Read bura-pabir Kolossi 3 Bible Online

Kolossi 3 - bura-pabir bible

Kolossi 3

¹Təng tə mdə ku thlentə giri ata kəma duku ka Kristi, tar ka giri ləkəma ka putə nca giri ata suayeri na amtazi, akwa vəi tə Kristi ata, andzəndzi akwa vəi olkur abwa mazəma Hyel.

²Ka giri vu hangkala giri akwa bara suayeri na amtazi, aɗi akwa suayeri na akwa duniya nə wa.

³Kamnyar giri ku kurtə mti, antə kulini mpika giri na jirari ni ɗuwarɗuwarari ata vəi duku ka Kristi, adzə Hyel.

⁴Antə ma vir tə Kristi, na mpika mburu ni ata si, giri ata si ata kəma duku ka tsa akwa səliyirni.

⁵Kamnyar ngəni, tar ka giri pumta halər nggukayeri na ɗimi ɗimi na akwa mwa akwa ɗəffa giri abwar sur duniya ni. Ka giri pumta halər karwakur, ka adiyakur, ka ngguka, ka bara suayeri na ɗimi ɗimi, ka mbulamkur, kamnyar mdər hara mbulamkur ndzi apa tsa mdər nu haptu.

⁶Kamnyar atar suayeri ngəni antə ɗəffa Hyel ana ɓzə ka duna ata kəra shanga mji na aɗi ana kələngkər alari wa.

⁷Waci giri ana hara su ngəni, sakatə giri akwa ndzi akwa jili hal ngəni ɗimi ni.

⁸Amma kulini tar ka giri zhar shanga suayeri ngəni, ka giri pumta hərkəma, ka ɗəffə bwarbwarkur, ka kəmanggarkur, ka mnya ɗimi.

⁹Giri aɗiya thlandər aka nvwa giri wa, kamnyar giri ku kurtə pumta halər giri na waci kəga surhararni.

¹⁰Ka giri kətə hal na bilənari ni. Tsuwa Hyel na nam hal ngəni ni ata dingngga namtə ni bilən har ka tsa ndzi apa arni ni, kamnyar ka giri səndə ni swaiswai.

¹¹Tsuwa akwa jili hal ngəni bilən ni, zumzumkur aɗi kəra akwa daɓwa mjir Yahudi ka mjir dur gapani wa, wala akwa daɓwa mji na ku thla kaciya ka mji na kula thla kaciya wa. Zumzumkur aɗi akwa daɓwa mjir mtaku, wala mjir kauya, wala mafa, wala ɓzər kuta wa. Kamnyar kulini Kristi an akəma mburu, tsuwa tsa an akwa shanga ɗəffa mburu.

¹²Antə təng tə Hyel ku carɓəla giri ka giri ndzi mjirni na ɓɗakkarkara tə tsa hirhir ni, tar ka giri ndzi mji na ka kətadza, ka hangkalkur, ka tərghəikər, ka kanaɗikur, ka mbwiɗəffu.

¹³Ka giri dingngga mbwi ɗəffa giri aka nvwa giri. Ma mdə laga ku ɓzamtə ɗəffa ga, ka gə yafitə ni. Tsu apatə Mthlaku ku yafitə giri, antə giri ma tar ka giri yafitə nvwa giri.

¹⁴Tsuwa na olta shanga suayeri ngəni an ka giri hir nvwa giri, kamnyar hirkur andər pakhə mburu ka mburu ndzi ka mnya duku akwa shanga su.

¹⁵Tsuwa ka jili msərakur na ar Kristi ni pwar giri akwa shanga su tə giri ata harari. Hwatu kamnyar msərakur ngəni antə Hyel kəga giri abbər ka giri ndzi ata kəma duku apa dza duku ni. Tsuwa ka giri ndzi mjir usar Hyel tədəku.

¹⁶Ka giri hara ka ndərər Kristi wutə vəi ndzəndzi akwa ɗəffa giri ka duna, ka giri thlipa aka nvwa giri, ka tsaktə nvwa giri ka shanga ɗəɗukur tə tsa hamta ala giri. Ka giri hara hayari ar Zabura, ka hayeri na ar hu Hyel, ka hayeri na abwar mambəla, ka gwaɗita aka Hyel akwa ɗəffa giri.

¹⁷Tsuwa kəlara su tə giri ata harari, wala akwa gari wala akwa kəthlər, ka giri hara akwa thləma Mthlaku Yesu, akwa usar Hyel na Tədda atar ni.

¹⁸Giri na mwanki, ka giri kələngkər aka shilər giri, apatə ata kəskəra Mthlaku.

¹⁹Giri na mji shili, ka giri hir mwankir giri.Giri aɗiya hara mwavərkur ala ɗa wa.

²⁰Giri na maɗankyar, ka giri kələngkər aka mji na ya giri tədəku, kamnyar apani ata ndzi msəra aka Hyel.

²¹Giri na mjir ya, giri aɗiya dingngga mpa aka maɗa' giri wa, kamnyar apani ni ata tsi duna ɗa.

²²Giri na mafayeri, ka giri kələngkər aka mthlakər giri akwa shanga su. Ka giri hara su na ata kəskəra ɗa tədəku, aɗi tar sakatə da akwa wul giri daci wa. Ka giri kəthlər ala ɗa ka jirkur apatə giri mjir thlivər ɗəffa Mthlaku ni.

²³Kəlara jili kəthlər tə giri akwa harari, ka giri hara ka ɗəffa giri shang, apa giri akwa kəthlər ni aka Mthlaku, amma aɗi apa aka mji wa.

²⁴Ka giri ɗangta abbər Mthlaku ata sə na ala giri kifa apa watsəɓər giri, tsuwa Mthlaku tə giri akwa hara mafakur alari ni an Kristi.

²⁵Kamnyar mdər hara ɗimikur ata sə dlu watsəɓər ɗimikur tə tsa hara ni, tsuwa Hyel aɗi ana nca zumzumkur wa.