Read bura-pabir 1Thlassalonika 5 Bible Online

1Thlassalonika 5 - bura-pabir bible

1Thlassalonika 5

¹Amma ata kəra saka wala vir tə suayeri ngəni ata sə hara ni, maɗaməma, aɗi ata ndzi dwali ka mdə rəbuta ala giri su ata kər wa.

²Kamnyar giri ka kəra giri ku səndə karkar abbər virər səyir Mthlaku ni ata sə wutə mburu kakər kula səndər mburu, apa səyir mdər həla aviri.

³Sakatə mji akwa pəla, “Shanga su akwa mwa kalkal lapiya” təng təkəma asar ata pwa ata kəra ɗa kakər, apatə kutərya ana ngkəi mwala na ka hur, tsuwa vəi msərəmta aɗi wa.

⁴Amma ar giri, maɗaməma, giri aɗi akwa kuthlu, har tə vir ndaga ata sə wutə giri apa səyir mdər həl wa.

⁵Kamnyar shanga giri an mjir parakəu, giri mjir pci. Mburu aɗi mjir viri wala kuthlu wa.

⁶Antə apani mburu aɗiya heni, apatə mji laga ana hara wa. Amma ka mburu ndzi ata wula ɗəmhəɗəmhari ka hangkala mburu nkahənkahari.

⁷Kamnyar mji na ana heni, da ana heni ni aviri, tsuwa mji na ana wika da ana wikə ni aviri tsuwa.

⁸Amma təng tə ar mburu, mburu mjir pci ni, tar ka mburu ngkahədzi, ka hamta jirər mburu ka hirkur ar mburu ndzi ləptər liya ar mburu, ka vəkər ar mburu ka mbantədzi ni ndzi dzakwar liya ar mburu.

⁹Kamnyar Hyel aɗi carɓəla mburu abbər ka tsa pumta ɗəffə bwarbwarkurərni ata kəra mburu wa, amma kamnyar ka mburu wutə mbantədzi atar Mthlakər mburu Yesu Kristi,

¹⁰na ku mti kamnyar mburu. Kamnyar wala ma mburu tsu ka mpika, wala ma mburu an ku mti, ka mburu ndzəndzi ata kəma duku kəga tsa.

¹¹Antə ka giri dunautə nvwa giri, ka kəlantə nvwa giri, tsu apatə giri akwa harari kulini ni.

¹²Amma yeru akwa kiɗə giri, maɗaməma, abbər ka giri nar səli aka mji na akwa kəthlər ka duna akwa nca giri, watau mji na ol'ola akwa nca giri, na ana hamta ala giri sauri.

¹³Ka giri wul mdəkurər ɗa ka daraja, ka hir ɗa ka ɗəffa giri shang, kamnyar kəthlər tə da akwa harari. Tsuwa ka giri ndzi lapiya kəga nvwa giri.

¹⁴Yeru akwa kiɗə giri, maɗaməma, abbər ka giri tsaktə mji na harwa ni, ka giri dunautə mji na ka ɗəffa ɗa mtathlaku, ka giri dlar mji na kula duna, ka giri mbwi ɗəffa giri aka shanga ɗa.

¹⁵Ka giri wuta abbər giri aɗi akwa ntə ɗimikur ka ɗimikur wa, amma tədəku ka waskəi bara hara su na ɓɗaku aka nvwa ni, ka aka shanga mji tsuwa.

¹⁶Ka giri ndzi ka kucali tədəku.

¹⁷Ka giri hara adduwa tədəku kula tsamta.

¹⁸Ka giri usar Hyel akwa shanga su, kamnyar ngəni an su tə Hyel ɗəmha ala giri akwa Kristi Yesu.

¹⁹Giri aɗiya tsi duna Mambəl na Ɓɗakkarkara wa.

²⁰Giri aɗiya rutə kəthlər ar naɓikur wa.

²¹Ka giri ngkərtə shanga su, ka kəsi na ɓɗakari ni ɓɗaku.

²²Ka giri hwi kəlara su na ɗimi.

²³Kulini ka Hyelər msərakur surni, namtə giri ɓɗakkarkara ata kəma duku, ka tsa ɓəlatə mambələr giri, ka mpika giri, ka kumər dza giri shang, ka giri ndzi kula sur nggəla akwa vir səyir Mthlakər mburu Yesu Kristi.

²⁴Tsa na kəga giri ni tsa ka jirkur, antə tsa ata haratari.

²⁵Maɗaməma, ka giri hara ala yeru adduwa tsuwa.

²⁶Ka giri thlawar shanga maɗama' giri shili ka mwanki ka paktər tsi na ɓɗakkarkara.

²⁷I akwa kiɗə giri akwa thləma Mthlaku abbər ka giri karatə kakaɗə ngəni aka shanga maɗaməma.

²⁸Ka Mthlakər mburu Yesu Kristi hara ala giri ɓɗakkur.