Read bura-pabir Joshuwa 12 Bible Online

Joshuwa 12 - bura-pabir bible

Joshuwa 12

¹Akəmata Musa amta, tsa ku pwar mjir Israila akwa mpa tə da ku səm kuthlyayeri suɗa na abwar raghəi ka Thlyagha Jodan, ka dlutsə tsəɗiyayeri arɗa. Kuthlyayeri ngəni ku hara kuthlikur ata kəra bwar tsəɗi na baɗita akwa Mular Arnon har ka mwanta adzə Gar Hermon, ka paktə ka shanga bwar raghəi ar Araba.

²Pal akwa nca kuthlyayeri natə Musa səm ɗa akwa mpa ni an Sihon na kuthlir mjir Amor, na ka ndzi ahar Heshbon. Tsa hara kuthlikur ata kəra bwa na baɗitə ka Arower na ata mnya Mular Arnon, ka su na baɗita ata retar mular ni ka pudza aka Thlyagha Yabbok, na an kəla mjir Ammon. Tsəɗi ngəni ku paktə ka retar bwar Gileyad.

³Tsuwa bwar kuthlikurərni ku paktə ka bwar raghəi ar Araba, baɗita akwa Manda Una har ka pudza aka Manda Araba, watau Manda Una na abwar raghəi ata lakur Beth Yeshimmoth, ka təbwar anəm ka pudza aka kusar Gar Pisga.

⁴Tsuwa mjir Israila ku səm Og na kuthlir Bashan, pal akwa nca mjir nyarmbwar Refa na mbila. Kuthli Og ku hara kuthlikur ahar Ashtaroth ka Edrai,

⁵ka hara kuthlikur ata kəra bwar Gar Hermon, ka Saleka, ka shanga bwar Bashan, har ka tsadza aka kəla mjir Geshur ka mjir Maaka, ka retar Gileyad, har ka mwanta adzə tsəɗiyir Kuthli Sihon na ahar Heshbon.

⁶Nayeri ni an kuthlyayeri na suɗa tə Musa ka mjir Israila səm ɗa akwa mpa ni. Antə Musa na mafar MTHLAKU ku hamta tsəɗiyayeri arɗa kifa aka mjir nyarmbwar Ruben, ka nyarmbwar Gad ka aka retar nyarmbwar Manasse, ka ndzi arɗa.

⁷Nayeri ni an thləma kuthlyayeri natə Joshuwa ka mjir Israila ku səm ɗa akwa mpa, watau kuthlyayeri na akwa hara kuthlikur abwar ramta ka Thlyagha Jodan, baɗita akwa Baalgad na akwa Mular Lebanon ka mwanta adzə Gar Halak, na mwari təbwar Seyir. Antə Joshuwa ku hamta tsəɗiyayeri arɗa tə da ndzi kifa ar mjir Israila, ka ndəkəmta ɗa aka nyarmbwayeri na akwa Israila.

⁸Bwar tsəɗi ngəni ku paktə ka tsəɗi garayeri, ka bəbalayeri, ka Mular Araba, ka kusar garayeri, ka mtakər Yahuda, ka Negev. Tsəɗiyayeri ngəni an tsəɗiyir mjir Hitti, ka mjir Amor, ka mjir Kanana, ka mjir Perizzi, ka mjir Hivi, ka tsuwa mjir Yebusi.

⁹Nayeri ni an kuthlyayeri natə mjir Israila səm ɗa akwa mpa ni. Kuthlir Yariko, ka kuthlir Ai kudzəhə ka Bethlel,

¹⁰ka kuthlir Urushalima, ka kuthlir Hebron,

¹¹ka kuthlir Yarmuth, ka kuthlir Lakish,

¹²ka kuthlir Eglon, ka kuthlir Gezer,

¹³ka kuthlir Debir, ka kuthlir Geder,

¹⁴ka kuthlir Horma, ka kuthlir Arad,

¹⁵ka kuthlir Libna, ka kuthlir Adullam,

¹⁶ka kuthlir Makkeda, ka kuthlir Bethlel,

¹⁷ka kuthlir Tappuwa, ka kuthlir Hefer,

¹⁸ka kuthlir Afek, ka kuthlir Lasharon,

¹⁹ka kuthlir Madon, ka kuthlir Hazor,

²⁰ka kuthlir Shimron Meron, ka kuthlir Akshaf,

²¹ka kuthlir Taanak, ka kuthlir Megiddo,

²²ka kuthlir Kedesh, ka kuthlir Yokneyam na akwa Karmel,

²³ka kuthlir Dor na ata mnya manda, ka kuthlir mji na akwa Gilgal,

²⁴ka kuthlir Tirza. Shanga kuthlyayeri ni makkumari ka ntang.