Read bura-pabir Joshuwa 2 Bible Online

Joshuwa 2 - bura-pabir bible

Joshuwa 2

¹Antə Joshuwa na ɓzər Nun thlentə mjir wul ashir suɗa na thlata ahar Shittim, ka tsawa ala ɗa abbər, “Mwar giri, ka giri wulɓəla ashira tsəɗi ni, na olari kuta Yariko.” Antə da ku təra mwari. Sakatə da mzhitə bərni ni, antə da pəra akwa kəyir karwa laga ka thləmari Rahab, ka pi anda vir nda.

²Təng mdə laga nggatə su ata kəra səyir ɗa ni, ka mwari ka pəla aka kuthlir Yariko abbər, “Mjir Israila laga ku si azi aviri kamnyar wul ashira tsəɗi ni.”

³Antə kuthlir Yariko thlentə kuraku aka Rahab abbər, “Səɓəla ka mji ngəni na aharngkiri ni, kamnyar da si sə wul ashira shanga tsəɗi ni.”

⁴Amma mwala ni ku ɗuwamta mji ngəni suɗə ni. Antə tsa pəla, “I, jiri, mji laga ku si azi nangna, amma I aɗi səndə vəi tə da thlata ata wa.

⁵Tahaku, akəmata mda hartə nyarfur bərni ni, antə da təra, tsuwa I aɗi səndə vəi tə da ata mwari ata wa. Amma ma giri nu ghəla ɗa taktar, nuhum giri ata kəli ɗa.”

⁶Amma Rahab ku kurtə mwantə mjir wul ashira tsəɗi ni ata kəra mbwa, ka ɗuwamta ɗa akira udzəm nggaɓi tə tsa pwi ata kəra mbwa ni.

⁷Antə mjir kuthli ni ku ləɓəla təkəma akwa nu dəlpa mjir wul ashira tsəɗi ni har ka mzhitə vəi fəlɓəla Thlyagha Jodan. Tsuwa təkəma tə mjir kuthli ləɓəla antə mdə hartə nyarfu ni.

⁸Akəmata mjir wul ashira tsəɗi ni aləmbwa ka pəpəi aviri vir nda, Rahab ləmta adzə ɗa ata kəra mbwa ni

⁹ka pəla ala ɗa abbər, “I asənda abbər MTHLAKU ku hamta ala giri tsəɗi ngəni. Antə shanga mji na akwa tsəɗi ni akwa thlivər giri, tsuwa shanga mjir tsəɗi ni ku yakata.

¹⁰Kamnyar yeru ku nggatə labarər laku tə MTHLAKU vu tə Manda Duwathlu ulantədzi akəma giri, sakatə giri akwa səɓəla akwa Masar. Tsuwa yeru ku nggatə labarər laku tə giri tsəgəi Sihon ka Og, kuthlyayeri na suɗa ar mjir Amor, na abwar raghəi ka Jodan.

¹¹Sakatə yeru ku nggatə labar ni, təng təkəma hyala yeru nthlə yeru ka duna. Dza yeru mtə shatu, har tə mda aɗi na amzhi nggitə bara giri ka mpa wa, kamnyar MTHLAKU na Hyelər giri an Hyel na amtazi ka na aghəyazi akwa duniya.

¹²Antə kulini, ka giri kahyel ali akwa thləma MTHLAKU, abbər apatə I ku hara ala giri mdəkur, ka giri hara mdəkur aka mjir kutakəyir baba'na, tsuwa ka giri ni seɗa na ata hara kəi mbərsatə giri.

¹³Hara gir ali alkawal abbər giri ata zhar baba'na, ka mamana, kəga maɗama'na shili ka mwanki, ka shanga kutakəyayeri arɗa shang ka mpika. Giri aɗi ata zhar ka mdə tsəgəi ɗa wa.”

¹⁴Antə mji ni pəla alari, “Mpika yeru an mpika ga! Ma ga aɗi ngkər su na səntə yeru wa, yeru akwa hara alkawal ala ga abbər ma sakatə MTHLAKU ku hamta ala yeru tsəɗi ni, yeru ata hara ɓɗakkur ala ga.”

¹⁵Rahab akwa ndzi akwa mbwa tə mdə paktə hən ɗa ka banggwar katanggar di ni. Antə tsa kəthlər ka səwu ka haɓəla mji ni ata windau.

¹⁶Mwala ni pəla ala ɗa, “Mwar giri akwa garayeri, ta mjir kuthli ni asə wutə giri. Ka giri ɗuwardzi anda mnyar vir makər, har tar ma da ku ngka antə giri ata təra.”

¹⁷Antə mji ni pəla alari, “Yeru ata kəsi alkawal tə gə vu yeru hara ala gə ni.

¹⁸Nggədza su tə ga ata harari ma vir tə yeru ku səkwa tsəɗi ni. Ka gə mbwi səwu ngəni mamza ni akwa windau, səwu natə gə haɓəla yeru ata ni. Ka gə səntə baba' nga, ka mama' nga, ka maɗama' nga, ka shanga mjir kutakəyayeri arɗa shang avəyarngkiri.

¹⁹Kəlara mdə na ku ləɓəla akwa kutadi, bikər mtərni ata ndzi ata kərari, aɗi ata kəra yeru wa. Amma kəlara mdə na ku ndzi tsu avəyarngkiri, tə su laga ku dəkəi ni, bikari ata ndzi ar yeru.

²⁰Amma ma ga ku ngkər su na səntə yeru azi aka mda, yeru aɗi ata ɓəlatə alkawal tə yeru kəta ala gə ni wa.”

²¹Antə mwala ni pəla, “Ka Hyel hara ka giri hara apatə giri pəla.” Antə tsa salamtə ɗa tə da təra. Aghəla nda antə tsa mbwau səwu na mamza ni akwa windau ni.

²²Antə mjir wul ashir ni ku təra mwari akwa garayeri ka ɗuwamtadzi mnyar vir makər. Antə mjir kuthli na akwa pakə ɗa ni ku ləkəma akwa pakə ɗa akwa kəlara bwa akwa tsəɗi ni, amma da aɗi wutə ɗa wa, antə da ku ngka kula wutə ɗa.

²³Aghəla nda antə mji ngəni suɗə ni ku səghəi kazhar kəra garayeri ni, ka fəlɓəla thlyagha, ka mwari adzə Joshuwa, ka jikata alari shanga su na wutə ɗa.

²⁴Da pəla aka Joshuwa, “Yeru ku hamta jiri abbər MTHLAKU ku kurtə ka hamta shanga tsəɗi ni ala mburu, kamnyar shanga mjir tsəɗi ni akwa thlivər mburu.”