Read bura-pabir Kolossi 2 Bible Online

Kolossi 2 - bura-pabir bible

Kolossi 2

¹I akwa bara ka giri səndə laku tə I ghər kamnyar giri, ka mji na ahar Lawudikiya, ka tsuwa shanga mji na aɗi ɗar wutə ra ma wa.

²I hara ngəni kamnyar I akwa bara kəi dunautə ɗa, ka da ndzi pakhəpakhari atar hirkur na ka duna, tsuwa ka da wutə barka ngəni ol ni, watau ka da ndzi ka hamta jiri na nghyinghyari abbər da ku nggaɓəla zurangkur ashira su tə Hyel ɗəmhə ni, watau tsa na Kristi ka kərni.

³Akwa tsa antə mdə ɗuwamta shanga ashir ar ɗəɗukur ka səndər su.

⁴I akwa pəla ala giri su ngəni ni ta mdə laga asə pwaktə giri atar msərakur mnyari.

⁵Kamnyar wala tə I aɗi adzə giri nca ka nca wa, hangkali adzə giri. Tsuwa I ka kucali kamnyar I nggata abbər giri ku namtə ndzəndziyir giri ɓɗak laga, ka tsuwa hamta jirər giri akwa Kristi akwa ndzi ka duna.

⁶Antə kulini tə giri ku dlu Kristi Yesu tə tsa ndzi Mthlakər giri ni, tar ka giri ləkəma akwa nu ni.

⁷Ka giri hara səl, ka giri thləli ndzəndziyir giri akwa tsa, ka giri ləkəma akwa mbərsa ka tsa kula kənggərardzi, apatə giri ku thlipta. Tsuwa ka giri ndzi mjir gwaɗita tədəku.

⁸Ka giri hara hangkal ta mdə laga ashamta giri ka ɗəɗukurər duniya ka thlandərayeri na gapangapani. Kamnyar ngəni an ɗəɗukur na kula ampani, na thlata akəla mji ndzang ka shatanayeri ar duniya ni, aɗi thlata akəla Kristi wa.

⁹Kamnyar shanga dunar hyelkur ar Hyel ni ku ndzi akwa dza Kristi.

¹⁰Apani giri ku ndzi nghyinghyari atar paktədzər giri ka Kristi, na ola ata kəra shanga kuthlyayeri ka dunar kuthlikur na aɗi.

¹¹Tsuwa tsu akwa Kristi ni antə mdə hara ala giri kaciya natə mda aɗi hara ka tsiya mdə wa. Kristi an hara ala giri kaciya ngəni na abwar mambəl ni, atar thlamta dza giri na ar biku.

¹²Kamnyar sakatə mdə hara ala giri baptizma, mdə harəmta giri ata kəma duku ka Kristi. Tsuwa atar baptizma ni antə mdə thlentə giri akwa mpika ata kəma duku ka Kristi, atar hamta jirər giri akwa kuthlikurər Hyel, na thlentə Kristi akwa mtəmtə ni.

¹³Waci giri mtəmtari kamnyar bikər giri ka tsuwa kamnyar mda aɗi thla ala giri kaciya wa. Amma kulini Hyel ku na giri mpika atar Kristi, kamnyar tsa ku tifəmta ala mburu shanga bikər mburu.

¹⁴Tsa ntangkər su ata kəra shanga suayeri tə mdə burkatə mburu ata kər ni, ka fatə ɗa, ka ra kukwamta ɗa ka kusa ata udzəm kadləkadla.

¹⁵Akwa laku ngəni antə Kristi dlutsə kari mpa na ar kuthlyayeri ka dunar kuthlikurayeri na ar shatan, ka pu ɗa akwa səli ata bəbal, atar laku tə tsa səm ɗa ata udzəm kadləkadlə ni.

¹⁶Antə giri aɗiya hir ka mdə laga vəngkər ala giri biku kamnyar su tə giri səma wala su tə giri sa wa, wala kamnyar tə giri aɗi mzhi ɓəlatə vir kucali laga, wala thliya bilən, wala Vir Ghərəmtaghər laga wa.

¹⁷Kamnyar shanga suayeri ngəni an shanggura suayeri na jirari na ata si akəmazi, su na jirari ni an Kristi.

¹⁸Antə giri aɗiya hir ka mdə laga na hir kərni rutəmta giri abbər tsa su laga kamnyar tə tsa ana mzhi wulsu wa. Jili mda apani ana hir ncanta apa tsa mdə na ka tərghəikər, amma aɗi jiri wa. Tsa ata pəla abbər tsa ana vəngkər səli aka mjirthlentərhyel, amma azha təng tsa an akwa bara kəlantə kərari daci kula suari aɗi.

¹⁹Ai jili mda apani, tsa ku kurtə ndəkəmta kərni ka Kristi, tsa na kəra ikələziya, na dzari ni. Kamnyar tsa an pakhə shanga dza ni ata kəma duku, akwa məngdlayeri ka pərɗayeri. Antə tsa akwa kəla apatə Hyel akwa nar dunar harari.

²⁰Təng tə giri ku mti ata kəma duku ka Kristi, ka msər akira shatanayeri na akwa duniya ni, kamnyar mi tə giri tsu akwa hara suayeri apa giri mjir duniya nə ri? Kamnyar mi tə giri akwa nu tsawayeri na pəla,

²¹“Ga aɗiya tsəkwar susəm ngəni wa! Ga aɗiya hamnya susəm ndagə wa! Ga aɗiya tsəkwar susəmayeri damwa wa,” nə ri?

²²Shanga tsawayeri ngəni akwa gari ata kəra suayeri na asəkwi ɓzə wa, ma mdə ku kəthlər kəgari, kamnyar da an tsawayeri ka thlipayeri tə mda an ɗəmha.

²³Jiri, ma mda ata wulari, mda kəta abbər da tsawayeri na ɓɗakɓɗaku tə kalkal ka mdə nuwa. Kamnyar apa da ata dunautə mda akwa nu Hyel swaiswai, ka ndzi ka tərghəikər, ka mzhi ɗiɓəla kərni. Amma da aɗi ka dunar nggyari nggukər dza mburu wa.