Read bura-pabir Joshuwa 17 Bible Online

Joshuwa 17 - bura-pabir bible

Joshuwa 17

¹Antə mdə hamta aka nyarmbwar Manasse, ɓzər sal na yarakəmar Yusuf, bwar kifər tsəɗiyirni. Makir na baba' Gileyad tsuwa an ɓzər sal na yarakəmar Manasse. Antə təng tə Makir ni mdə na katsala akwa mpa, mdə ku hamta alari Gileyad ka Bashan na abwar raghəi ka Jodan.

²Antə mdə ndəkəi aka mambila mjir nyarmbwar Manasse ni bwar kifər tsəɗiyir ɗa abwar ramta ka Jodan. Tsuwa mdə ku ndəkəi bwa ni kutakəi kutakəi, watau aka kutakəyir Abiyezer, ka Helek, ka Asriyel, ka Shekem, ka Hefer, ka tsuwa Shemida. Da an mambila maɗashilər Manasse na ɓzər Yusuf, atar kutakəyayeri arɗa.

³Ar Zelofehad na ɓzər Hefer, na ɓzər Gileyad, na ɓzər Makir, na ɓzər Manasse, tsa aɗi ka maɗashili wa, tar maɗangkwi daci. Antə thləma maɗa'ni na maɗangkwi ni an Mala, ka Nuhu, ka Hogla, Milka ka Tirza.

⁴Antə da mwari adzə Eleyazar na prist, ka Joshuwa na ɓzər Nun, ka mji ol'ol ni, ka pəla, “MTHLAKU ku tsawa aka Musa ka tsa na ala yeru bwar kifər tsəɗi na ata ndzi ar yeru, tsu apatə mdə ku na aka darshayeri ar yeru.” Antə Joshuwa ku hamta ala ɗa bwar kifər tsəɗi na ata ndzi arɗa, tsu apatə mdə ku hamta aka darshayeri arɗa, kalkal apatə MTHLAKU ku tsawa.

⁵Apani antə Manasse ku wutə bwar tsəɗi pal pal kuma, zhar ka Gileyad, ka Bashan na abwar raghəi ka Jodan.

⁶Kamnyar tə kəkayeri arni na mwanki ku dlu bwar kifər tsəɗi arɗa tsu apatə kəkayeri arni na maɗashili ku dluwa. Antə mdə ku hamta tsəɗi Gileyad aka mambila mjir nyarmbwar Manasse.

⁷Antə kəla tsəɗiyir mjir nyarmbwar Manasse baɗita akwa Asher ka mwari akwa Mikmethlath na abwar raghəi ka Shekem. Tə kəl ni baɗita ahar Shekem tsuwa antə tsa nu təbwar anəm akwa vəi tə mjir Entappuwa ka ndzi.

⁸Antə bwar tsəɗi Tappuwa ku ndzi akwa tsiya mjir Manasse, amma di Tappuwa ka kərni akwa tsiya mjir Ifrayim.

⁹Antə kəl ni ku ləghəi akwa Zərkər Kana. Antə diyayeri na abwar anəm ka zərkə ni an ar Ifrayim, wala tə da akwa bwar Manasse. Antə kəla bwar tsəɗiyir Manasse tsuwa ku nu abwar yalar zərkə ni ka ra data ata mnya Manda Meditereniya.

¹⁰Bwar tsəɗi na abwar anəm an ar Ifrayim, antə bwar tsəɗi na abwar yala an ar Manasse. Antə kəla ɗa na abwar ramta an ata Manda Meditereniya. Bwar yala ar tsəɗiyir Manasse tsuwa an bwa tə mdə hamta aka mjir nyarmbwar Asher, ka tsəɗiyir mjir Issakar təbwar raghəi ka da.

¹¹Akwa kuta bwar tsəɗiyir Issakar ka Asher tsuwa mdə ku hamta diyayeri ngəni aka Manasse, watau Beth Shan ka diyayeri na kalaktə ni, ka Ibleyam ka diyayeri na kalaktə ni, ka mjir Dor ka diyayeri na kalaktə ɗa, ka mjir Endor ka diyayeri na kalaktə ɗa, ka mjir Taanak ka diyayeri na kalaktə ɗa, ka mjir Megiddo ka diyayeri na kalaktə ɗa. Na makərkur an Nafoth Dor.

¹²Amma mjir Manasse aɗi mzhi kədləɓəla mji na akwa bərniyayeri ngəni wa, antə mjir Kanana ku ləkəma ka ndzəndzi akwa diyayeri ngəni.

¹³Wala sakatə mjir Israila wutə duna, da aɗi kədləɓəla shanga mjir Kanana wa, amma da pu ɗa ka da hara ala ɗa kəthlər ar dwalikur.

¹⁴Vir laga kəkayeri ar Yusuf mwari adzə Joshuwa ka pəla alari abbər, “Kamnyar mə tə gə na ala yeru bwa duku daci akwa tsəɗi nə ri? Nggədza yeru ka mji hang kamnyar MTHLAKU ku vədza ala yeru barka!”

¹⁵Antə Joshuwa shinau ala ɗa abbər, “Ma giri hang kamta, tsuwa ma har bwar garayeri na akwa tsəɗi Ifrayim ni ku hara ala giri raka kamta, to ka giri ləmta akwa kuɓər nfwa, ka giri jaɓumta vəi ni aka kəra giri, ka giri wutə bəbal akwa tsəɗiyir mjir Perizzi ka mjir Refa.”

¹⁶Antə kəkayeri ar Yusuf ni pəla, “Tsəɗi gar ni amzhi yeru wa. Tsuwa yeru amzhi ləghəi akwa kuta bəbal na akwa mular ni wa. Kamnyar shanga mjir Kanana na anda akwa Beth Shan ka diyayeri na kalaktə ɗa, kəga mji na akwa Mular Yezireyel ni, shang ka wagənayeri ar taku tə mdə nam ka liya.”

¹⁷Antə Joshuwa pəla aka mjir kutakəyir Yusuf, watau aka nyarmbwayeri ar Ifrayim ka Manasse na abwar ramta abbər, “Jiri giri hang ka duna, tsuwa giri mji na ka duna swaiswai. Giri aɗi ata ndzi ka bwa duku daci wa.

¹⁸Bwar tsəɗi garayeri ni ata ndzi ar giri, wala tə kulini kuɓər nfwa ku hartə ni. Antə jaɓumta gir kuɓər nfu ni har ka mwanta akwa mnyari, ka giri tsarəmta, ka tsa ndzi ar giri. Tsuwa wala tə mjir Kanana ni ɓəɓal ka duna, tsuwa da ka wagənayeri ar taku tə mdə nam ka liya ni, giri ata kədləɓəla ɗa.”