Read bura-pabir Joshuwa 18 Bible Online

Joshuwa 18 - bura-pabir bible

Joshuwa 18

¹Aghəla tə da ku səm tsəɗi ni akwa mpa, antə shanga mjir Israila ku tsaptədzi akwa Shilo ka latə Tentər Kəɓa ka Hyel anda.

²Amma ba kulini nyarmbwayeri pal pal murfa ku mbili akwa Israila natə da aɗi dlu bwar tsəɗiyir ɗa katagu wa.

³Antə Joshuwa pəla aka mjir Israila abbər, “Nawa antə giri ata sə dlu bwar tsəɗi tə MTHLAKU na Hyelər kəkayeri ar giri hamta ala giri nə ri?

⁴Carɓəla giri ali mji makər akwa kəlara nyarmbwa. Antə I ata thlentə ɗa ka da ra dlarhə shanga tsəɗi ni, ka da rəbutə shanga su na ata kəra tsəɗi ni ka laku tə mda ata ndəkəi tsəɗi ni akwa nca nyarmbwayeri ni, ka da ngka adzə ra.

⁵Antə giri na mjir wul tsəɗi ni ata ndəkəi tsəɗi ni ka bwa murfa. Ar mjir nyarmbwar Yahuda, da ata ndzi tsu akwa bwar tsəɗiyir ɗa abwar anəm, ka mjir kutakəyir Yusuf ndzi tsu akwa bwar tsəɗiyir ɗa abwar yala.

⁶Aghəla tə giri ku rəbwamta shanga su na ata kəra bwayeri ngəni murfə ni, ka giri sənta ali labar tə giri rəbutə ni. Antə I ata ndzəha ala giri kuriya ata kəra ɗa akəma MTHLAKU na Hyelər mburu.

⁷Amma mjir Lawi na akwa nca giri aɗi ata wutə nəɓwar ɗa wa, kamnyar kəthlər pristkur aka MTHLAKU an bwar kifər ɗa. Tsuwa mjir nyarmbwar Gad, ka ar Ruben, ka ar Manasse na abwar raghəi, shang ku kurtə dlu bwar tsəɗiyir ɗa, natə Musa na mafar MTHLAKU hamta ala ɗa abwar raghəi ka Jodan ni.”

⁸Sakatə mji ni akwa psi laku kamnyar ka da ra ngkərɓəla tsəɗi ni, antə Joshuwa jaktə pəla ala ɗa abbər, “Mwar giri, ka giri dlarhə shanga tsəɗi ni, ka giri ngkərɓəla, ka rəbwamta shanga su na ata kər. Aghəla nda ka giri ngka adzə ra. Antə azi akəma MTHLAKU akwa Shilo, I ata ndzəha ala giri kuriya ata kər.”

⁹Antə mji ni ku mwari ka dlarhə shanga tsəɗi ni. Antə da ngkərɓəla laku tə da ndəkəi shanga tsəɗi ni ka bwa murfa akwa kakaɗu, ka rəbutə hangkur diyayeri na akwa kəlara bwa ata ata. Antə da jaktə ngka adzə Joshuwa akwa vəi fəliyir ɗa ahar Shilo.

¹⁰Antə Joshuwa ku ndzəha ala ɗa kuriya ata kər akəma MTHLAKU ahar Shilo. Anda antə Joshuwa ku ndəkɓəla tsəɗi ni aka mambila mjir nyarmbwar Israila, tə kəlara nyarmbwa ku wutə bwar kifərni.

¹¹Antə nyarmbwa na ntangkəma na dlu bwar tsəɗiyirni akəla Joshuwa an nyarmbwar Benjamin. Tsəɗiyirni an akwa daɓwa bwar nyarmbwar Yahuda ka bwar nyarmbwar Yusuf.

¹²Abwar yala tsuwa kəla ɗa ni baɗita akwa Thlyagha Jodan, ka mwari akwa ləghəi na abwar yalar Yariko, ka ləmta akwa bwar garayeri na abwar ramta, har ka mwari akwa Mtakər Beth Aven.

¹³Tə kəl ni thlata anda antə tsa mwari akwa ləghəi na abwar anəmər Luz, watau Bethlel, ka ləghəi akwa Ataroth Addar, ka nu kər gar na abwar anəmər Beth Horon na aghəi.

¹⁴Tə kəl ni thlata anda tsuwa antə tsa thlentə kəmari abwa damwa, ka ra shinardzi təbwar ramta, ka ra data akwa Kiriyath Baal, watau Kiriyath Yeyarim, pal akwa nca diyayeri ar mjir nyarmbwar Yahuda. Ngəni an kəla ɗa na abwar ramta.

¹⁵Antə kəl na abwar anəm ni tsuwa baɗita akwa hildiyir Kiriyath Yeyarim təbwar ramta, ka mwari akwa bwar raghəi ahar Efron, akwa vəi kucirkilar Neftowa.

¹⁶Antə kəl ni ləghəi ata kusar gar na awul Mular Hinnom, akwa datər mular na akwa yalar Refa. Antə tsa ləghəi akwa Mular Hinnom, ka nu təbwar anəm ka bərniyir mjir Yebusi, ka təra ləghəi abwar Enrogel.

¹⁷Antə kəl ni ɗengidzi təbwar yala, ka mwari təbwar Enshemesh, ka ləkəma ka mwari ahar Geliloth, na akwa wul Vəi Pəra ka ləhar Adummim, ka ləghəi akwa Pela Bohan. Bohan an ɓzər Ruben.

¹⁸Antə kəl ni təra abwar yalar Beth Araba, ka ləkəma ka ləghəi akwa Mular Jodan.

¹⁹Antə kəl na abwar anəm ni təra ka mwari, ka ləghəi abwar yalar Beth Hogla, ka ra data akwa vəi kəɓar Manda Una na abwar yala, akwa vəi tə Thlyagha Jodan tsangkər alari. Ngəni an kəl na abwar anəm.

²⁰Antə Thlyagha Jodan ni an datər kəl na abwar raghəi. Nayeri ni an kəla bwar tsəɗi tə mdə hamta aka mjir nyarmbwar Benjamin.

²¹Antə bərniyayeri na ndzi aka mjir kutakəyir nyarmbwar Benjamin an Yariko, ka Beth Hogla, ka Emek Keziz,

²²ka Beth Araba, ka Zemarayim, ka Bethlel,

²³ka Avvim, ka Para, ka Ofra,

²⁴ka Kefar Ammoni, ka Ofni, ka tsuwa Geba. Antə hangkur shanga bərniyayeri ni an kumnya suɗa, ka diyayeri na kalaktə ɗa.

²⁵Diyayeri damwa na aɗi an Gibeyon, ka Rama, Beyeroth,

²⁶ka Mizpa, ka Kefira, ka Moza,

²⁷ka Rekem, ka Irpeyel, ka Tarala,

²⁸ka Zela, ka Hayelef, ka Yebusi natə tsa an Urushalima, ka Gibeya, ka tsuwa Kiriyath Yeyarim. Antə hangkur shanga bərniyayeri ni an kumnya nfwar, ka diyayeri na kalaktə ɗa. Ngəni an bwar tsəɗi tə mdə na aka mjir nyarmbwar Benjamin ata kutakəi ata kutakəi.