Read bura-pabir Joshuwa 19 Bible Online

Joshuwa 19 - bura-pabir bible

Joshuwa 19

¹Nyarmbwa na suɗkur na dlu bwar tsəɗiyirni akəla Joshuwa an nyarmbwar Simeyon. Antə tsəɗiyirni an ata ɗəffa tsəɗi tə mdə hamta aka mjir nyarmbwar Yahuda.

²Antə bwar tsəɗiyir ɗa ku paktə ka Beyersheba, ka Sheba, ka Molada,

³ka Hazar Shuwal, ka Bala, ka Ezem,

⁴ka Eltolad, ka Bethlul, ka Horma,

⁵ka Zigklag, ka Beth Markaboth, ka Hazar Susa,

⁶ka Beth Lebawoth, ka tsuwa Sharuhen. Antə hangkur shanga bərniyayeri ni an kumnya makər, ka diyayeri na kalaktə ɗa.

⁷Diyayeri damwa na aɗi an Ayin, ka Rimmon, ka Ethler, ka Ashan. Antə hangkur shanga bərniyayeri ni an nfwar, ka diyayeri na kalaktə ɗa,

⁸har ka mwari akwa Baalath Beyer, natə tsa an Rama na akwa Negev ni. Ngəni an bwar tsəɗi tə mdə hamta aka kutakəyayeri na akwa nyarmbwar Simeyon.

⁹Mdə thlaɓəla bwar tsəɗiyir mjir nyarmbwar Simeyon akwa kuta bwar tsəɗiyir mjir Yahuda, kamnyar bwa tə mdə thli aka mjir Yahuda ni ku hara ol kamta. Antə mjir nyarmbwar Simeyon ku wutə bwar tsəɗiyir ɗa ata ɗəffa tsəɗiyir mjir nyarmbwar Yahuda.

¹⁰Nyarmbwa na makərkur na dlu bwar tsəɗiyirni akəla Joshuwa an nyarmbwar Zebulun. Antə tsəɗi tə Joshuwa hamta alari ku təra ciju har ka mzhitə bərni Sarid.

¹¹Tə kəl ni baɗita anda tsuwa antə tsa nu bwar ramta, ka mwari ahar Marala, har ka tsəkwar Dabbesheth, ka ləkəma har ka mzhitə zərkə na abwar raghəi ka Yokneyam.

¹²Akwa bwa damwa ar Sarid ni, kəl ni ɗengidzi ka mwari təbwar raghəi adzə kəla Kisloth Tabor, ka ləkəma ka mwari ahar Daberath, ka ləmta ahar Yafiya.

¹³Baɗita anda tsuwa antə kəl ni ləkəma təbwar raghəi ka mwari ahar Gath Hefer, ka Ethkazin, ka ɗengidzi abwar Neya ka ra ləɓəla ahar Rimmon.

¹⁴Tsuwa abwanda abwar yala ni, kəl ni ɗengidzi ka mwari abwar Hannathlon, ka ra data akwa Mular Iftahel.

¹⁵Antə bwar tsəɗiyir mjir nyarmbwar Zebulun ku paktə ka Kattath, ka Nahalal, ka Shimron, ka Idala, ka tsuwa Bethlelehem. Antə hangkur shanga bərniyayeri ni an kumnya suɗa, ka diyayeri na kalaktə ɗa.

¹⁶Nayeri ni an bərniyayeri kəga diyayeri natə Joshuwa hamta aka mjir nyarmbwar Zebulun.

¹⁷Nyarmbwa na nfwarkur na dlu bwar tsəɗiyirni akəla Joshuwa an nyarmbwar Issakar.

¹⁸Bərniyayeri na akwa bwar tsəɗiyirni ku paktə ka Yezireyel, ka Kesulloth, ka Shunem,

¹⁹ka Hafarayim, ka Shiyon, ka Anaharath,

²⁰ka Rabbith, ka Kishiyon, ka Ebez

²¹ka Remeth, ka Engannim, ka Enhadda, ka tsuwa Bethpazzez.

²²Antə kəla bwar tsəɗiyirni ku mwari har adzə Tabor, ka Shahazuma, ka Beth Shemesh, ka ra data akwa Jodan. Antə hangkur shanga bərniyayeri ni an kumnya ngkwa, ka diyayeri na kalaktə ɗa.

²³Nayeri ni an bərniyayeri kəga diyayeri natə Joshuwa hamta aka mjir nyarmbwar Issakar.

²⁴Nyarmbwa na ntəfkur na dlu bwar tsəɗiyirni akəla Joshuwa an nyarmbwar Asher.

²⁵Antə bwar tsəɗiyirni ku paktə ka Helkath, ka Hali, ka Beten, ka Akshaf,

²⁶ka Allam Melek, ka Amad, ka tsuwa Mishal. Tsuwa kəla tsəɗi ni ku mwari abwar ramta ka tsəkwar Karmel har ka mwanta adzə Shihor Libnath.

²⁷Anda antə tsa ɗengidzi təbwar raghəi, ka mwari ahar Bethdagon, har ka tsadza aka Zebulun ka Mular Iftahel təbwar yalar Bethlemek ka Neyiyel. Antə kəl ni ku ləkəma abwar yala ka mwari ahar Kabul,

²⁸ka Ebron, ka Rehob, ka Hammon, ka tsuwa Kana, har ka pudza aka Sidon na Ola.

²⁹Anda tsuwa antə kəl ni ɗengidzi ka mwari təbwar Rama, ka Taya bərni na akwa məciɓa, ka ɗengidzi anda ka mwari atar Hosa, ka ra data ata mnya Manda Meditereniya, akwa bwar Akzib,

³⁰ka Umma, ka Afek, ka Rehob. Antə hangkur shanga bərniyayeri ni an sərkumari ka suɗa, ka diyayeri na kalaktə ɗa.

³¹Nayeri ni an bərniyayeri ka diyayeri natə Joshuwa hamta aka mjir nyarmbwar Asher.

³²Nyarmbwa na ngkwakur na dlu bwar tsəɗiyirni akəla Joshuwa an nyarmbwar Naftali.

³³Antə kəla tsəɗiyirni baɗita ahar Helef adzə nfur ok na akwa Zaanannim, ka mwari akwa Adaminekeb, ka Yabneyel, har ka mwari ahar Lakkum, ka ra data akwa Thlyagha Jodan.

³⁴Anda antə kəl ni ɗengidzi təbwar ramta ka mwari ahar Aznoth Tabor, ka mwari akwa Hukok, har ka tsadza aka Zebulun abwar anəm, ka Asher abwar ramta, ka Yahuda abwar raghəi ka Jodan.

³⁵Antə bərniyayeri arni na akwa katangga ni an Ziddim, ka Zer, ka Hammath, ka Rakkath, ka Kinnereth,

³⁶ka Adama, ka Rama, ka Hazor,

³⁷ka Kedesh, ka Edrai, ka Enhazor,

³⁸ka Yiron ka Migdalel, ka Horem, ka Bethlanath, ka Beth Shemesh. Antə hangkur shanga bərniyayeri ni an kumnya əmdla, ka diyayeri na kalaktə ɗa.

³⁹Nayeri ni an bərniyayeri kəga diyayeri natə Joshuwa hamta aka mjir nyarmbwar Naftali.

⁴⁰Nyarmbwa na murfəkur na dlu bwar tsəɗiyirni akəla Joshuwa an nyarmbwar Dan.

⁴¹Antə bwar tsəɗiyirni ku paktə ka Zora, ka Eshtawol, ka Irshemesh,

⁴²ka Shaalabin, ka Ayalon, ka Ithla,

⁴³ka Elon, ka Timna, ka Ekron,

⁴⁴ka Elteke, ka Gibbethlon, ka Baalath,

⁴⁵ka Yehud, ka Beneberak, ka Gathrimmon

⁴⁶ka Mejarkon, ka Rakkon, ka paktə ka bwa na kalaktə Yoppa.

⁴⁷Amma mjir nyarmbwar Dan aɗi mzhi dlu bwar tsəɗiyir ɗa wa, antə da təra ka ra dlər Leshem ka səm ni. Da tsəgəi mjir di ni ka katsakar, ka dlutsə di ni, ka ndzəndzi akwa, ka pali thləma di ni tə tsa ndzi Dan ata vəya Leshem. Da vəɓəla thləma kəkar ɗa na waci Dan.

⁴⁸Nayeri ni an bərniyayeri kəga diyayeri natə Joshuwa hamta aka mjir nyarmbwar Dan.

⁴⁹Sakatə mjir Israila ku kuri ndəkəmta mambila bwayeri na akwa tsəɗi ni, antə mjir Israila hamta aka Joshuwa na ɓzər Nun bwa laga akwa tsəɗi ni,

⁵⁰tsu apatə MTHLAKU ku tsawa. Da hamta alari bərni natə tsa yuwa, watau Timnath Sera na akwa tsəɗi gar ar Ifrayim. Antə tsa jaktə namtə bərni ni ka ndzəndzi akwa.

⁵¹Nayeri ni an bwayeri natə Eleyazar na prist, ka Joshuwa na ɓzər Nun, ka mji na ol'olər Israila, ku ndəkəmta atar ndzəh kuriya ahar Shilo akəma MTHLAKU, anyarmbwar Tentər Kəɓa. Akwa laku ngəni antə da kuri ndəkəmta tsəɗi ni.