Read bura-pabir Joshuwa 1 Bible Online

Joshuwa 1 - bura-pabir bible

Joshuwa 1

¹Aghəla tə Musa na mafar MTHLAKU ku mti antə MTHLAKU pəla aka Joshuwa na ɓzər Nun, na mdər dlarər Musa, abbər,

²“Mafarna Musa ku mti. Antə ka gə ɗəmhədzi kulini, ga ka shanga mjir Israila, ka giri fəlɓəla Thlyagha Jodan kamnyar mwari akwa tsəɗi tə I akwa bara hamta ala ɗa ni.

³Kəlara vəi tə giri ku pu səla giri, I ata hamta ni ala giri, apatə I ku kurtə hara alkawalari aka Musa.

⁴Kəla tsəɗiyir giri ata baɗita akwa mtakə na abwar anəm ka pudza aka garayeri ar Lebanon təbwar yala, ka baɗita ata mnya Thlyagha Yufiretis na ola, ka paktə ka shanga tsəɗi mjir Hitti, har ka pudza aka mnya Manda Meditereniya təbwar ramta.

⁵Mda aɗi na ata mzhi thləthlata akəma ga akwa mpa akwa shanga ndzəndziyir mpika gə wa. Kamnyar apatə I ku ndzi ata vəi duku ka Musa antə I ata ndzi ata vəi duku ka ga. I aɗi ata zhar nga ka gə ləkwa səli wa, wala fwari ata kəra gə wa.”

⁶“Ka gə ntsətədzi, ka ndzi ɓəɓal! Kamnyar ga an ata pwar mji ngəni har ka da dlu tsəɗi tə I hara alkawalər hamtari aka kəkayeri arɗa ni.

⁷Ka gə ntsətədzi ka jirkur, ka ndzi ɓəɓal. Ka gə wuta abbər shanga tsawayeri tə Musa na mafarna hamta ala gə ni, ga ku ɓəlatə ɗa ɓɗaku. Ga aɗiya pəramta abwa mazəm wala abwa matsəkar wa, kamnyar ka gə mzhi nggyari su akwa kəlara bwa tə ga ata mwari.

⁸Ka gə wuta abbər ndərayeri na akwa Kakaɗər Tsawa ngəni aɗi ndəka ka mnya gə wa. Ka gə dzama ata kəra ndərayeri ni pci ka viri, kamnyar ka gə mzhi vədzə hangkala ga, ka wuta abbər ga ku haratə shanga su tə mdə rəbuta akwa ni. Atar apani antə ga ata wutə ləkəma, ka mzhi nggyari kəlara su madi.

⁹Ɗangta diya I ku tsawa ala ga abbər ka gə ntsətədzi, ka ndzi ɓəɓal. Ga aɗiya yakatə wa, tsuwa ga aɗiya shishiɓə wa, kamnyar I na MTHLAKU na Hyelər nga, I ata vəi duku ka ga.”

¹⁰Antə Joshuwa tsawa aka mji na ol'ola ata kəra mji ni abbər

¹¹ka da mwari akwa nca mji na akwa vəi fəli ni, ka pəla ala ɗa abbər, “Ka giri ɗəmhə susəma tə giri ata səmari, kamnyar azi ka vir makər giri ata fəlɓəla Thlyagha Jodan kamnyar ləkwa tsəɗi tə MTHLAKU na Hyelər giri akwa hamta ala giri kifa ka giri ndzi mthlakari ni.”

¹²Antə Joshuwa pəla aka mjir nyarmbwar Ruben, ka ar Gad, ka aka retar mjir nyarmbwar Manasse abbər,

¹³“Ɗangtə gir su tə Musa na mafar MTHLAKU pəla ala giri. Tsa pəla, ‘MTHLAKU na Hyelər giri akwa hamta ala giri vəi ghərəmtaghəra, antə tsa ku kurtə hamta ala giri tsəɗi ngəni na akwa bwar raghəi ka Jodan ni ka tsa ndzi ar giri.’

¹⁴Antə mwankir giri, kəga maɗa' giri, kəga mwaɓiyir giri ata ndzi azi akwa bwar raghəi ka Jodan ni. Amma shanga mji shili na akwa nca giri na ka dunar mwari akwa mpa, ata fatə kari mpa arɗa, ka pwa akəma maɗama' ɗa, ka fəlɓəla abwanda kamnyar dlar ɗa,

¹⁵har tar ma da ku ləkwa tsəɗi tə MTHLAKU na Hyelər giri akwa hamta ala ɗa ni. Ma sakatə shanga mjir Israila ku ndzəndzi lapiya, giri ata mzhi ngka akwa tsəɗiyir giri na abwar raghəi ka Jodan tə Musa na mafar MTHLAKU ku hamta ala giri ni, ka giri ndzəndzi anda.”

¹⁶Antə da shinau aka Joshuwa ka pəla, “Yeru ata hara shanga su tə gə tsawa ala yeru, tsuwa yeru ata mwari akwa kəlara vəi tə ga ku thlentə yeru.

¹⁷Yeru ata kələngkər ala ga, tsu apatə yeru ana kələngkər aka Musa akwa shanga su. Kiɗər yeru an abbər ka MTHLAKU na Hyelər nga ndzi adzə nga apatə tsa ku ndzi adzə Musa!

¹⁸Kəlara mdə na ku nggəlar ndərər nga, ka nggəlar ta ɓəla tsawur nga, mda ata tsi ni. Ar ngə təng, ntsətədzi ɓɗaku, ka gə ndzi ɓəɓal!”