Read bura-pabir Joshuwa 13 Bible Online

Joshuwa 13 - bura-pabir bible

Joshuwa 13

¹Sakatə Joshuwa ku hali, antə MTHLAKU pəla alari, “Ga ku hali ka duna, amma ba kulini bwa laga ola ku mbila akwa tsəɗi ni tə giri aɗi dlu katagu wa.

²Nayeri ni an bwayeri na mbiləmta, shanga bwar mjir Filistiya ka bwar mjir Geshur,

³baɗita akwa Zərkər Shihor na ata kəla bwar raghəi ar Masar ka mwari təbwar yala ar Ekron. Shanga bwayeri ngəni, mdə kətə ɗa abbər da an ar mjir Kanana, watau bwayeri ar kuthlyayeri ntəfu na akwa hara kuthlikur akwa Gaza, ka Ashdod, ka Ashkelon, ka Gath, ka Avvim.

⁴Tsuwa akwa bwar anəm, shanga tsəɗi mjir Kanana, baɗita ahar Meyara na akwa bwar mjir Sidon, har ka mwanta akwa Afek akwa kəla mjir Amor, mda aɗi səm katagu wa.

⁵Ka tsuwa tsəɗiyir mjir Gebal, ka shanga tsəɗi Lebanon ka mwari abwar raghəi, baɗita akwa Baalgad na abwar anəm ka Gar Hermon har ka mwanta adzə Hamath.

⁶Ngəni an paktə ka shanga tsəɗi mjir Sidon, na akwa garayeri na akwa daɓwa garayeri ar Lebanon ka Misrefoth Mayim. I ka kəri surna an ata kədləmta ɗa akəma mjir Israila. Ar nga təng ka gə wuta abbər ga ku ndəkəi tsəɗi ni aka mjir Israila ka ndzi arɗa, tsu apatə I ku tsawa ala ga.

⁷Tsuwa ka gə ndəkəi tsəɗi ni akwa daɓwa nyarmbwayeri ngəni əmdlə ni ata kəma duku ka retar nyarmbwar Manasse, ka tsəɗi ni ndzi arɗa.”

⁸Mbila retar mjir nyarmbwar Manasse, ka mjir nyarmbwar Ruben, ka mjir nyarmbwar Gad ku kurtə dlu bwar kifər ɗa natə Musa hamta ala ɗa aɓəla bwanda Thlyagha Jodan təbwar raghəi. Kamnyar Musa na mafar MTHLAKU haɗa hamta ala ɗa bwar tsəɗi ngəni.

⁹Kəla bwar tsəɗiyir ɗa baɗita akwa Arower ata mnya Mular Arnon, ata di na ata ɗəffa mular ni har ka mwanta adzə bwar garayeri ar Medeba ka pudza aka Dibon,

¹⁰ka paktə ka shanga bərniyayeri ar Sihon na kuthlir mjir Amor, na akwa hara kuthlikur akwa Heshbon, ka mwanta adzə kəla tsəɗiyir mjir Ammon.

¹¹Tsuwa tsa ku paktə ka Gileyad, ka tsəɗi mjir Geshur ka mjir Maaka, ka shanga Gar Hermon, ka shanga Bashan, har ka pudza aka Saleka,

¹²watau shanga bwar kuthlikur ar Og na kuthlir Bashan, na hara kuthlikurərni akwa Ashtaroth ka Edrai. Tsuwa Og shini an mbila akwa nca mjir nyarmbwar Refa. Amma Musa ku səm Kuthli Sihon ka Kuthli Og kəga mjir ɗa akwa mpa, ka kədləɓəla ɗa.

¹³Amma mjir Israila aɗi kədləɓəla mjir Geshur ka mjir Maaka wa, antə da ləkəma ka ndzəndzi akwa nca mjir Israila har ba ashina.

¹⁴Tar mjir nyarmbwar Lawi shiɗa antə Musa aɗi hamta ala ɗa bwar tsəɗiyir ɗa wa. Arɗa nəɓwar ɗa an saɗaka mbamba natə mda ana hamta aka MTHLAKU na Hyelər Israila, tsu apatə tsa ku hara alkawalari ala ɗa.

¹⁵Musa ku hamta bwadukwa tsəɗi ni aka mjir nyarmbwar Ruben, ata kutakəi ata kutakəi, ka ndzi arɗa ka kəra ɗa.

¹⁶Tsəɗiyir ɗa baɗita akwa Arower ata mnya Mular Arnon, ata di na ata ɗəffa mular ni, har ka mwanta adzə shanga bwar garayeri na adzə Medeba,

¹⁷ka paktə ka Heshbon, ka shanga bərniyayeri arni na ata kəra gar, watau Dibon, ka Bamoth, ka Baal, ka Beth Baalmeyon,

¹⁸ka Yahaz, ka Kedemoth, ka Mefaath,

¹⁹ka Kiriyathlayim, ka Sibma, ka Zereth Shahar na ata kəra ɗəɗəgəl na akwa mular,

²⁰ka Beth Peyor, ka ləghəyir Gar Pisga, ka Beth Yeshimoth.

²¹Tsuwa bwar ɗa ni ku ka paktə ka shanga diyayeri na ata kəra gar ka shanga bwar kuthlikur ar Sihon na kuthlir mjir Amor, na akwa hara kuthlikurərni akwa Heshbon. Antə akwa mpayeri ni Musa ku səm ni, ka kuthlyayeri na raka raka ar Midiyan, watau Evi, ka Rekem, ka Zur, ka Hur, ka Reba. Shanga ɗa ku hara kuthlikur akira kuthli Sihon.

²²Tsuwa akwa mpa ni mjir Israila ku tsi mdər tsa di laga ka thləmari Balaam, ɓzər Beyor.

²³Antə Thlyagha Jodan an kəla bwar mjir nyarmbwar Ruben. Nayeri ni an bərniyayeri kəga diyayeri arɗa natə mdə hamta ɗa kifa aka mjir nyarmbwar Ruben, ata kutakəi ata kutakəi.

²⁴Ngəni an bwar tsəɗi tə Musa hamta ɗa kifa aka mjir nyarmbwar Gad, ata kutakəi ata kutakəi.

²⁵Bwar ɗa ku paktə ka Yazer, ka shanga bərniyayeri ar Gileyad, ka retar tsəɗi mjir Ammon, ka mwanta adzə Arower na abwar raghəi ka Rabba,

²⁶ka tsuwa baɗita ahar Heshbon ka pudza aka Ramath Mizpe, ka Betonim, ka tsuwa baɗita akwa Mahanayim ka mwanta adzə bwar Lidebor.

²⁷Akwa kuta Mular Jodan ni an bərniyayeri apa Beth Haram, ka Bethnimra, ka Sukkoth, ka Zafon, ka mambila kuthlikurayeri na akira Sihon na kuthlir Heshbon. Antə kəla ɗa an ata retar Mular Jodan na abwar raghəi, ka ləmta akwa bwar yala ar Manda Galili.

²⁸Nayeri ni an bərniyayeri ka diyayeri na akira ɗa tə mdə hamta ɗa kifa aka mjir nyarmbwar Gad.

²⁹Antə Musa hamta bwadukwa tsəɗi ni aka retar mjir nyarmbwar Manasse, ata kutakəi ata kutakəi, ka ndzi arɗa.

³⁰Bwar tsəɗiyir ɗa baɗita adzə Mahanayim ka paktə ka shanga Bashan, ka shanga bwar kuthlikur ar Og na kuthlir Bashan, ka shanga diyayeri na bilən bilən ngkwakumari ar Yayir na akwa Bashan.

³¹Tsuwa bwar ɗa ni ku paktə ka retar Gileyad, ka Ashtaroth, ka Edrai, watau shanga bərniyayeri na akira Og na kuthlir Bashan. Shang bwa ngəni mdə hamta ni kifa aka retar mjir nyarmbwar Makir na ɓzər Manasse, ata kutakəi ata kutakəi.

³²Nayeri ni an bwar tsəɗi natə Musa ku ndəkəmta sakatə tsa akwa bəbalər Mowab aɓəla bwanda Thlyagha Jodan, raghəi ka Yariko.

³³Amma Musa aɗi nar bwar tsəɗi ni aka mjir nyarmbwar Lawi wa, kamnyar MTHLAKU na Hyelər Israila ku hara ala ɗa alkawal abbər tsa surni an ata ndzi bwar ɗa.