Read bura-pabir Joshuwa 24 Bible Online

Joshuwa 24 - bura-pabir bible

Joshuwa 24

¹Antə Joshuwa tsaptə shanga mji na akwa nyarmbwayeri ar Israila ni ata kəma duku ahar Shekem. Antə tsa kəgatə mji ol'ola, ka mjir pwara, ka alkaliyayeri, ka mji na ol'olər sojayeri, antə da si akəma Hyel.

²Antə Joshuwa pəla aka shanga mji ni abbər, “Nggədza su tə MTHLAKU na Hyelər Israila pəla, ‘Waci waci kəkayeri ar giri, watau Tera na baba' Ibrahim ka Nahor, ku ndzəndzi aɓəla bwanda Thlyagha Yufiretis, ka vəngkər səli aka haptayeri.

³Antə I kətə kəkar giri Ibrahim akwa tsəɗi na aɓəla bwanda Thlyagha Yufiretis ni, ka pwar ni akwa shanga tsəɗi Kanana. Tsuwa I ku hara tə kəkayeri arni ku hara hang. I ku na alari Ishaku.

⁴Tsuwa I ku na aka Ishaku Yakub ka Isuwa. Tsuwa I ku hamta tsəɗi garayeri ar Edom aka Isuwa ka tsa ndzi arni. Amma kəkar giri Yakub kəga maɗa'ni ku ləghəi ahar Masar.

⁵Aghəla nda antə I ku thlentə Musa ka Haruna ka da ra dlar kəkayeri ar giri. Antə I thlentə bwani na mwavər akwa Masar atar suayeri tə I hara akwa kutari. Aghəla nda antə I fwaɓəla giri.

⁶Antə I fwaɓəla kəkayeri ar giri akwa Masar. Antə mjir Masar ku nu kəkayeri ar giri ka wagən takwayeri kəga mjir fəl taku har ka mwari akwa Manda Duwathlu.

⁷Antə mjir giri ku tuwa ali kəi dlar ɗa, antə I vu kuthlu akwa daɓwa ɗa kəga mjir Masar, ka hara tə Manda ni ku hartə mjir Masar ni. Tsuwa giri ku wutə ka nca giri su tə I hara aka mjir Masar ni. Antə giri ku ndzi akwa mtakəu ka fəi.

⁸Antə I səntə giri akwa tsəɗiyir mjir Amor, na ndzi abwar raghəi ka Jodan. Da ku dlər giri, amma I ku hamta ɗa akwa tsiya giri. I ku kurəmta ɗa akəma giri, antə giri ku dlutsə tsəɗiyir ɗa.

⁹Antə Balak na ɓzər Zippor, na kuthlir Mowab ku thlatə ka dlər giri na mjir Israila. Tsa thlentə ka mdə kəga alari Balaam na ɓzər Beyor, ka tsa sə shuwumta giri.

¹⁰Amma I aɗi psi thləm aka Balaam wa, antə tsa ku ləkəma ka vədza ala giri barka. Apani antə I ku msərantə giri akəla Balak.

¹¹Antə sakatə giri fəlɓəla Jodan, ka mwari akwa Yariko, mjir Yariko ni ku dlər giri, apatə mjir Amor, ka mjir Perizzi, ka mjir Kanana, ka mjir Hitti, ka mjir Yebusi ku dlər giri. Amma I ku hamta ɗa akwa tsiya giri.

¹²Tsuwa təng akəmata giri asi, I ku thlentə pwasəma gali na ku kədləɓəla ala giri kuthlyayeri suɗa ar mjir Amor. Aɗi atar katsakarər giri wala laliyir giri antə giri səm ɗa akwa mpa ni wa.

¹³I ku hamta ala giri tsəɗi natə giri aɗi ghəra ata kər wa, ka na giri bərniyayeri natə aɗi giri an nthlə ɗa wa. Kulini giri akwa ndzəndzi akwa, tsuwa giri akwa səm yar nfur anap ka ar zaitun natə aɗi giri an nci wa.’ ”

¹⁴Antə Joshuwa ləkəma ka pəla, “Antə kulini, ka giri thlivər ɗəffa MTHLAKU, ka giri nu ni ka jirkur. Ka giri pumta haptayeri natə kəkayeri ar giri na waci nuwa aɓəla bwanda Thlyagha Yufiretis ka akwa Masar ni, ka giri vəngkər səli aka MTHLAKU shini.

¹⁵Amma ma aɗi kəskəra giri ka giri vəngkər səli aka MTHLAKU wa, to, ashina ka giri carɓəla mdə tə giri ata vəngkər səli alari. Ma giri hir ka giri vəngkər səli aka haptayeri natə kəkayeri ar giri ku vəngkər səli ala ɗa aɓəla bwanda Thlyagha Yufiretis, wala aka haptayeri ar mjir Amor natə giri akwa ndzəndzi akwa tsəɗiyir ɗa. Amma arna ka mjir kutakəyirna, MTHLAKU antə yeru ata vəngkər səli alari.”

¹⁶Antə mji ni shinau ka pəla, “Ka Hyel ngkatə ta yeru azhar MTHLAKU, ka vəngkər səli aka haptayeri!

¹⁷Kamnyar MTHLAKU na Hyelər yeru an Hyel na fwaɓəla kəkayeri ar yeru akwa mafakur akwa Masar. Tsuwa tsa ku hara surndatayeri na ol'ola ata nca yeru. Tsuwa tsa an ɓəlatə yeru akwa shanga bwa tə yeru ku mwari, ka akwa shanga durayeri natə yeru təramta akwa tsəɗiyir ɗa.

¹⁸Tsuwa MTHLAKU ku kədləmta shanga mjir Amor na akwa ndzəndzi akwa tsəɗi ni akəmata yeru asi. Antə apani MTHLAKU antə yeru ata vəngkər səli alari, kamnyar tsa an Hyelər yeru.”

¹⁹Antə Joshuwa pəla aka mji ni, “Amma diya giri aɗi mzhi vəngkər səli aka MTHLAKU mai, kamnyar tsa an Hyel na ɓɗakkarkara, tsuwa tsa Hyel na ana bara hirkur na swakti akəla mda. Antə tsa aɗi ata yafitə su tə giri ku ɓzamtə wa, wala tifəmta ala giri bikər giri wa.

²⁰Antə ma giri ku shinadzə bwahili aka MTHLAKU, ka vəngkər səli aka haptər durayeri damwa, to, tsa ata shinardzi, ka sənta ala giri asarayeri. Tsa ata tsəgəi giri, wala tə tsa ku kurtə ka hara ala giri ɓɗakkur.”

²¹Antə mji ni pəla aka Joshuwa, “Aɗi apani wa! Ar yeru, MTHLAKU antə yeru ata vəngkər səli alari.”

²²Antə Joshuwa pəla ala ɗa, “Diya giri an seɗar kər giri, abbər giri ku carɓəla ka giri vəngkər səli aka MTHLAKU.” Antə da pəla, “I, yeru an seɗar kər yeru.”

²³Antə Joshuwa pəla, “To, ma apani, ka giri pumta haptər durayeri tə giri kəgari akwa nca giri ni. Ka giri hamta ɗəffa giri aka MTHLAKU na Hyelər Israila.”

²⁴Antə mji ni pəla aka Joshuwa, “Ar yeru MTHLAKU na Hyelər yeru antə yeru ata vəngkər səli alari, tsuwa yeru ata kələngkər alari.”

²⁵Antə vir nda Joshuwa ku mbwi alkawal ka mji ni ahar Shekem, tsuwa tsu anda antə tsa ɗəmha ala ɗa tsawayeri kəga suayeri natə mdə ku thlamta ka mdə hara.

²⁶Antə Joshuwa ku rəbutə tsawayeri ni akwa Kakaɗər Tsawur Hyel. Antə tsa kətə pela laga ola, ka nci akira nfur ok, kudzəhə ka Vəi na Ɓɗakkarkara ar MTHLAKU.

²⁷Antə tsa pəla aka shanga mji ni abbər, “Pela ngəni ata ndzi seɗa ata kəra mburu, kamnyar tsa ku nggatə shanga su tə MTHLAKU pəla ala mburu. Antə apani tsa ata ndzi seɗa ata kəra giri, ta giri asə thlandər aka Hyelər giri.”

²⁸Antə Joshuwa ku salamtə mji ni, tə waskəi ngka akwa bwar tsəɗiyirni.

²⁹Aghəla su nayeri ni antə Joshuwa na ɓzər Nun, na mafar MTHLAKU, ku mti sakatə tsa ka məvari aru pal ka kuma.

³⁰Antə da ku harəmta ni akwa bwar tsəɗi na arni akwa Timnath Sera na akwa tsəɗi garayeri ar Ifrayim, abwar yala ka Gar Gaash.

³¹Mjir Israila ku vəngkər səli aka MTHLAKU akwa shanga sakatə Joshuwa ka mpika, ka ləkəma kəgari akwa shanga sakar mji ol'olər ɗa na sə mta aghəlari, mji ol'ol na ku səndə shanga kəthlər tə MTHLAKU hara kamnyar mjir Israila.

³²Antə ɗethlər Yusuf tə mjir Israila fata akwa Masar ni, da səntə ka harəmta akwa Shekem, akwa bwa tə Yakub masə ka liyar adzərfa aru pal akəla maɗa' Hamor na baba' Shekem. Antə vəi ngəni ku ndzi kifər mjir nyarmbwar Yusuf.

³³Antə Eleyazar na ɓzər Haruna ku mti tsuwa, tə mdə ku harəmta ni akwa Gibeya, natə mdə hamta aka ɓzər Finehas, akwa bwar garayeri ar Ifrayim.