Read bura-pabir Joshuwa 15 Bible Online

Joshuwa 15 - bura-pabir bible

Joshuwa 15

¹Antə bwar tsəɗi tə mdə na aka mjir nyarmbwar Yahuda ata kutakəi ata kutakəi ni, ku mwari təbwar anəm ka pudza aka kəla Edom, har ka mwari akwa Mtakər Zin, ciju akwa bwar datər anəmər tsəɗi ni.

²Kəl ngəni abwar anəm ni thlata akwa datər bwar anəmər Manda Una, akwa mnyari na awul bwar anəm.

³Antə kəl ni thlata anda ka ləɓəla təbwar anəm, akwa matəngndlər pəra ka mwari akwa Akrabbim, ka təramta ka mwari akwa Mtakər Zin, ka ndləɓəla abwar anəmər Kadesh Barneya, ka təra adzə Hezron. Baɗita anda tsuwa antə kəl ni ndləɓəla ahar Addar, ka shinardzi atar Karka,

⁴ka təra adzə Azmon, ka ləɓəla ka mnya Zərkər Masar, ka ra data akwa Manda Meditereniya. Ngəni an kəla Yahuda na təbwar anəm.

⁵Antə kəl na abwar raghəi tsuwa baɗita adzə Manda Una, har ka mwari adzə mnya Thlyagha Jodan. Antə kəl na abwar yala tsuwa baɗita ata mnya Manda Una ni, ata vəi tə Thlyagha Jodan ni ra pungkərdzi aka manda ni.

⁶Antə kəlari na abwar yala ni ləmta akwa Beth Hogla, ka ləbwar yalar Beth Araba, ka ləmta akwa Pelar Bohan, Bohan na ɓzər Ruben.

⁷Anda antə kəl ni thlata, ka təra akwa Mular Akor, ka ləmta ahar Debir, ka shinardzi abwar yala, ka mwari ahar Gilgal, na awul Lakur ndləɓəla ahar Adummim, na abwar anəmər Mular ni. Antə tsa ləkəma ka mwari akwa yimər Enshemesh, ka ləɓəla ahar Enrogel.

⁸Baɗita azi tsuwa antə kəl ni ləmta akwa Mular Ɓzər Hinnom, akwa bwar anəmər ləghəyir bərniyir mjir Yebusi, watau Urushalima. Antə kəl ni baɗita anda tsuwa ka ləmta akwa kəra gar təbwar ramta ka Mular Hinnom, akwa datər bwar yalar Mular mjir Refa.

⁹Antə kəl ni thlata anda akwa kər gar ni ka mwari adzə Vəi Kucirkilar Neftowa, ka ləɓəla akwa bərniyayeri na adzə Gar Efron, ka jaktə shinardzi təbwar Baala, na an Kiriyath Yeyarim.

¹⁰Antə kəl ni ɗengidzi təbwar ramtər Baala, ka mwari adzə Gar Seyir, ka ləbwar yalar Gar Yeyarim, watau Kesalon, ka ləghəi akwa Beth Shemesh, ka ra təramta adzə Timna.

¹¹Antə kəl ni ləɓəla ka mwari ata kusar gar na abwar yalar Ekron, ka ɗengidzi təbwar Shikkeron, ka təramta adzə Gar Baala, ka mwari ahar Yabneyel, ka ra data ata mnya Manda Meditereniya.

¹²Kəl na abwar ramta tsuwa an tsu mnya Manda Meditereniya ni. Ngəni an kəl na kalaktə mjir nyarmbwar Yahuda kəga mjir kutakəyir ɗa.

¹³Apatə MTHLAKU ku tsawa aka Joshuwa antə Joshuwa ku hamta bwadukwa tsəɗiyir Yahuda ni aka Kaleb na ɓzər Yefunne. Antə Joshuwa ku na alari bərni Arba, natə tsa an Hebron ni. Tsuwa Arba ni an kəkar Anak.

¹⁴Antə Kaleb ku kədləɓəla mjir nyarmbwar Anak makər kazhar Hebron, watau mjir kutakəyir Sheshai, ka Ahiman, ka kutakəyir Talmai.

¹⁵Antə Kaleb thlata anda ka ra dlər mjir kutadi Debir, di tə mda ana kəga thləmari abbər Kiriyath Sefer.

¹⁶Antə Kaleb pəla, “Kəlara mdə na ku mzhi səm Kiriyath Sefer akwa mpa, I ata hamta alari ngkwarna Aksa ka tsa ndzi mwalankiɗa.”

¹⁷Antə Othniyel na ɓzər Kenaz, ɓzərma Kaleb, ku səm di ni. Antə Kaleb ku hamta alari ngkwarni Aksa tə tsa ndzi mwalankiɗa.

¹⁸Aghəla saka laga, antə mwala ni mwari adzə Othniyel ka pəla alari abbər kalkal ka tsa na Othniyel ni ra yuta ala ɗa bəbal akəla baba'ni. Təng vir laga Aksa mwari ra thlawar baba'ni, antə sakatə tsa akwa səghəi ata kwararni ni, təng baba'ni Kaleb ni yu ni abbər, “Damitədzi aɗi bi?”

¹⁹Antə ngkwa ni pəla, “I akwa bara dlara akəla ga. Təng tə ga ku mwantə ra akwa tsəɗi Negev na kula yimi ni, dlar ra ka gə pakta ali ka bwar kucirkila tsu bu.” Antə Kaleb ku na alari bwar kucirkilayeri na amta ka na aghəi.

²⁰Ngəni an bwar tsəɗi natə mdə hamta ni kifa aka kutakəyayeri na akwa nyarmbwar Yahuda.

²¹Bərniyayeri tə mdə na aka mjir nyarmbwar Yahuda na ciju ta shang abwar anəm, təbwar kəla ɗa ka tsəɗi Edom, an Kabzeyel, ka Eder, ka Yagur,

²²ka Kina, ka Dimona, ka Adada,

²³ka Kedesh, ka Hazor, ka Ithnan,

²⁴ka Zif, ka Telem, ka Beyaloth,

²⁵ka Hazor Hadatta, ka Keriyoth Hezron natə tsa an Hazor,

²⁶ka Amam, ka Shema, ka Molada,

²⁷ka Hazar Gadda, ka Heshmon, ka Bethpelet,

²⁸ka Hazar Shuwal, ka Beyersheba, ka Biziyothliya,

²⁹ka Baala, ka Iyim, ka Ezem,

³⁰ka Eltolad, ka Kesil, ka Horma,

³¹ka Zigklag, ka Madmanna, ka Sansanna,

³²ka Lebawoth, ka Shilhim, ka Ayin, ka tsuwa Rimmon. Antə hangkur shanga bərniyayeri ni an sərkumari ka əmdla, ka diyayeri na kalaktə ɗa.

³³Bərniyayeri na ata kusar garayeri an Eshtawol, ka Zora, ka Ashna,

³⁴ka Zanowa, ka Engannim, ka Tappuwa, ka Enam

³⁵ka Yarmuth, ka Adullam, ka Soko, ka Azeka,

³⁶ka Shaarayim, ka Adithlayim, ka Gedera, ka tsuwa Gederothlayim. Antə hangkur shanga bərniyayeri ni an kumnya nfwar, ka diyayeri na kalaktə ɗa.

³⁷Tsuwa damwa na aɗi an Zena, ka Hadasha, ka Migdalgad,

³⁸ka Dileyan, ka Mizpa, ka Yokthleyel

³⁹ka Lakish, ka Bozkath, ka Eglon,

⁴⁰ka Kabbon, ka Lamam, ka Kitlish,

⁴¹ka Gederoth, ka Bethdagon, ka Naama, ka tsuwa Makkeda. Antə hangkur shanga bərniyayeri ni an kumnya ngkwa, ka diyayeri na kalaktə ɗa.

⁴²Tsuwa damwa na aɗi an Libna, ka Ethler, ka Ashan,

⁴³ka Ifta, ka Ashna, ka Nezib,

⁴⁴ka Keyila, ka Akzib, ka tsuwa Maresha. Antə hangkur shanga bərniyayeri ni an əmdla, ka diyayeri na kalaktə ɗa.

⁴⁵Tsuwa damwa na aɗi an Ekron ka bərniyayeri kəga diyayeri na kalaktə ni,

⁴⁶ka shanga bərniyayeri kəga diyayeri na kudzəhə ka Ashdod, baɗita adzə Ekron ka mwari ata mnya Manda Meditereniya,

⁴⁷ka Ashdod ka bərniyayeri kəga diyayeri na kalaktə ni, ka Gaza ka bərniyayeri kəga diyayeri na kalaktə ni, har ka mwanta adzə mnya mular Masar ka tsuwa mnya Manda Meditereniya.

⁴⁸Tsuwa bərniyayeri na akwa bwar garayeri an Shamir, ka Yattir, ka Soko,

⁴⁹ka Danna, ka Kiriyath Sefer natə tsa an Debir,

⁵⁰ka Anap, ka Eshtemowa, ka Anim,

⁵¹ka Goshen, ka tsuwa Holon ka Gilo. Antə hangkur shanga bərniyayeri ni an kum ka ntang, ka diyayeri na kalaktə ɗa.

⁵²Tsuwa diyayeri damwa na aɗi an Arab, ka Duma, ka Eshan,

⁵³ka Yanim, ka Beth Tappuwa, ka Afeka,

⁵⁴ka Humta, ka Hebron, ka tsuwa Ziyor. Antə hangkur shanga bərniyayeri ni an əmdla, ka diyayeri na kalaktə ɗa.

⁵⁵Tsuwa diyayeri damwa na aɗi an Mawon, ka Karmel, ka Zif, ka Yutta,

⁵⁶ka Yezireyel, ka Yokdeyam, ka Zanowa,

⁵⁷ka Kayin, ka Gibeya, ka tsuwa Timna. Antə hangkur shanga bərniyayeri ni an kuma, ka diyayeri na kalaktə ɗa.

⁵⁸Tsuwa diyayeri damwa na aɗi an Halhul, ka Bethzur, ka Gedor,

⁵⁹ka Maarath, ka Bethlanoth, ka tsuwa Eltekon. Antə hangkur shanga bərniyayeri ni an ngkwa, ka diyayeri na kalaktə ɗa.

⁶⁰Tsuwa diyayeri damwa na aɗi an Kiriyath Baal natə tsu tsa an Kiriyath Yeyarim ni, ka Rabba. Da bərniyayeri suɗa, ka diyayeri na kalaktə ɗa.

⁶¹Tsuwa bərniyayeri damwa aɗi na akwa mtakəu, natə da an Beth Araba, ka Middin, ka Sekaka,

⁶²ka Nibshan, ka Di Una, ka tsuwa Engedi. Antə hangkur shanga bərniyayeri ni an ngkwa, ka diyayeri na kalaktə ɗa.

⁶³Amma mjir Yahuda aɗi mzhi kədləɓəla mjir Yebusi na ka ndzi akwa Urushalima wa. Antə har ba ashina mjir Yebusi tsu aɗi akwa Urushalima ata kəma duku kəga mjir Yahuda.