Read bura-pabir Joshuwa 22 Bible Online

Joshuwa 22 - bura-pabir bible

Joshuwa 22

¹Antə Joshuwa ku kəga mjir nyarmbwar Ruben, ka mjir nyarmbwar Gad, ka tsuwa mjir nyarmbwar Manasse na abwar raghəi,

²ka pəla ala ɗa, “Giri ku hara shanga su tə Musa na mafar MTHLAKU ku tsawa, tsuwa giri ku kələngkər aka shanga su tə I tsawa ala giri.

³Kamnyar akwa shanga virayeri na təramta har ka vədza aka ashina, giri aɗi ɗar zhar maɗama' giri wa. Amma giri ku hara su tə MTHLAKU na Hyelər giri tsawa ala giri abbər ka giri hara.

⁴Antə kulini MTHLAKU na Hyelər giri ku vu tə shambar ku fyarar maɗama' giri, apatə tsa ku hara alkawalari. Antə kulini ngka giri akwa kəyayeri ar giri, akwa tsəɗi tə Musa na mafar MTHLAKU ku hamta ala giri aɓəla bwanda Thlyagha Jodan.

⁵Ka giri wuta abbər giri ku ɓəlatə tsawayeri ka shanga suayeri natə Musa na mafar MTHLAKU ku thlipa ala giri. Ka giri hir MTHLAKU na Hyelər giri, ka giri mwa akwa lakurni, ka ɓəlatə tsawayeri arni. Ka giri kələngkər alari ka jirkur, ka hara kəthlər alari ka ɗəffa giri shang, ka mpika giri shang tsuwa.”

⁶Antə Joshuwa ku vədza ala ɗa barka, ka salamtə ɗa, antə da ku ngka akwa kəyayeri arɗa.

⁷Tsuwa Musa ku kurtə ka hamta aka pala retar mjir nyarmbwar Manasse ni bwar tsəɗi na akwa Bashan. Aka bwadukwa retar nyarmbwa ni tsuwa, Joshuwa ku hamta ala ɗa bwar tsəɗi ata kəma duku kəga maɗama' ɗa na abwar ramta ka Jodan ni. Tsuwa akwa sakatə Joshuwa salamtə ɗa ka da ngka avəi ni, tsa vədza ala ɗa barka

⁸abbər, “Ka giri ngka avəi akwa kəyayeri ar giri ka gəna hang, ka mwaɓiyayeri hang, kəga adzərfa, kəga dinar, kəga əmza, ka liya mənggəl, kəga ləptayeri hang! Ka giri ndəkəi kəga maɗama' giri shanga su tə giri fata akəla dawayeri ar giri ni.”

⁹Antə mjir nyarmbwar Ruben, ka na ar Gad, ka tsuwa nyarmbwar Manasse na abwar raghəi ni shang ku ngka akwa kəyayeri arɗa. Da təra kazhar mambila mjir Israila akwa Shilo akwa tsəɗi Kanana, ka ngka akwa Gileyad, tsəɗiyir kəra ɗa tə da dluwa, apatə MTHLAKU ku tsawa ala ɗa atar Musa.

¹⁰Sakatə mjir nyarmbwar Ruben, ka mjir nyarmbwar Gad, ka mjir nyarmbwar Manasse na abwar raghəi, ku mzhitə Geliloth, kudzəhə ka Thlyagha Jodan, akwa tsəɗi Kanana, antə da həntə bagaɗi na ola anda ata mnya Jodan ni.

¹¹Sakatə mambila mjir Israila nggatə labar ni antə da pəla abbər, “Wul giri su nggwa! Mjir nyarmbwar Ruben, ka mjir nyarmbwar Gad, ka mjir nyarmbwar Manasse na abwar raghəi, ku həntə bagaɗi akwa Geliloth, kudzəhə ka Thlyagha Jodan, akwa kəla tsəɗi Kanana, akwa bwar yeru na mjir Israila.”

¹²Sakatə mjir Israila nggatə labar ngəni, antə shanga ɗa tsaptədzi ahar Shilo, kamnyar ka da ra dlər ɗa.

¹³Antə mjir Israila ni thlentə Finehas na ɓzər Eleyazar na prist ni adzə mjir nyarmbwar Ruben, ka mjir nyarmbwar Gad, ka mjir nyarmbwar Manasse na abwar raghəi akwa tsəɗi Gileyad.

¹⁴Antə mji ol'ola kuma ku paktə təra ata kəma duku ka Finehas, kəlara pal akwa nca ɗa akwa wakiltə nyarmbwa pal akwa Israila. Kamnyar kəlara mdə pal akwa nca ɗa an olər nyarmbwar ɗa, akwa nyarmbwayeri na akwa Israila.

¹⁵Antə sakatə da ku mzhitə tsəɗi Gileyad, adzə mjir Ruben, ka mjir Gad, ka mjir Manasse na abwar raghəi ni, antə da pəla ala ɗa,

¹⁶“Nggədza su tə shanga mjir MTHLAKU pəla, ‘Man hara tə giri ata səm mdəkur ar Hyelər Israila apani ri? Kamnyar mə tə giri ata hara kər ɓəɓalkur apani ri, tə giri ku zhar nu MTHLAKU, ka həntə bagaɗi ngəni aka kəra giri ni?

¹⁷Shang biku tə giri hara ahar Peyor ni aɗi mzhi mburu apani wa ya? Ai, giri ka səndari abbər har ba kulini mburu aɗi kəcimtadzi karkar akwa dlu watsəɓər biku ndagə wa, wala tə aghəla nda shilku na ɗimi ku si ata kəra mburu, na mjirni ni.

¹⁸Antə ata kəra ngəni, giri ata shinamtadzi kazhar nu MTHLAKU nə ya? Diya ma giri ku hara kər ɓəɓalkur aka MTHLAKU ashina, ɗəpa ɗəffari ata ɓza adzə shanga mjir Israila.

¹⁹Ma giri an wuta abbər tsəɗi tə giri dlu ni aɗi ɓɗaku kamnyar vəngkər səli wa, səɓəla giri azi akwa vəi tə Tentər MTHLAKU aɗi ni, ka giri wutə vəi ndzəndzi akwa nca yeru. Təng giri aɗiya thlentə hangkala MTHLAKU wa, wala thlentə hangkala yeru abbər giri ata həntə bagaɗi damwa zum ka na ar MTHLAKU na Hyelər mburu ni wa.

²⁰Ɗangtə gir su na hara sakatə Akan na ɓzər Zera ndzi kula jirkur, ka fatə suayeri tə mdə pəla mda aɗiya tsəkwar wa ni bu. Ai ɗəffə bwarbwarkur ar MTHLAKU ku səghəi ata kəra shanga mjir Israila! Ai aɗi tsa shini an mtə kamnyar bikərni ni wa.’ ”

²¹Antə mjir nyarmbwar Ruben, ka mjir nyarmbwar Gad, ka tsuwa mjir nyarmbwar Manasse na abwar raghəi, shinau aka mji ol'olər nyarmbwayeri ni abbər,

²²“MTHLAKU an Hyel na ka Duna ta Shang! MTHLAKU an Hyel na ka Duna ta Shang! Tsa asəndə su na hara tə yeru hara ngəni! Tsuwa yeru akwa bara ka giri na mjir Israila sənda! Ma ngəni an kər ɓəɓalkur wala səm mdəkur tə yeru hara aka MTHLAKU, giri aɗiya zhar yeru ka mpikə wa!

²³Ma yeru an həntə bagaɗiyir hamta saɗaka ngəni abbər ka yeru zhar nu MTHLAKU, wala ma yeru an hara kamnyar ka yeru hamta saɗaka mbamba, wala saɗakar mthli, wala saɗakar jakə mwardzi, to ka MTHLAKU ka kərari surni ɗi yeru!

²⁴Ai yeru hara apani ni nggwa diya kamnyar hwi su na akəmazi, ta nuhum vir laga kəkayeri ar giri asə yu kəkayeri ar yeru abbər, ‘Man paktə giri ka MTHLAKU na Hyelər Israila ri?

²⁵Kamnyar MTHLAKU ku vəi Thlyagha Jodan ka tsa ndəkəmta daɓwa mburu kəga giri. Antə giri na mjir Ruben ka mjir Gad, su aɗi na paktə giri ka MTHLAKU wa.’ Apani kəkayeri ar giri ata sə ngkatə kəkayeri ar yeru ta da avəngkər səli aka MTHLAKU.

²⁶Kamnyar ta su asə hara apani antə yeru pəla kuji ka yeru ɗəmhədzi, ka yeru həntə bagaɗi ngəni ni, amma aɗi kamnyar hamta saɗaka mbamba wala saɗaka laga wa.

²⁷Dzamər yeru an ka tsa ndzi seɗa akwa daɓwa yeru kəga giri akwa zamanayeri hang na akəmazi, abbər wala yeru, yeru ana vəngkər səli aka MTHLAKU akwa Vəi Ndzəndziyirni na Ɓɗakkarkara, ka hamta saɗaka mbamba, ka saɗakar jakə mwardzi, ka mambila saɗakayeri shang. Antə yeru hara apani ni ta kəkayeri ar giri asə pəla aka kəkayeri ar yeru abbər, ‘Giri aɗi ka nəɓwa akəla MTHLAKU wa.’

²⁸Yeru pəla abbər, ma mdə laga ku sə yu yeru apani, wala yu kəkayeri ar yeru, yeru ata pəla alari, ‘Wul giri dludzər bagaɗiyir MTHLAKU tə kəkayeri ar yeru həntə ni. Da aɗi hara kamnyar hamta saɗaka, wala saɗaka mbamba wa, amma kamnyar ka tsa ndzi seɗa akwa daɓwa mjir yeru ka mjir giri.’

²⁹Ka Hyel ngkatə ta yeru ahara kər ɓəɓalkur aka MTHLAKU, wala shinamtadzi kazhar nu MTHLAKU ashina, atar həntə bagaɗi kamnyar hamta saɗaka mbamba, wala saɗakar mthli, wala saɗaka damwa ata kər, zum ta bagaɗiyir hamta saɗakar MTHLAKU na Hyelər mburu na akəma Tentərni ni.”

³⁰Sakatə Finehas na prist, ka mji ol'olər mjir Israila, watau mji kuma na ol'olər nyarmbwayeri na akwa Israila ni, ku nggatə su tə mjir Ruben, ka mjir Gad, ka mjir Manasse na abwar raghəi ni ku pəla, antə ɗəffa ɗa ku ndzi msəra ala ɗa.

³¹Antə Finehas na ɓzər Eleyazar na prist pəla aka mjir Ruben, ka mjir Gad, ka mjir Manasse ni abbər, “Ashina yeru ku sənda abbər MTHLAKU adzə mburu, kamnyar giri aɗi ndzi kula jirkur aka MTHLAKU akwa su ngəni wa. Kulini giri ku msərantə mjir Israila akwa tsiya MTHLAKU.”

³²Antə Finehas na ɓzər Eleyazar, na prist ni, ka mji ol'ol ni ku təra kazhar mjir Ruben, ka mjir Gad akwa tsəɗi Gileyad, ka ngka akwa tsəɗi Kanana adzə mjir Israila, ka jikata ala ɗa ndər ni.

³³Antə mjir Israila tsuwa ku nggatə msərakur ndər ni, ka hu Hyel. Tsuwa da aɗi jaktə gari ata kəra mwari ra dlər ɗa kəra wa, abbər ka da ɓdləmta tsəɗi tə mjir Ruben ka mjir Gad ndzəndzi akwa ni kəra wa.

³⁴Antə mjir Ruben ka mjir Gad vətə thləma bagaɗi ni abbər Seɗa, kamnyar da pəla abbər, “Bagaɗi ngəni an seɗa akwa daɓwa mburu kəga da, abbər MTHLAKU an Hyel.”