Read bura-pabir Joshuwa 23 Bible Online

Joshuwa 23 - bura-pabir bible

Joshuwa 23

¹Antə MTHLAKU ku hara tə shambar ku fyarar mjir Israila akwa mpayeri kəga dawayeri arɗa na kalaktə ɗa. Da ku fəi kula ləkwa mpa. Antə Joshuwa ku hali, tsuwa məvari ku hara hang.

²Antə Joshuwa ku kəga shanga mjir Israila, ka mji na ol'olər ɗa, ka alkaliyayeri, ka mji na ol'olər sojayeri arɗa, ka pəla ala ɗa, “Kulini I ku hali, məvəi ku hara hang.

³Giri ka kəra giri ku wutə shanga su tə MTHLAKU na Hyelər giri ku hara aka shanga tsəɗiyayeri ngəni kamnyar giri, kamnyar MTHLAKU na Hyelər giri an mpa kamnyar giri.

⁴Nggədza I ku ndəkəmta bwar tsəɗiyir mji na mbil ni aka nyarmbwayeri ar giri, ata kəma duku ka shanga tsəɗiyir mji tə I ku səm ɗa akwa mpa, watau baɗita akwa Thlyagha Jodan ka mwari ata mnya Manda Meditereniya na abwar ramta.

⁵Antə MTHLAKU na Hyelər giri surni an ata hara ka shanga mjir tsəɗi ni hwi giri, ka tsa kədləmta ɗa kazhar tsəɗi ni. Antə giri ata səm ɗa akwa mpa, ka giri dlutsə tsəɗiyir ɗa, apatə MTHLAKU na Hyelər giri ku hara alkawalari ala giri.

⁶Antə ka giri ntsətədzi ka duna, ka giri vədzə hangkal, ka giri ɓəlatə shanga su tə mdə ku rəbuta akwa Kakaɗər Tsawur Musa. Giri aɗiya shinardzi təbwa mazəm wala təbwa matsəkar wa.

⁷Tsuwa giri aɗiya paktə kər kəga mambila durayeri na akwa nca giri ni wa, wala kamnya thləma haptayeri arɗa wa, wala kahyel ka thləma ɗa wa. Giri aɗiya vəngkər səli ala ɗa wa, wala zuzuri ala ɗa wa.

⁸Ata vəya ngəni, ka giri ndzi ka jirkur aka MTHLAKU apatə giri ku hara har ka vədza aka ashina.

⁹Kamnyar MTHLAKU ku kədləɓəla durayeri na ol'ola tsuwa na ka duna akəma giri, natə ba ashina mdər mzhi nca kuleng ala giri aɗi wa.

¹⁰Kəlara mdə pal akwa nca giri ata mzhi titiləmta mji dəpu, kamnyar MTHLAKU na Hyelər giri an akwa mpa kamnyar giri, apatə tsa ku hara alkawalari.

¹¹Antə ka giri hara hangkal swaiswai, ka giri hir MTHLAKU na Hyelər giri.

¹²Kamnyar ma giri ku shinamtadzi, ka paktədzi kəga durayeri na mbila akwa nca giri ni, ka kəldzi kəga da,

¹³to, ka giri mbərsa abbər MTHLAKU na Hyelər giri aɗi ata ləkəma ka kədləmta ala giri mji ngəni kəra wa. Ata vəyari, tsa ata namtə ɗa ka da ndzi apa shiwa ka dərku ala giri, wala apa purpu ata hila giri, wala mtəhəra akwa nca giri. Antə su ngəni ata ləkəma har tar ma giri ku kuri karkar kazhar tsəɗi ngəni ɓɗaku tə MTHLAKU hamta ala giri ni.

¹⁴Kulini aɗi ata fəi wa, I ata mta, apatə ku ndzi dwali aka kəlara mdə na ka mpika. Tsuwa kəlara mda akwa nca giri ku sənda akwa ɗəffari ka kərari abbər MTHLAKU na Hyelər giri ku hamta ala giri shanga su na ɓɗaku tə tsa hara alkawalari. Kəlara alkawal tə tsa hara ala giri tsa ku nghyaɓəla, aɗi wala duku kula tsa nghyaɓəla wa.

¹⁵Antə tsu apatə tsa ku nghyaɓəla kəlara alkawal ar su na ɓɗaku tə tsa hara ala giri ni, tsu apani tsuwa antə MTHLAKU ata sənta ala giri su na ɗimi tə tsa ku hara ala giri alkawalari, har tar ma tsa ku kurəmta giri shang karkar kazhar tsəɗi ngəni ɓɗaku tə tsa na giri ni.

¹⁶Ma giri ku ɓəli alkawal ngəni tə giri kəta aka MTHLAKU na Hyelər giri ni, tə giri təra ka ra vəngkər səli aka haptayeri, ka zuzuri akəma ɗa, to, ɗəffə bwarbwarkur ar MTHLAKU ata thlata ata kəra giri. Antə aɗi ata fəi wa giri ata kurəmtadzi kazhar tsəɗi ngəni ɓɗaku tə tsa na giri ni.”