Read bura-pabir 1Thlassalonika 2 Bible Online

1Thlassalonika 2 - bura-pabir bible

1Thlassalonika 2

¹Maɗaməma giri ka kəra giri ku sənda abbər səyir yeru adzə giri aɗi ndzi gapani wa.

²Wala tə yeru ku ɗar bwani ka sa nggənggəla ahar Fəlippi, akəmata yeru amwari adzə giri ahar Thlassalonika, tsu Hyelər mburu ku na ala yeru duna tə yeru ngkər ala giri labar na msəra ni wala tə mji ku ncantə dawakur ka duna aka ndər ni.

³Apani giri ata mzhi wuta abbər thlandər aɗi akwa gariyir yeru nə wa, tsuwa su aɗi na ɗimi akwa ɗəffa yeru wa, tsuwa yeru aɗi akwa hara shimnyakur wa.

⁴Amma apatə Hyel ku hir ka yeru ngkər labar na msəra ni, antə yeru akwa ngkərari, aɗi kamnyar ka yeru hara su na ata ndzi msəra aka mji wa, amma ka yeru hara su na ata ndzi msəra aka Hyel na ana wul ɗəffa yeru.

⁵Kamnyar apatə giri asənda, yeru aɗi ana gari ar swaktə mdə wa, wala ɗuwar jirkur kamnyar bara kwaba akəla mdə wa, Hyel an seɗar yeru.

⁶Tsuwa aɗi abbər yeru akwa bara ka mji hu yeru wa, yeru aɗi ɗar barari akəla giri wala akəla mji damwa wa.

⁷Apatə yeru ku ndzi aposəl ni, yeru ata mzhi pəla ka giri na ala yeru su laga, amma ata vəya ndaga, yeru tərghəi kəra yeru akwa nca giri apa maɗankyar, akwa nu shanga su ka hangkal. Wala tsuwa yeru ndzi apa mwala na akwa wulwul ɓzərni na ata uwa.

⁸Yeru hir giri ka duna, an su na hara tə yeru ndzi ɗəmhəɗəmhari kamnyar hamta ala giri, aɗi labar na msəra na thlata akəla Hyel ni daci wa, amma har yeru ata mzhi hamta mpika yeru kamnyar giri, kamnyar yeru ku nggatə msərakurər giri.

⁹Kamnyar, ai maɗaməma, giri ku səndə jili ghər ka bwani tə yeru ɗari! Yeru ku kəthlər pci ka viri kamnyar yeru aɗi bara ka yeru vəngkər ghər aka kəlara mda akwa nca giri, sakatə yeru akwa ngkər ala giri labarər Hyel na msəra nə wa.

¹⁰Giri ka kər giri an seɗar yeru, Hyel ma tsa seɗar yeru, abbər yeru ku ncantə hal na ɓɗakkarkara, ka jirkur, kula sur nggəla, akwa nca giri na ku hamta jiri ni.

¹¹Kamnyar apatə giri asənda, yeru ku wulwul kəlara mda akwa nca giri apatə mdər ya ana wulwul maɗa'ni.

¹²Yeru akwa kəɗar tsaktə giri ka dunautə giri abbər ka giri ndzi ka hal na ata ndzi ɓɗaku akəma Hyel na kəga giri akwa kuthlikurərni na ka səli ni.

¹³Kamnyar ngəni antə yeru akwa usar Hyel tədəku. Kamnyar sakatə giri dlu ndərər Hyel tə giri nggata akəla yeru ni, giri aɗi dlu ni apa ndər na thlata akəla mji ndzang wa, amma giri dlu ni apa ndərər Hyel kasha, kalkal apatə tsa aɗi, antə ndər ni ku ləkəma ka kəthlər akwa ɗəffa giri na ku hamta jiri ni.

¹⁴Antə apani, maɗaməma, giri ku thliptə surharar mjir ikələziyayeri ar Hyel na ahar Yahudiya, kamnyar giri ku ɗar bwani akəla mjir tsəɗiyir giri, tsu apatə kamnyar hamta jirər ɗa akwa Kristi Yesu, da ku ɗar bwani akəla mjir tsəɗiyir ɗa na mjir Yahudi.

¹⁵Kamnyar mjir Yahudi ni an tsi naɓiyayeri, ka tsi Mthlaku Yesu, antə kulini da akwa hara ala mburu bwani tsuwa. Da aɗi akwa mzhi hara su na ata ndzi msəra aka Hyel wa, antə apani da aɗi akwa hir mji wa.

¹⁶Da akwa bara ngkatə yeru ta yeru angkər labar ar mbantədzi aka dur damwa ta da asə wutə mbantədzi. Antə apani da akwa hara ka bikər ɗa vərvər hara hang. Amma kulini ɗəffə bwarbwarkurər Hyel ku si ata kəra ɗa.

¹⁷Amma sakatə mburu ndəkəmtadzi kəga giri mnyar saka laga ni, yeru aɗi zhar dzama ata kəra giri wa, kamnyar yeru ku kəɗar bara abbər ka yeru jaktə ngka adzə giri, ka mburu kəɓa nca ka nca.

¹⁸Jiri yeru ku bara ka yeru jaktə si adzə giri. I na Bulus ku kəɗar ka kəɗari abbər ka yeru si, amma Shatan ku ngkatə yeru.

¹⁹Kamnyar wa an akwa vətə ɗəffu ala yeru, ka hara ka yeru ndzi ka kucali nə ri? Tsuwa wa an ata ndzi ala yeru apa dzakwar kuthlikur akəma Mthlaku Yesu, ma sakatə Yesu ku ngka nə ri? Aɗi giri wa ya?

²⁰Kamnyar giri an sur gayar yeru ka kucalər yeru.