Read bura-pabir Joshuwa 21 Bible Online

Joshuwa 21 - bura-pabir bible

Joshuwa 21

¹Vir laga mji ol'ola na akwa nyarmbwar Lawi mwari adzə Eleyazar na prist, ka Joshuwa na ɓzər Nun, ka mambila mji na ol'ola akwa nyarmbwayeri ar Israila.

²Da gari ala ɗa ahar Shilo akwa tsəɗi Kanana abbər, “MTHLAKU ku tsawa aka Musa abbər ka mdə na ala yeru diyayeri tə yeru ata ndzi akwa, ka shanga vəi ɓəla na kalaktə ɗa kamnyar mwaɓiyayeri ar yeru.”

³Antə apatə MTHLAKU ku tsawa, antə akwa bwayeri tə mjir Israila kəgari, mjir Israila ni ku na aka mjir Lawi ni diyayeri laga ka vəi ɓəla arɗa akwa.

⁴Antə mjir Lawi na ntangkəma tə mdə hamta ala ɗa bwar ɗa an mjir kutakəyir Kohath. Antə mdə ku hamta aka mjir Lawi ngəni na akwa nyarmbwar Haruna na prist ni diyayeri pal pal kumnya makər. Mdə thlaɓəla ala ɗa akwa bwar mjir nyarmbwayeri ar Yahuda, ka Simeyon, ka Benjamin.

⁵Antə mdə hamta aka mambila mjir kutakəyir Kohath ni diyayeri pal pal kuma, natə mdə thlaɓəla ɗa akwa bwar mjir nyarmbwayeri ar Ifrayim, ka Dan, ka tsuwa Manasse na abwar ramta.

⁶Tsuwa mdə ku hamta aka mjir kutakəyir Gershon diyayeri pal pal kumnya makər, natə mdə thlaɓəla akwa bwar mjir nyarmbwayeri ar Issakar, ka Asher, ka Naftali, ka Manasse na abwar raghəi.

⁷Mdə ku hamta aka mjir kutakəyir Merari diyayeri pal pal kumnya suɗa, natə mdə thlaɓəla akwa bwar mjir nyarmbwayeri ar Ruben, ka Gad, ka Zebulun.

⁸Apani antə mjir Israila ku hamta aka mjir Lawi diyayeri ngəni kəga vəi ɓəla kamnyar mwaɓiyayeri arɗa, kalkal apatə MTHLAKU ku tsawa aka Musa.

⁹Akwa bwar mjir nyarmbwar Yahuda, ka Simeyon antə mdə thlaɓəla diyayeri ngəni tə mdə kamnya thləma ɗa ni.

¹⁰Mdə hamta diyayeri ngəni aka kəkayeri ar Haruna na akwa kutakəyir Kohath na akwa nyarmbwar Lawi, kamnyar da an mji na ntangkəma tə mdə hamta ala ɗa bwar ɗa.

¹¹Antə mdə ku hamta ala ɗa Kiriyath Arba, natə tsa an Hebron ni, akwa bwar garayeri ar Yahuda, ka shanga vəi ɓəla na kalaktə ɗa. Tsuwa Arba an kəkar Anak.

¹²Amma mambila mnya mtakə na ata hildi, ka diyayeri na kalaktə bərni ni, mdə hamta ɗa aka Kaleb na ɓzər Yefunne ka tsa an ndzi mthlakari.

¹³Antə nayeri ni an bərniyayeri ka mnya mtakər ɗa tə mdə hamta aka mjir nyarmbwar Haruna na prist. Da an Hebron natə tsa an diyir ɗuwardzi ar mdə na ku tsi mda, ka vəi ɓəlarni, ka Libna ka vəi ɓəlarni,

¹⁴ka Yattir ka vəi ɓəlarni, ka Eshtemowa ka vəi ɓəlarni,

¹⁵ka Holon ka vəi ɓəlarni, ka Debir ka vəi ɓəlarni,

¹⁶ka Ayin ka vəi ɓəlarni, ka Yutta ka vəi ɓəlarni, ka tsuwa Beth Shemesh ka vəi ɓəlarni. Antə hangkur shanga bərniyayeri ni an əmdla antə mdə thlaɓəla akwa bwar mjir nyarmbwar Yahuda ka Simeyon.

¹⁷Tsuwa akwa bwar mjir nyarmbwar Benjamin mdə ku thlaɓəla ala ɗa bərniyayeri pal pal nfwar, natə da an Gibeyon ka vəi ɓəlarni, ka Geba ka vəi ɓəlarni,

¹⁸ka Anathloth ka vəi ɓəlarni, ka Almon ka vəi ɓəlarni.

¹⁹Antə hangkur bərniyayeri tə mdə hamta aka pristayeri, natə da an mjir nyarmbwar Haruna, bərniyayeri pal pal kumnya makər kəga vəi ɓəlar ɗa.

²⁰Antə mambila mjir kutakəyir Kohath na akwa nyarmbwar Lawi tsuwa, mdə thlaɓəla ala ɗa bwar ɗa akwa bwar mjir nyarmbwar Ifrayim.

²¹Mdə thlaɓəla bərniyayeri nfwar akwa bwar garayeri ar mjir nyarmbwar Ifrayim, ka hamta ala ɗa. Bərniyayeri ngəni nfwar ni an Shekem, natə tsa an di ɗuwardzər mdə na ku kar ka tsi mda, ka vəi ɓəlarni na akwa bwar garayeri ar Ifrayim, ka Gezer ka vəi ɓəlarni,

²²ka Kibzayim ka vəi ɓəlarni, ka tsuwa Beth Horon ka vəi ɓəlarni.

²³Tsuwa mdə ku thlaɓəla bərniyayeri nfwar akwa bwar mjir nyarmbwar Dan, ka hamta ala ɗa. Bərniyayeri ngəni nfwar ni an Elteke ka vəi ɓəlarni, ka Gibbethlon ka vəi ɓəlarni,

²⁴ka Ayalon ka vəi ɓəlarni, ka Gathrimmon ka vəi ɓəlarni.

²⁵Tsuwa mdə ku thlaɓəla bərniyayeri suɗa akwa bwar mjir nyarmbwar Manasse na abwar ramta, ka hamta ala ɗa. Bərniyayeri ngəni suɗə ni an Taanak ka vəi ɓəlarni, ka Gathrimmon ka vəi ɓəlarni.

²⁶Antə hangkur bərniyayeri kəga vəi ɓəlar ɗa tə mdə hamta aka mjir kutakəyir Kohath ni an bərniyayeri pal pal kuma, kəga vəi ɓəlar ɗa.

²⁷Kutakəi damwa na akwa nyarmbwar Lawi na dlu bwar ɗa an kutakəyir Gershon. Antə akwa bwar mjir nyarmbwar Manasse na abwar raghəi mdə ku thlaɓəla ala ɗa bərniyayeri suɗa. Bərniyayeri ngəni suɗə ni an Golan na akwa Bashan na pal akwa diyayeri ar ɗuwardzər mdə na ku kar ka tsi mda, ka vəi ɓəlarni, ka Beyeshtera ka vəi ɓəlarni.

²⁸Tsuwa mdə ku thlaɓəla bərniyayeri nfwar akwa kuta bwar mjir nyarmbwar Issakar ka hamta ala ɗa. Bərniyayeri ngəni nfwar ni an Kishiyon ka vəi ɓəlarni, ka Daberath ka vəi ɓəlarni,

²⁹ka Yarmuth ka vəi ɓəlarni, ka Engannim ka vəi ɓəlarni.

³⁰Tsuwa mdə ku thlaɓəla bərniyayeri nfwar akwa kuta bwar mjir nyarmbwar Asher, ka hamta ala ɗa. Bərniyayeri ngəni nfwar ni an Mishal ka vəi ɓəlarni, ka Abdon ka vəi ɓəlarni,

³¹ka Helkath ka vəi ɓəlarni, ka tsuwa Rehob ka vəi ɓəlarni.

³²Akwa tsəɗi Naftali mdə ku thlaɓəla ala ɗa bərniyayeri makər, natə da an Kadesh na akwa Galili, na pal akwa nca diyayeri ar ɗuwardzər mdə na ku kar ka tsi mda, ka vəi ɓəlarni, ka Hammoth Dor ka vəi ɓəlarni, ka tsuwa Kartan ka vəi ɓəlarni.

³³Antə shanga bərniyayeri natə mdə hamta aka mjir kutakəyir Gershon ni an bərniyayeri pal pal kumnya makər, kəga vəi ɓəlar ɗa

³⁴Tsuwa mdə ku hamta bərniyayeri aka mambila kutakəi na akwa nyarmbwar Lawi, watau kutakəyir Merari. Akwa bwar mjir nyarmbwar Zebulun, mdə thlaɓəla ala ɗa bərniyayeri nfwar, natə da an Yokneyam ka vəi ɓəlarni, ka Karta ka vəi ɓəlarni,

³⁵ka Dimna ka vəi ɓəlarni, ka tsuwa Nahalal ka vəi ɓəlarni.

³⁶Akwa bwar mjir nyarmbwar Ruben, mdə ku thlaɓəla ala ɗa bərniyayeri nfwar, natə da an Bezer ka vəi ɓəlarni, ka Yahaz ka vəi ɓəlarni,

³⁷ka Kedemoth ka vəi ɓəlarni, ka tsuwa Mefaath ka vəi ɓəlarni.

³⁸Akwa bwar mjir nyarmbwar Gad, mdə ku thlaɓəla ala ɗa bərniyayeri nfwar, natə da an Ramoth Gileyad, di na pal akwa nca diyayeri ar ɗuwardzər mdə na ku kar ka tsi mda, ka vəi ɓəlarni, ka Mahanayim ka vəi ɓəlarni,

³⁹ka Heshbon ka vəi ɓəlarni, ka tsuwa Yazer ka vəi ɓəlarni.

⁴⁰Antə shanga bərniyayeri tə mdə hamta aka mjir kutakəyir Merari na mbila akwa nyarmbwar Lawi ni an bərniyayeri kumnya suɗa.

⁴¹Antə shanga bərniyayeri tə mjir Israila hamta aka mjir nyarmbwar Lawi an bərniyayeri pal pal nfwarkumari ka ncisu, kəga vəi ɓəlayeri arɗa.

⁴²Kəlara pal akwa nca bərniyayeri ni ka vəi ɓəla na kalaktə ni.

⁴³Apani antə MTHLAKU ku hamta aka mjir Israila shanga tsəɗi tə tsa kahyel ar hamtari aka kəkayeri arɗa. Sakatə da ku dlutsə tsəɗi ni, antə da ku ndzəndzi akwa.

⁴⁴Antə MTHLAKU ku hara tə shambar ku fyara ɗa akwa kəlara bwa, apatə tsa ku hara alkawalari aka kəkayeri arɗa. Mda aɗi wala pal akwa nca dawayeri arɗa na ku mzhi thləthlata akəma ɗa wa, kamnyar tə MTHLAKU ku hamta shanga dawayeri arɗa akwa tsiya ɗa.

⁴⁵Su aɗi wala pal akwa nca shanga suayeri tə MTHLAKU kəta ala ɗa alkawalər harari aka mjir Israila, kula tsa haratə wa.