Read bura-pabir Fəlippi 4 Bible Online

Fəlippi 4 - bura-pabir bible

Fəlippi 4

¹Antə apani maɗama'na, giri natə I hirhir giri, har I akwa mwaɓər wutə giri, giri na ana hara kəi ndzi ka kucali, giri na ku ndzi afər gayarna ni, ka giri thləthlatə gyang akwa Mthlaku, giri natə I hirhir ni.

²I akwa kiɗə kəra giri, Yuwodiya ka Sintiki ka giri namtə daɓwa giri akwa Mthlaku.

³Gə na pazhirna akwa kəthlər, na ka jirkur, I akwa kiɗə nga ka gə dlar mwanki nayeri ni, kamnyar da ku kəɗar kəthlər ata kəma duku ka iya akwa ngkər labar na msəra ni, ata kəma duku kəga Klement, ka shanga mjir kəthlər nvwa ra, natə mdə ku rəbutə thləma ɗa akwa kakaɗər mpikə ni.

⁴Ka giri hara kucali akwa Mthlaku tədəku. I akwa jaktə pəla ka giri hara kucali.

⁵Ka giri ndzi ka kanaɗikur aka shanga mji. Mthlaku abaka si.

⁶Giri aɗiya damitədzi ata kəra suma wa, amma akwa shanga su ka giri pəla damitədzər giri aka Hyel akwa adduwa, ka adduwar kiɗə su, ka na ar usar Hyel ni.

⁷Atar apani, Hyel ata na ala giri jili msərakur na ku təramta shanga nggaɓəlar mda, ka tsa ɓəlatə ɗəffa giri ka dzamər giri lapiya akwa Kristi Yesu.

⁸I akwa bara hartə gari ni, maɗama'na, ka ndər ngəni, abbər ka giri dingngga dzama ata kəra shanga su na ka jirkur, ka su na ata na daraja aka mda, ka su na kalkal, ka su na kəcəkəcari, ka su na ɓɗaku, ka su tə mda abara, watau shanga su na ɓɗakta shang, wala su tə mda ata huwari.

⁹Ka giri hara kəthlər ka su tə giri thlipta, ka su tə giri dluwa, ka su tə giri nggata, ka su tə giri wuta akəli. Antə Hyel ar msərakur ata ndzi adzə giri.

¹⁰I ka kucali hang ka duna akwa Mthlaku, kamnyar kulini giri ku jaktə ncanta abbər giri akwa damitədzi ka iya. Wala sakanda ni ma giri ku damitədzi ka iya, amma giri aɗi wutə lakur harari wa.

¹¹Aɗi abbər I akwa pəla ngəni ni kamnyar I akwa tur su laga wa. Kamnyar I ku thliptə ndzi ka kucali akwa kəlara laku tə I wutə kərna akwa.

¹²I asəndə laku tə I ata ndzi akwa, wala akwa tur su, wala ka su hang. I ku thliptə ashir ar ndzi akwa kəlara laku tə I wutə kərna akwa, wala ka mi, wala ka ndləndləkur, wala akwa tura wala akwa wuta.

¹³I ata mzhi hara shanga su atar Kristi na ana dunautə ra ni.

¹⁴Amma wala apani, giri ku hara kalkal, tə giri dlar ra akwa bwaniyirna ni.

¹⁵Giri na mjir Fəlippi ni ku sənda abbər akwa sakatə I baɗitə ngkər labar na msəra, sakatə I zhar Makidoniya ni, ikələziya damwa aɗi wala duku na ku paktə kər ka iya atar hamta su wala dlu sur hamta wa, təng giri shi giri.

¹⁶Kamnyar wala sakatə I ahar Thlassalonika, giri ku kəɗar thlenta ali dlara ata kər ata kər.

¹⁷Aɗi abbər I akwa bara cauta akəla giri wa, amma I akwa bara ka giri wutə watsəɓa na akwa hamta su.

¹⁸I ku dlu ntərna cipu, har ma ntə ni hang kamta. Kulini I ka su hang, kamnyar I ku dlu cauta tə giri thlenta ali atar Epafroditus ni. Cautə ngəni ndzi apa saɗakar sur shiwura na msəra, apa sur hamta na ɓɗaku natə Hyel ata dluwari ka nggatə msərakurari.

¹⁹Tsuwa Hyelərna ata hamta ala giri shanga su tə giri ata turari, atar hangkur barkayeri tə tsa kəgari akwa Kristi Yesu.

²⁰Ka səli ndzi aka Hyel na Təddar mburu har ba saka madi. Amin.

²¹Ka giri thlawar ali shanga mjir Hyel na ɓɗakkarkara, shanga mji na akwa Kristi Yesu. Maɗaməma na adzə ra azi akwa thlawar giri.

²²Shanga mambila mjir Hyel na azi akwa thlawar giri, apa mji na akwa kəyir Kaisar.

²³Ka barkar Mthlaku Yesu Kristi ndzi adzə shanga giri.