Read bura-pabir Joshuwa 14 Bible Online

Joshuwa 14 - bura-pabir bible

Joshuwa 14

¹Nayeri ni an bwayeri ar kifər tsəɗi natə mjir Israila ku dluwa akwa tsəɗi Kanana, bwayeri natə Eleyazar na prist, ka Joshuwa na ɓzər Nun, ka mji na ol'olər nyarmbwayeri ar Israila ku ndəkəi ala ɗa.

²Tsu apatə MTHLAKU ku tsawa aka Musa, antə nyarmbwayeri ngəni əmdlə ka reta ni ku dlu bwar kifər ɗa atar ndzəh kuriya.

³Kamnyar Musa ku kurtə hamta tsəɗi na abwar raghəi ka Jodan ni aka nyarmbwayeri suɗa ka reta, amma tsa aɗi na bwar tsəɗi aka mjir nyarmbwar Lawi wa.

⁴Kamnyar nyarmbwar Yusuf ku sə ndəkəidzi ka bwa suɗa, watau nyarmbwar Manasse ka Ifrayim. Mda aɗi nar bwar tsəɗi aka mjir Lawi wa. Ata vəya ndaga, mdə hamta ala ɗa bərniyayeri natə ka da ndzəndzi akwa, ka bəbalayeri kamnyar ɓəla thlar ɗa kəga təmar ɗa, kəga kwiyir ɗa.

⁵Antə mjir Israila ku ndəkəi tsəɗi ni apatə MTHLAKU ku tsawa aka Musa.

⁶Vir laga sakatə mjir Israila tsu akwa vəi fəliyir ɗa ahar Gilgal təng mji laga akwa nca mjir nyarmbwar Yahuda ni mwari adzə Joshuwa. Antə pal akwa nca ɗa na ka thləmari Kaleb na ɓzər Yefunne na mdər Kenizzi ni pəla aka Joshuwa abbər, “Ga ata mzhi ɗangtə su tə MTHLAKU pəla aka Musa na mdər Hyel ata kəra mwa sakatə mburu akwa Kadesh Barneya nə ya?

⁷I ka məva nfwarkumari sakatə Musa na mafar MTHLAKU thlentə ra anda akwa Kadesh Barneya abbər kəi sə wulɓəla ashira tsəɗi ngəni. Antə I ngka ka pəla alari jirkur su tə I wuta.

⁸Mji natə yeru mwari kəga da ku ngka ka nthləmta hyala mjir mburu, amma arna I ku nu MTHLAKU na Hyelərna ka ɗəffi shang.

⁹Antə vir nda Musa ku kahyel ali abbər, ‘Kəlara vəi tə ga ku vu səla ga, vəi nda ata ndzi ar nga kəga maɗa' nga ba saka madi, kamnyar tə ga ku nu MTHLAKU na Hyelərna ka ɗəffa gə shang.’

¹⁰Nggədza kulini, giri akwa wulari, MTHLAKU ku ɓəlatə ra har ba ashina tsu apatə tsa pəla. Kulini ku hara məva nfwarkumari ka ntəfu ka sakatə MTHLAKU ngkər gari ngəni aka Musa, təng akwa sakatə mjir Israila akwa kadla akwa mtakəu. Nggədza kulini I ku hara məva nciskumari ka ntəfu ashina!

¹¹Nggədza tsuwa har ba ashina I tsu ɓəɓal ka duna apa akwa sakatə Musa thlentə ra ni, duna tə I kəgari waci, an duna tə I kəgari kulini. Antə apani ba kulini I tsu ka dunar mwari akwa mpa, ka mwa mwayeri na aɗi shang.

¹²Antə kulini, na ali bwar tsəɗi garayeri natə MTHLAKU hara ali alkawalari vir nda tə I ka mjirna ku hamta ndərari ni. Kamnyar vir nda gə ka kəra gə sur nga ku nggata abbər mjir Anak na gurjam gurjam ni anda, akwa bərniyayeri na ol'ola akwa katangga ni. Nuhum MTHLAKU adlar ra kəi kədləɓəla ɗa apatə tsa ku pəla ali.”

¹³Antə Joshuwa ku kiɗəngkər barka aka Kaleb na ɓzər Yefunne, ka hamta alari Hebron ka tsa ndzi kifərni.

¹⁴Apani antə har Hebron ku sə ndzi nəɓwar mjir nyarmbwar Kaleb na ɓzər Yefunne, na mdər Kenizzi, kamnyar Kaleb ku nu MTHLAKU na Hyelər Israila ka ɗəffari shang.

¹⁵Akəmata ni, mda ana kəga Hebron abbər bərni ar Arba. Tsuwa Arba ni an mdə na katsala akwa nca mjir nyarmbwar Anak. Antə shambar ku fyarar tsəɗi ni akwa mpa.