Read bura-pabir Kolossi 1 Bible Online

Kolossi 1 - bura-pabir bible

Kolossi 1

¹I na Bulus na aposəl ar Kristi Yesu atar hirər Hyel, ata kəma duku ka ɓzərma' mburu Timothli an akwa thlentə wasika ngəni

²ala giri na mjir Hyel ka maɗaməma na ka jirkur akwa Kristi na ahar Kolossi. Ka Hyel na Təddar mburu hara ala giri ɓɗakkur, ka tsa na ala giri msərakur.

³Parang yeru ana usar Hyel na Təddar Mthlakər mburu Yesu Kristi, akwa kəlara sakatə yeru akwa hara adduwa kamnyar giri.

⁴Kamnyar yeru ku nggata ata kəra hamta jirər giri akwa Kristi Yesu, ka jili hirkur tə giri kəgari aka shanga mjir Hyel ni.

⁵Giri akwa hara ngəni ni kamnyar giri akwa vəkər ka su tə mdə vəi ala giri amtazi ni. Tsuwa ngəni an labar na msəra natə mdə ngkər ala giri təng akwa baɗitari ni, watau ndərər jirkur tə giri nggatə ni.

⁶Tsuwa labar ngəni na msəra ni ku titiləmtadzi ka dlarhə shanga duniya. Labar ni akwa kəla ka ya munya atar pali surharar mji ka ndzi ɓɗaku, tsu apatə tsa hara akwa nca giri, təng vir tə giri nggatə jirkur ata labar ar ɓɗakkur tə Hyel hara, ka hamta jiri ni.

⁷Epafras na pazhir mburu, an baɗitə mwanta ala giri labar ar ɓɗakkur tə Hyel hara ni, tsa an mdər kəthlər nvwa mburu natə mburu hirhira. Tsuwa tsa mdə na ka jirkur akwa kəthlər ar Kristi, antə tsa akwa dlar yeru azi ata vəya giri.[1]

⁸Tsuwa tsa an ngkər ala yeru laku tə giri akwa hir mji akwa atar Mambəl na Ɓɗakkarkar ni.

⁹An su na hara tə parang yeru akwa hara adduwa ata kəra giri, təng sakatə yeru nggatə labar ata kəra giri ni. Parang yeru akwa kiɗə Hyel abbər ka tsa ncaɓəla ala giri ata bəbal suayeri tə tsa akwa bara ka giri hara, ka tsuwa ka tsa na giri shanga ɗəɗukur ka nggaɓəlar su na abwar Mambəl na Ɓɗakkarkara.

¹⁰Atar apani antə giri ata namtə ndzəndziyir giri apatə Hyel akwa barari, ka hara suayeri na ata kəskərari, atar ncantə halayeri na ɓɗakɓɗaku akwa kəlara kəthlər ar giri. Apani giri ata ləkəma ka kəla akwa səndər giri abwar Hyel.

¹¹Tsuwa yeru akwa hara adduwa abbər ka Hyel dunautə giri ka dunarni na ka səli, kamnyar ka giri mzhi nggitə shanga su ka mbwiɗəffu ka kucali.

¹²Tsuwa ka giri dingngga usar Tədda, kamnyar tsa an hara tə mburu mzhi ndzi akwa nca mji na ata fa kifə tə tsa ɗəmha aka mjirni ni na ana ndzi akwa parakəu.

¹³Tsuwa tsa an msərantə mburu akwa kuthlikur ar kuthlu, ka səntə mburu akwa kuthlikurər Ɓzərni tə tsa hirhir ni,

¹⁴ɓzərni na pəli mburu sakatə tsa tifəmta ala mburu shanga bikər mburu ni.

¹⁵Kristi an dludzər Hyel natə mda aɗi mzhi wutə ni wa ni. Tsa an Ɓzər na yarakəma akwa nca shanga suayeri tə Hyel alakta.

¹⁶Kamnyar atar ni antə Hyel alaktə shanga su, na amtazi ka na akwa duniya, suayeri tə mda ata mzhi wutari ka suayeri tə mda amzhi wutari wa, kuthlyayeri ka kuthlikurayeri, Atar ni antə Hyel alaktə shanga su akwa duniya, mjir kuthlikur ka dunar kuthlikurayeri, atar ni ka tsuwa kamnyar ni.

¹⁷Kristi aɗi təng akəmata shanga suayeri, tsuwa atar ni shanga su ndzi ata kəma duku.

¹⁸Tsuwa Kristi an ikələziya, na ndzi apa dzari surni. Tsa an baɗitər su, tsa an yarakəmar mji na thlata akwa mtəmta, apani tsa an ntangkəma akwa shanga su.

¹⁹Kamnyar akwa shanga olkur tə Hyel kəgari, tsa ku hir ka tsa ndzi akwa Kristi.

²⁰Tsuwa atar Ɓzər ni antə Hyel shwalatə shanga su aka kərari surni. Tsa namtə daɓwari ka shanga su na amtazi ka na akwa duniya atar mamshir Kristi na pumtadzi ata udzəm kadləkadla.

²¹Waci giri ndzi ciju ka Hyel, har giri ku ndzi dawar ni akwa ɗəffa giri, kamnyar suayeri na ɗimi ɗimi tə giri akwa harari ni.

²²Amma kulini tsa ku namtə daɓwa giri ka tsa ka kərari surni, atar mtər Ɓzərni na si akwa dludzər mda. Antə kulini tsa ku namtə giri ɓɗakkarkara, kula biku, kula sur nggəla, ka səntə giri akəmari surni.

²³Amma tar ka giri ləkəma tsu akwa hamta jiri ngəni, ka thləthlata akwa gyang. Giri aɗiya hir ka su laga kənggərantə giri, har ka giri zhar su tə giri vu akwa ɗəffa giri sakatə giri nggatə labar na msəra nə wa, labar tə mdə ngkər aka shanga su na ka mpika akwa duniya, natə I na Bulus ndzi mdər kəthlərari ni.

²⁴Kulini I akwa kucali kamnyar bwaniyayeri tə I akwa ɗarari kamnyar giri ni. Kamnyar atar bwani ngəni antə I ata nghyaɓəla su na mbila akwa bwani tə Yesu ɗari kamnyar dzari na ikələziya ni.

²⁵Hyel an carɓəla ra kəi ndzi mdər kəthlər aka ikələziya, atar ngkər ndərər Hyel cipu ala giri.

²⁶Labar ngəni tə I akwa gari ala giri ata kər ni, an ashir laga na ɗuwarɗuwarari təng akwa zamanayeri hang na təramta. Amma kulini tsa ku kəlar aka mjirni.

²⁷Atar mji ngəni antə Hyel carɓəla abbər tsa ata ncaɓəla jili hangkur gəna na akwa ashir na ngəni ka səli ni, ala giri na dur gapani. Tsuwa ashir ngəni an laku tə Kristi ndzi akwa ɗəffa giri ni, ngəni akwa seɗata ala giri abbər giri ata sə ndzi ata kəra səliyir Hyel ata kəma duku kəga tsa.

²⁸An su na hara tə yeru akwa ngkər aka shanga mji ata kəra Kristi Yesu ni, akwa tsaktə mji, ka thlipə suayeri ngəni ka shanga ɗəɗukur tə yeru kəgari kamnyar ka yeru hamta shanga mji ciɗəɗu akwa Kristi ni.

²⁹An su na hara tə I akwa kəthlər ka duna, akwa ntsə kəthlər ni ka shanga duna tə Kristi na ali ni.