Read bura-pabir Kolossi 4 Bible Online

Kolossi 4 - bura-pabir bible

Kolossi 4

¹Giri na mthlakər mafayeri, ka giri wulwul mafayeri ar giri ɓɗaku, ka hara ala ɗa su na kalkal. Kamnyar giri ka kəra giri ku sənda abbər giri ka Mthlaku laga amtazi.

²Ka giri ləkəma akwa hara adduwa, giri aɗiya tsamta wa. Kəlara sakatə giri akwa hara adduwa ni ka giri ndzi ɗəmhəɗəmhari, ka ndzi ka gwaɗita.

³Tsuwa ka giri hara adduwa kamnyar yeru, kamnyar ka Hyel kəlar ala yeru nyarmbwar ngkərɓəla ndərərni ata kəra Kristi. Kamnyar an su na hara tə I akwa pərsəna kulini ni.

⁴Ka giri hara adduwa kamnyar kəi mzhi ngkərɓəla ndərərni ni ata bəbal apatə ata ndzi kalkal.

⁵Akwa ndzəndziyir giri ata kəma duku kəga mji na kula hamta jiri, ka giri hara shanga su ka ɗəɗukur, ka giri hara kəthlər ka kəlara sakatə giri wuta.

⁶Ka gariyir giri ndzi msəra tə mji ata hir nggari tədəku, kamnyar ka giri mzhi hamta amsa na kalkalari aka kəlara mda.

⁷Tikikus ata ngkərɓəla ala giri shanga su ata kəra laku tə I akwa azi. Tsa an ɓzərma' mburu natə yeru hirhir ni, tsuwa tsa mdər kəthlər na ka jirkur, shanga yeru kəga tsa an akwa hara kəthlər Mthlaku ni.

⁸An su na hara tə I akwa thlentə ni ala giri ni, ka tsa ngkərɓəla ala giri laku tə yeru akwa, ka tsuwa ka tsa dunautə giri.

⁹Da ata paktə mwari ka Onisimus, na thlata abwar giri. Tsa ma tsa ɓzərma mburu, tsuwa tsa ka jirkur, antə yeru hirhir ni. Da ata ngkərɓəla ala giri shanga su na akwa hara azi.

¹⁰Aristarkus, na akwa pərsəna adzə ra ata thlawar giri, ka Markus tsuwa na msəkər Barnabas. Tsa an Markus natə I gari ala giri ata kərari abbər ma tsa ku mwari, ka giri dlu ni ka tsiya giri suɗsuɗə ni.

¹¹Joshuwa natə mda ana kəga ni Yustus ni, akwa thlawar giri tsuwa. An kura mjir Yahudi makər na hamta jiri akwa nca mjir kəthlər kamnyar kuthlikurər Hyel ata kəma duku ka iya ni. Tsuwa da ku dlar ra hang ka duna.

¹²Epafras, na pal akwa nca giri ni, tsuwa na mafar Kristi Yesu ni, akwa thlawar giri. Parang tsa akwa ɗangtə giri akwa adduwarni abbər ka Hyel hara ka giri kəla ka ndzi ka duna, ka ndzi ka hamta jiri na nghyinghyari abbər giri akwa hara shanga su tə Hyel akwa barari.

¹³I ata mzhi hamta ala giri seɗa ata kəra Epafras abbər tsa ku vu dunari akwa hara adduwa kamnyar giri, ka tsuwa kamnyar mjir Lawudikiya, ka mjir Hirapolis.

¹⁴Luka na likta, natə mburu hirhir ni, ka tsuwa Demas, akwa thlawar giri.

¹⁵Ka giri thlawar maɗama' mburu na ahar Lawudikiya, ka Nimfa, ka ikələziya na ana tsaptədzi aharngkiɗa ni.

¹⁶Aghəla tə giri ku kuri karatə wasika ngəni ni, ka giri mwanta aka mjir ikələziya na ahar Lawudikiya tsuwa ka da karata. Tsuwa ka giri wuta abbər giri ku karatə wasika natə I thlenta aka mjir Lawudikiya ni.

¹⁷Tsuwa ka giri pəla aka Arkippus abbər ka tsa wuta abbər tsa ku kuri kəthlər tə Mthlaku hamta alari ni.

¹⁸I na Bulus ka kəri an akwa rəbuta ala giri thlawardzi ngəni. Ka giri ɗangta abbər I tsu akwa pərsəna ni. Ka barkar Hyel ndzi adzə giri.