Read bura-pabir 1Thlassalonika 4 Bible Online

1Thlassalonika 4 - bura-pabir bible

1Thlassalonika 4

¹I akwa bara hartə gari ni, maɗaməma, ka kiɗa ka tsaktə giri akwa thləma Mthlaku Yesu, abbər ka giri hara suayeri tə Hyel ata nggatə msərakurari, apatə yeru ku thlipa ala giri. Wala tə giri akwa harari shang ni, ka giri vərvər harari har ka təramta ngəni.

²Kamnyar giri asəndə su tə yeru pəla ala giri abbər ka giri hara tə barkar Mthlaku Yesu.

³Kamnyar ngəni an su tə Hyel akwa barari, abbər ka giri ndzi ɓɗakkarkara, atar ndəkəmta kər giri ka kəlara jili karwakur.

⁴Ka kəlara mda akwa nca giri səndə laku tə tsa ata ɓəlatə dzari[1] ka tsa ndzi ɓɗakkarkara ka daraja.

⁵Ga aɗiya nu nggukayeri na ar dza apatə mji na aɗi səndə Hyel wa ana hara nə wa.

⁶Ga aɗiya fəi mda wala ɓzamtə ɗəffa nvwa nga abwar su ngəni wa, kamnyar Hyel an mdər ntə ɗimikur akwa shanga suayeri ngəni, tsu apatə yeru pəla ala giri təng ɗəm ka tsaktə giri ka duna ata kər ni.

⁷Kamnyar Hyel aɗi kəga mburu abbər ka mburu hara karwakur wa, amma ka mburu ndzi ɓɗakkarkara.

⁸Antə apani, kəlara mdə na ku nggəlar surthlipə ngəni, tsa aɗi ata nggəlar mdə wa, amma tsa nggəlar Hyel na na ala giri Mambələrni na Ɓɗakkarkar ni.

⁹Aɗi dwali ka yeru rəbuta ala giri abbər ka giri hir maɗama' giri wa, kamnyar giri ka kəra giri, Hyel ku kurtə thlipa ala giri abbər ka giri hir nvwa giri.

¹⁰Tsuwa jiri, giri hir shanga maɗama' giri na akwa Makidoniya. Amma wala apani, yeru akwa kiɗə giri, maɗaməma, abbər ka giri vərvər harari har ka təramta ngəni.

¹¹Ka giri bara ndzi mji na nkahənkahari ka hangkal, ka waskəi akwa nca giri vədzə hangkalari aka kəthlər na akəmari, ka giri kəthlər ka tsiya giri tsu apatə yeru pəla ala giri nda.

¹²Atar apani, giri ata ndzi ka daraja wala ata nca mji na aɗi Krishan wa, tsuwa giri aɗi ata ndzi ata wulya mji wa.

¹³Amma, maɗaməma, yeru aɗi akwa bara ka giri ndzi kula səndə su ata kəra mji na ku kurtə mtə wa, ta giri asə ndzi ka ɗəffə ɓzəɓza apa mji na kula sur vəkər.

¹⁴Kamnyar təng tə mburu ku hamta jiri abbər Yesu ku mti ka jaktə thlatə ka damwa ni, tsu apani tsuwa mburu ka hamta jiri atar Yesu, abbər Hyel ata sə ngka ka Yesu ata kəma duku kəga shanga mji na ku hamta jiri aka Yesu akəmata da amtə ni.

¹⁵Kamnyar ngəni antə yeru akwa pəla ala giri ndər tə Mthlaku pəla, abbər, mburu na mburu ata ndzi tsu aɗi ka mpika akwa sakatə Mthlaku ata si ni, mburu aɗi ata thlatə kəmata mji na ku mtə wa.

¹⁶Kamnyar Hyel ka kərari surni ata səghəi akwar amtazi, ka kəga ka kuraku na ola, ka kurakər mdərthlentərhyel na ola, ka mbur təmbəl na ar Hyel. Antə mji na ku mti na ka hamta jiri aka Kristi ni, ata thlatə ka mpika ntangkəma.

¹⁷Aghəla nda antə mburu na mbil tsu ka mpikə ni, mda ata fatə mburu ata kəma duku kəga da akwa dlamba, kamnyar ka mburu kəɓa ka Mthlaku akwa shambar amtazi. Antə mburu ata ndzi ata kəma duku ka Mthlaku har ba saka madi.

¹⁸Antə ka giri shiktə ɗəffa nvwa giri ka ndərayeri ngəni.