Read bura-pabir Joshuwa 16 Bible Online

Joshuwa 16 - bura-pabir bible

Joshuwa 16

¹Kəla bwar tsəɗi tə mdə na aka mjir nyarmbwar Yusuf an baɗita adzə Thlyagha Jodan kudzəhə ka Yariko, təbwar raghəi ka vəi kucirkilar Yariko, ka mwari akwa mtakəu. Tsa thlata akwa Yariko ka ləmta akwa tsəɗi garayeri, har ka mzhitə Bethlel.

²Antə kəl ni thlata akwa Bethlel, ka təramta ka mwari akwa Luz, ka təramta ka mwari akwa bwar mjir Arki akwa Ataroth.

³Anda antə kəl ni ləghəi təbwar ramta, ka mwari akwa nca mjir Yafleti, har ka mwari adzə kəla Beth Horon na aghəi, ka ləmta akwa Gezer, ka ra data ata Manda Meditereniya.

⁴Antə nyarmbwar Yusuf, watau nyarmbwar Manasse ka Ifrayim ni, ku dlu tsəɗi ngəni apa kifər ɗa ka ndzi mthlakari.

⁵Ngəni an bwar tsəɗiyir mjir nyarmbwar Ifrayim tə da ndəkəi ata kutakəi ata kutakəi. Kəla tsəɗiyir ɗa baɗita akwa Ataroth Addar ka mwari təbwar raghəi, ka ləmta akwa Beth Horon na Amta,

⁶ka mwari ata mnya Manda Meditereniya. Antə kəl na təbwar yala baɗita ata Manda Meditereniya ka mwari təbwar raghəi, ka mwari abwar yalar Mikmethlath, ka ɗengidzi təbwar raghəi akwa mwari abwar Taanath Shilo, ka təramta abwar raghəi akwa ləhar Yanowa.

⁷Thlatərni akwa Yanowa, antə kəl ni ləghəi akwa Ataroth ka Naara, ka tsadza aka Yariko, ka mwari ka ləɓəla akwa Jodan.

⁸Antə kəl ni baɗita ahar Tappuwa tsuwa, ka mwari təbwar ramta, ka pu akwa mnya Zərkər Kana, ka ra data ata mnya Manda Meditereniya. Ngəni an bwar tsəɗi tə mdə hamta ni kifa aka nyarmbwar Ifrayim, ata kutakəi ata kutakəi.

⁹Tsuwa bwar tsəɗiyir ɗa ni ku paktə ka shanga bərniyayeri kəga diyayeri natə mdə pwi kamnyar mjir nyarmbwar Ifrayim akwa nca bwar kifa tə mdə na aka mjir nyarmbwar Manasse.

¹⁰Amma mjir Ifrayim ni aɗi kədləɓəla mjir Kanana na akwa Gezer wa. Antə apani mjir Kanana ku ndzəndzi akwa nca mjir Ifrayim har ba ashina. Amma mjir Kanana ni akwa hara kəthlər ala ɗa apa mafayeri.