Read bura-pabir Joshuwa 10 Bible Online

Joshuwa 10 - bura-pabir bible

Joshuwa 10

¹Vir laga təng Adonizedek na kuthlir Urushalima, nggata abbər Joshuwa ku səm Ai akwa mpa, ka hilantə bərni Ai ni ɗimi ɗimi, tsu apatə tsa hara aka Yariko ka kuthlirni. Tsuwa tsa ku nggatə laku tə mjir Gibeyon mbwi alkawal ar ndzi ka msərakur ka mjir Israila, tə kulini da akwa nca ɗa.

²Antə kuthlir Urushalima ka mjirni ku thlivər ka duna, kamnyar tə Gibeyon an bərni na ola, kalkal ka pal akwa nca bərniyayeri na ol'ola na ka kuthli, har ma tsa ku təramta Ai ka olkur. Tsuwa shanga mjirni masəku akwa mpa.

³Antə Adonizedek na kuthlir Urushalima ni thlentə kuraku aka Hoham na kuthlir Hebron, ka Piram na kuthlir Yarmuth, ka Yafiya na kuthlir Lakish, ka aka Debir na kuthlir Eglon, abbər,

⁴“Sər giri ka giri dlar ra ka mburu dlərəmta Gibeyon! Kamnyar mjirni ku mbwi alkawal ar ndzi msəra ka Joshuwa kəga mjir Israila.”

⁵Antə kuthlyayeri ngəni ntəfu na ar mjir Amor ni, watau kuthlir Urushalima, ka kuthlir Hebron, ka kuthlir Yarmuth, ka kuthlir Lakish, ka kuthlir Eglon, ku paktə kəra ɗa. Antə da fatə sojayeri arɗa, ka mwari ka pungkər ɗa ata kəra Gibeyon, ka dlər ni.

⁶Antə mjir Gibeyon thlentə kuraku aka Joshuwa akwa vəi fəliyir ɗa na akwa Gilgal ni abbər, “Zanuwa, ga aɗiya zhar yeru wa! Asər taktar, ka gə mbantə yeru! Dlar yeru, kamnyar shanga kuthlyayeri ar mjir Amor na akwa tsəɗi garayeri ni ku paktə kəra ɗa ka da si dlər yeru.”

⁷Antə Joshuwa, ka shanga sojayeri arni, purəm kəga sojayeri na mulmulari, ku thlata ahar Gilgal.

⁸Antə MTHLAKU pəla aka Joshuwa, “Ga aɗiya thlivər ɗa wa, kamnyar I ku kurtə hamta ɗa ala ga. Mda aɗi akwa nca ɗa na ata mzhi thləthlata akəma gə wa.”

⁹Antə Joshuwa ka sojayeri arni ku thlata akwa Gilgal aviri ka mwari ahar Gibeyon, ka pwa ata kəra mjir Amor kula səndər ɗa.

¹⁰Antə MTHLAKU ku hara tə mjir Amor ku thlivəra sakatə da wutə sojayeri ar Israila. Antə mjir Israila ku kurəmta ɗa akwa Gibeyon. Da kədləmta ɗa ata lakur ləmta ahar Beth Horon, ka ləkəma ka tsəgəi ɗa ata laku har ka mwari ahar Azeka ka Makkeda.

¹¹Sakatə mjir Amor akwa hwi ləhar Azeka kamnyar ka da msərəmta sojayeri ar Israila ni antə MTHLAKU pughəi pela handzəkəla na ol'ola akwar amtazi ka ndzəndzəhtə ɗa kəgari. Antə pela handzəkəla ni ku kurəmta mji hang ta natə mjir Israila tsəgəi ka katsakar.

¹²Akwa vir tə MTHLAKU hamta nggyari su aka mjir Israila ata kəra mjir Amor, antə Joshuwa gari ka MTHLAKU akəma mjir Israila abbər, “Pci ragai, thləthlatə tsəkəm ata kəra Gibeyon, Thliya ragai, thləthlata ata kəra Mular Ayalon.”

¹³Antə pci ku thləthlatə tsəkəm, antə thliya ku thləthlata, har tar tə mji ni ntəmta ɗimikur, ata kəra dawayeri arɗa. Antə mdə ku rəbwamta ha ngəni akwa Kakaɗər Yashar. Pci ku thləthlatə tsəkəm ata ɗəffa hyel, antə tsa aɗi təri wa har vir pal swakti.

¹⁴Mda aɗi ɗar wutə jili vir ngəni wa, wala akəmata nda, wala aghəla nda, kamnyar tsa an vir tə MTHLAKU ku kələngkər aka mdə təkəma. Jiri, MTHLAKU ku mpa kamnyar mjir Israila!

¹⁵Aghəla ngəni antə Joshuwa ka sojayeri arni ku ngka akwa vəi fəliyir ɗa ahar Gilgal.

¹⁶Wala tə kuthlyayeri ngəni ntəfu ar mjir Amor ni ku hwi ka ra ɗuwardzi akwa ku ahar Makkeda, mdə ku wutə ɗa.

¹⁷Antə mdə ku pəla aka Joshuwa abbər, “Ai, mdə ku wutə kuthlyayeri na ntəfu ni, da ra ɗuwardzi akwa ku laga ahar Makkeda.”

¹⁸Antə Joshuwa pəla, “Mwar giri, ka giri takəltə pelayeri na ol'ola, ka giri dzəɓtə mnya ku ni kəgari, ka giri pwi mji na ata sək kəra ɗa.

¹⁹Amma giri ka kəra giri aɗiya ndzi anda wa! Ka giri ləkəma ka kədlə ghəla dawayeri ar giri, ka kurəmta mjir ɗa na aghəli, giri aɗiya zhar ɗa ka da ləkwa bərniyayeri arɗa wa! Kamnyar MTHLAKU na Hyelər giri ku hamta ɗa ala giri.”

²⁰Antə Joshuwa ka mjir Israila ku kurəmta ɗa hang ka duna, tə shanga ɗa ku kuri, wala tə mji laga akwa nca ɗa ku msər ka ləkwa bərniyayeri arɗa na akwa katangga.

²¹Antə shanga sojayeri ar Israila ku ngka lapiya adzə Joshuwa akwa vəi fəliyir ɗa na ahar Makkeda. Antə mda aɗi wala duku na ku nggitə kəlar mnyari abbər tsa ata bara mpar mjir Israila wa.

²²Aghəla nda antə Joshuwa pəla, “Kəlar giri mnya ku ni, ka giri fwaɓəla kuthlyayeri na ntəfu ni, ka giri səntə ɗa ali.”

²³Antə da ku hara, ka fwaɓəla kuthlyayeri na ntəfu akwa ku ni, ka səntə ɗa alari. Da an kuthlir Urushalima, ka kuthlir Hebron, ka kuthlir Yarmuth, ka kuthlir Lakish, ka kuthlir Eglon.

²⁴Antə da fwaɓəla kuthlyayeri ni ka mwantə ɗa aka Joshuwa. Antə Joshuwa ku kəga shanga mjir Israila, ka pəla aka mji na ol'ola ata kəra sojayeri na adzə ni abbər, “Asər giri azi kudzəha, ka giri vətə səla giri ata wulya kuthlyayeri ni.” Antə da ku shahədzi, ka vətə səla ɗa ata wulya ɗa.

²⁵Antə Joshuwa pəla aka mji ol'olər sojayeri ni, “Giri aɗiya thlivər wa, wala shishiɓə tsu wa. Ka giri ntsətədzi, ka ndzi ɓəɓal, kamnyar apani antə MTHLAKU ata hara ka shanga dawayeri ar giri tə giri ata mpa ka da.”

²⁶Antə Joshuwa ku tsəgəi kuthlyayeri na ntəfu ni, ka hahəi mshiyir ɗa ata nfwayeri ntəfu. Antə mshiyir ɗa ku ɓukci ata nfwayeri ni har tahaku.

²⁷Sakatə pci abaka təri, antə Joshuwa tsawa abbər ka mdə fəi mshiyir ɗa ata nfwayeri ni. Antə mdə ku fəi ɗa ka ra pumta ɗa akwa ku tə da ɗuwamtadzi akwa nda. Antə da hartə mnya ku ni ka pelayeri na ol'ola, na tsu aɗi anda har ba ashina.

²⁸Tsu vir nda antə Joshuwa səm Makkeda akwa mpa. Tsa tsəgəi shanga mji na akwa bərni ni ka katsakar, har mda aɗi na mbil wala duku ka mpikə wa. Tsuwa tsa ku hara aka kuthlir Makkeda su tə tsa hara aka kuthlir Yariko.

²⁹Aghəla nda antə Joshuwa ka shanga sojayeri arni ku təra kazhar Makkeda, ka mwari ahar Libna ka dlərəmta Libna.

³⁰Antə MTHLAKU ku hamta bərni ni ka kuthlirni akwa tsiya mjir Israila. Antə da tsəgəi shanga mji na akwa bərni ni ka katsakar, mda aɗi mbil ka mpika akwa wala duku wa. Antə Joshuwa ku tsi kuthlir Libna tsu apatə tsa tsi kuthlir Yariko.

³¹Aghəla nda antə Joshuwa ka shanga sojayeri arni ku zhar Libna ka mwari ahar Lakish, ka kalaktə ni ka sojayeri, ka pwa ata kərari ka mpa.

³²Antə MTHLAKU ku hamta Lakish aka mjir Israila. Antə Joshuwa ku səm Lakish akwa vir na suɗkur, ka tsəgəi shanga mjir di ni ka katsakar, tsu apatə tsa hara aka Libna.

³³Antə Horam na kuthlir Gezer ku si kamnyar dlar mjir Lakish, amma sojayeri ar Joshuwa ku tsi kuthli ni kəga mjirni, da aɗi mbilar mdə wala duku ka mpikə wa.

³⁴Aghəla nda antə Joshuwa ka shanga sojayeri arni ku zhar Lakish ka mwari ahar Eglon, ka kalaktə ni ka sojayeri, ka pwa ata kərari ka mpa.

³⁵Antə da ku səm di ni tsu vir nda, ka tsəgəi shanga mjir di ni ka katsakar vir nda, tsu apatə tsa hara aka Lakish.

³⁶Aghəla nda antə Joshuwa ka shanga sojayeri arni ku zhar Eglon ka ndləɓəla ahar Hebron, ka pwa ata kərari ka mpa.

³⁷Antə da ku səm Hebron, ka tsi kuthlirni, ka kurəmta shanga mji na akwa Hebron, ka na akwa diyayeri na kalaktə ni, ka katsakar. Joshuwa ka mjirni aɗi zhar mdə wala duku ka mpikə wa. Da kurəmta shanga mji na akwa, ka hilantə di ni ɗimi ɗimi tsu apatə da hara aka Eglon.

³⁸Antə Joshuwa ka shanga sojayeri arni ku shinar kəma ɗa ka mwari ahar Debir, ka pwa ata kərari ka mpa.

³⁹Antə da səm di ni akwa mpa, ka tsi kuthlirni, ka kurəmta shanga mji na akwa Debir, ka na akwa diyayeri na kalaktə ni ka katsakar. Joshuwa ka mjirni aɗi zhar mdə wala duku ka mpikə wa. Joshuwa ka sojayeri arni ku tsi kuthlir Debir, ka kurəmta shanga mji na akwa, tsu apatə da hara aka Hebron ka Libna kəga kuthlir ɗa.

⁴⁰Antə Joshuwa ku səm shanga tsəɗi ni, watau bwar garayeri, ka Negev, ka dəraku, ka kusar garayeri, ka shanga kuthlyayeri arɗa. Joshuwa ka sojayeri arni aɗi mbilar mdə wala duku wa. Da kurəmta shanga su na ku ndzi ka mpika, tsu apatə MTHLAKU na Hyelər Israila ku tsawa.

⁴¹Antə Joshuwa ku səm ɗa akwa mpa, baɗita akwa Kadesh Barneya ka pudza aka Gaza, ka shanga bwar Goshen, har ka mwanta adzə Gibeyon.

⁴²Akwa saka ndaga Joshuwa səm shanga kuthlyayeri ngəni kəga tsəɗiyir ɗa akwa ləɓəlarni akwa mpa ka pal, kamnyar MTHLAKU na Hyelər Israila ku mpa kamnyar mjirni Israila.

⁴³Aghəla nda antə Joshuwa ka sojayeri arni ku ngka akwa vəi fəliyir ɗa na akwa Gilgal.