Read bura-pabir Joshuwa 11 Bible Online

Joshuwa 11 - bura-pabir bible

Joshuwa 11

¹Sakatə Yabin na kuthlir Hazor nggatə labar səm tə mjir Israila hara ni, antə tsa thlentə ndər aka Yobab na kuthlir Madon, ka aka kuthlyayeri ar Shimron ka Akshaf,

²ka kuthlyayeri na akwa tsəɗi garayeri na abwar yala, ka na akwa Araba akwa Mular Jodan na akwa anəm ka Kinnereth, ka na akwa dəraku, ka na akwa Nafoth Dor təbwar ramta.

³Tsuwa tsa ku thlenta aka mjir Kanana na abwar ramta ka na abwar raghəi ka Thlyagha Jodan, ka aka mjir Amor, ka mjir Hitti, ka mjir Perizzi, ka mjir Yebusi na akwa tsəɗi garayeri, ka tsuwa aka mjir Hivi na ka ndzi ata kusar Gar Hermon na akwa tsəɗi Mizpa.

⁴Antə da ku səɓəla ka shanga sojayeri arɗa dlama dlama apa wuyakər mnya manda, ka takwayeri kəga wagənayeri ar taku hang ndzang.

⁵Antə shanga kuthlyayeri ngəni ku paktə kər ka paktə sojayeri arɗa ata kəma duku, ka mwari ka nci vəi fəliyir ɗa ata mnya Zərkər Merom, kamnyar ka da dlər mjir Israila.

⁶Antə MTHLAKU pəla aka Joshuwa abbər, “Ga aɗiya thlivər ɗa wa, kamnyar ɗəpa apa saka apani I ku kurtə kurəmta shanga ɗa, ka hamta ɗa aka mjir Israila. Antə giri ata ɓəgələmta səla takwayeri arɗa ka mbamta wagənayeri ar takur ɗa.”

⁷Antə Joshuwa ka sojayeri arni ku mwari ka pwa ata kəra ɗa ka mpa kula səndər ɗa akwa Zərkər Merom ni.

⁸Apani MTHLAKU ku hamta ɗa aka mjir Israila. Antə mjir Israila ku dlər ɗa, ka kədləmta ɗa har ka mwantə ɗa adzə Sidon na Ola, ka Misrefoth Mayim, ba akwa Mular Mizpa təbwar raghəi. Antə sojayeri ku ləkəma ka dlər ɗa, har tə mda aɗi wala pal akwa nca dawayeri ni na ku mbil ka mpikə wa.

⁹Joshuwa ku hara ala ɗa su apatə MTHLAKU ku tsawa alari. Tsa ɓəgələmta səla takwayeri arɗa, ka mbamta wagənayeri ar takur ɗa.

¹⁰Tsu akwa saka ndaga antə Joshuwa ku shinar kəmari ka səm bərni Hazor, ka tsi kuthlirni ka katsakar. Tsuwa akwa saka nda Hazor an ka kuthlikur ata kəra shanga kuthlikurayeri na mbila abwanda.

¹¹Antə Joshuwa ka sojayeri arni ku tsəgəi shanga mji na akwa, ka hilantə bərni ni ɗimi ɗimi. Su aɗi na ka mpika tə tsa mbilar wala duku wa. Antə Joshuwa ku mbamta bərni Hazor ni ka u'u.

¹²Apani Joshuwa ku səm shanga kuthlyayeri ni kəga mjir ɗa shang akwa mpa, ka hilantə di ni ɗimi ɗimi, apatə Musa na mafar MTHLAKU ku tsawa.

¹³Wala apani mjir Israila aɗi mbamta bərniyayeri natə mdə jaktə həntə ata kəra həi zawarari ar bərniyayeri na waci wa, tar Hazor shini antə Joshuwa mbamta.

¹⁴Tsuwa mjir Israila ku fatə shanga suayeri na ɓɗakɓɗaku, kəga mwaɓiyayeri na akwa bərniyayeri ngəni aka kəra ɗa. Amma da ku tsəgəi shanga mji ka katsakar, ka ɓdləmta ɗa shang, mda aɗi na ka mpikə wala duku tə da zhari wa.

¹⁵Da hara kalkal apatə MTHLAKU ku tsawa aka Musa na mafarni, ka tsuwa apatə Musa ku tsawa aka Joshuwa, apani antə Joshuwa ku hara. Su aɗi wala duku natə MTHLAKU ku tsawa aka Musa na kula tsa hara wa.

¹⁶Apani antə Joshuwa ku səm shanga tsəɗi ni. Tsa səm tsəɗi garayeri, ka shanga Negev, ka shanga bwar Goshen, ka kusar garayeri na təbwar ramta, ka Araba, ka garayeri ar Israila kəga kusar garayeri arɗa,

¹⁷baɗita akwa Gar Halak, na təramta ka mwari təbwar Seyir, har ka mzhitə Baalgad na akwa yala akwa Mular Lebanon ata kusar Gar Hermon. Tsuwa Joshuwa ku ngkəgəi shanga kuthlyayeri arɗa, ka dlaɓu ɗa, ka tsəgəi ɗa.

¹⁸Joshuwa ku fəi akwa mpa ka shanga kuthlyayeri ngəni.

¹⁹Bərni aɗi wala duku na ku mbwi alkawal ar ndzi msəra ka mjir Israila wa, tar mjir Hivi na ka ndzi akwa Gibeyon. Antə mjir Israila ku səməmnya shanga mambila bərniyayeri ni akwa mpa.

²⁰Kamnyar MTHLAKU an namtə ɗəffa ɗa ɓəɓal kamnyar ka da mpa ka mjir Israila, kamnyar ka mdə kurəmta ɗa cipu, mda aɗiya kətadzə ɗa wa. Kamnyar apani antə MTHLAKU ku tsawa aka Musa.

²¹Ata saka ndaga antə Joshuwa mwari ka kurəmta mjir nyarmbwar Anak na akwa bwar garayeri, ka na ahar Hebron, ka Debir, ka Anap, shang kəga na akwa bwar garayeri ar Yahuda, ka na akwa garayeri ar Israila. Joshuwa ku ɓdləmta ɗa shang kəga bərniyayeri arɗa.

²²Mdər nyarmbwar Anak aɗi wala duku na mbila akwa tsəɗi Israila wa, tar akwa bərniyayeri ar Gaza, ka Gath, ka akwa Ashdod na akwa tsəɗi Filistiya, antə da ku mbila.

²³Apani antə Joshuwa ku səm shanga tsəɗi ni, apatə MTHLAKU tsawa aka Musa. Antə Joshuwa ku hamta tsəɗi ni aka mjir Israila, ka ndəkəmta ala ɗa ata nyarmbwa ata nyarmbwa arɗa. Apani antə shambar ku fyarar tsəɗi ni akwa mpayeri ni.