'na, I aɗi wutə katagu wa, amma su pal tə I akwa harari, an I akwa fwari su na ku təramta, kəi ntsa, har kəi mzhitə su na akəmi ni.

¹⁴I akwa kəɗar ntsari abbər kəi mzhitə vəi tə nci ata ni, kamnyar kəi wutə watsəɓə na amtazi tə Hyel akwa kəga mburu kari, akwa Kristi Yesu ni.

¹⁵Antə ka shanga mburu na ku ɗar kəla təbwar mambəl ni ndzi ka dzam na ngəni. Amma ma mji laga akwa nca giri ka jili dzam damwa zum, I mbərsa Hyel ata ngkərɓəla ala giri su ndaga tsuwa.

¹⁶Su na olari, akwa kəlara vəi tə mburu ata, ka mburu ləkəma ka ntsari akəma.

¹⁷Maɗaməma, I akwa bara ka giri thlipə ra, tsuwa ka giri thliptə su akəla mji na akwa nu surharar yeru.

¹⁸Mji laga aɗi tə I ku kəɗar tsaktə giri ata kəra ɗa. Tsuwa I akwa jaktə pəla ala giri, kulini ma har ka shimwi ata nci, abbər harar ɗa ku ncantə da akwa dawakur ka Kristi na mta ata udzəm kadləkadla.

¹⁹Akwa tsikərari da ata sə ɗar bwani akwa u'u na akur wa. Kamnyar kuta ɗa an hyelər ɗa. Da ana gaya ata kəra suayeri na ata hara səli aka mda, hangkala ɗa ata sur duniya daci.

²⁰Ar mburu, mburu mjir vəi na amtazi, antə mburu akwa səka mdər mbanta ar mburu, Mthlaku Yesu Kristi.

²¹Tsa ata pali dza mburu na kula daraja ni, ka tsa na mburu jili dzari na ka səli ni, atar dunarni na ata mzhi vu ka shanga su ndzi akira kuthlikurərni.