Read bura-pabir 1Thlassalonika 3 Bible Online

1Thlassalonika 3 - bura-pabir bible

1Thlassalonika 3

¹Kamnyar ngəni, sakatə yeru aɗi mzhi nggitari kəra wa, antə yeru pəla ka mdə zhar yeru aghəli ahar Athlen shiyeru,

²ka thlentə Timothli ka tsa ra wuli giri. Tsa an ɓzərma' mburu, tsuwa yeru akwa hara kəthlərər Hyel ni ata kəma duku kəga tsa, akwa ngkər labar na msəra ar Kristi. Yeru thlentə ni ka tsa ra dunautə giri akwa hamta jiri ka tsa tsaktə giri,

³kamnyar ta bwani ni asə vu ka mdə laga yakata ka ngka abwahili. Ai giri ma giri ku sənda abbər ku ndzi dwali ka mburu kəɓa ka jili su apani.

⁴Kamnyar sakatə yeru adzə giri ni, yeru ku pəla ala giri tsu ɗəm abbər mburu ata sə ɗar bwani. Tsuwa jiri yeru ku ɗar bwani ni, apatə giri asəndə ni.

⁵An su na hara ta, sakatə I wuta abbər I amzhi jaktə tərari akəma kəra wa ni, tar tə I thlentə Timothli kamnyar ka tsa nggaɓəla ali ata kəra hamta jirər giri ni. Kamnyar I akwa thlivər abbər ta shatan ni asə ngkərtə giri, ka shanga kəthlər tə yeru hara ni sə ndzi gapani!

⁶Amma kulini Timothli ku thlata adzə giri ka ngka adzə yeru, ka pəla ala yeru labar na msəra ata kəra hamta jirər giri ka hirkur tə giri kəgari. Tsuwa tsa ku pəla ala yeru abbər tədəku giri akwa ɗangtə yeru ka msərakur, akwa mwaɓər wutə yeru apatə yeru akwa mwaɓər wutə giri ni.

⁷Antə kulini shanga ɗəffə ɓzəɓza ka bwani tə yeru akwa ɗarari, maɗaməma, labarər hamta jirər giri ni ku dunautə yeru.

⁸Kamnyar an sakatə ɗəffa yeru ata ndzi msəra ala yeru, ma giri ata ləkəma ka thləthlatə gyang akwa Mthlaku.

⁹Apani yeru akwa usar Hyel hang ka duna kamnyar giri, kamnyar jili kucali tə yeru kəgari ata kəra giri akəma Hyelər mburu.

¹⁰Yeru akwa hara adduwa pci ka viri abbər ka Hyel hara ka yeru mzhi ra wutə giri ka mburu kəɓa nca ka nca, ka yeru jaktə dunautə giri akwa hamta jiri.

¹¹Antə kulini, ka Hyel na Təddar mburu surni, ka Mthlakər mburu Yesu, an ɗəmha ala yeru laku tə ka yeru mzhi ra wuli giri.

¹²Tsuwa ka Mthlaku hara ka hirkurər giri aka nvwa giri ka aka shanga mji jakjaka ka ləkəma ka kəla, ka mzhita apa laku tə yeru hir giri.

¹³Atar apani antə tsa ata mzhi namtə ɗəffa giri ka tsa ndzi kula sur nggəla kəcəkəcari akəma Hyelər mburu ka Təddar mburu, akwa sakar səyir Mthlakər mburu Yesu ata kəma duku ka shanga mjirni.