Read bura-pabir Joshuwa 3 Bible Online

Joshuwa 3 - bura-pabir bible

Joshuwa 3

¹Səɓəla ɗəpari antə Joshuwa ka shanga mjir Israila ku thlatə ɗəɗəpə mbing, ka zhar vəi fəliyir ɗa na akwa Shittim ni, ka mwari ata mnya Thlyagha Jodan, ka fəli anda akəmata da fəlɓəla thlyagha ni.

²Aghəla vir makər antə mji na ol'ola ata kəra kəthlər ni ləkwa kuta vəi fəli ni,

³ka pəla ala ɗa abbər, “Ma sakatə giri ku wutə pristayeri na mjir Lawi ku kətə Akwati Alkawal ar MTHLAKU na Hyelər giri, ka giri thlatə ka giri nu ɗa.

⁴Kamnyar giri aɗi ɗar səndə laku ngəni wa, antə da an ata nca ala giri laku tə giri ata nuwari. Amma giri aɗiya shahədzi kudzəhə ka Akwati Alkawal ni wa. Ka daɓwa giri ka Akwati ni ndzi cijuwa apa kilomita pal aghəla ɗa.”

⁵Antə Joshuwa pəla aka mji ni abbər, “Ka giri kəcimta kər giri, kamnyar ɗəpa MTHLAKU ata hara surndata akwa nca giri.”

⁶Antə Joshuwa pəla aka pristayeri abbər, “Kətə gir Akwati Alkawal ni ka giri pwa akəma mji ni akwa pwar ɗa.” Antə da ku kətə Akwati ni, ka pwa akəma ɗa.

⁷Antə MTHLAKU pəla aka Joshuwa, “Ashina I ata baɗitə haptə səliyir nga akəma mjir Israila, kamnyar ka da sənda abbər I ata ndzi adzə nga tsu apatə I ku ndzi adzə Musa.

⁸Ka gə pəla aka pristayeri na ana kəl Akwati Alkawal ni abbər ma sakatə da ku mzhitə mnya yimər Jodan ni, ka da ləkwa yimi ni, ka da thləthlatə tsəkəm akwa thlyagha ni.”

⁹Antə Joshuwa pəla aka mjir Israila, “Asər giri azi ka giri nggatə su tə MTHLAKU na Hyelər giri akwa pəlari.

¹⁰Nggədza laku tə giri ata sənda abbər Hyel Na ka Mpika an akwa nca giri. Tsuwa kula nuhum tsa ata kədləmta mjir Kanana, ka mjir Hitti, ka mjir Hivi, ka mjir Perizzi, ka mjir Girgashi, ka mjir Amor, ka mjir Yebusi akəma giri.

¹¹Nggədza Akwati Alkawal ar Mthlakər shanga duniya akwa təramta akəma giri ka fəlɓəla Thlyagha Jodan.

¹²Antə kulini, carɓəla gir mji kumnya suɗa, mdə pal akwa kəlara nyarmbwar mjir Israila.

¹³Antə ma sakatə pristayeri na akwa kəl Akwati Alkawal ar MTHLAKU na Mthlakər shanga duniya ni ku vu səla ɗa akwa yimər Jodan, yimər Jodan na akwa hwi səghəi ni ata thləthlatə təkəma ka tsaptədzi abwa duku.”

¹⁴Sakatə mji ni thlata akwa vəi fəliyir ɗa, abbər ka da fəlɓəla Jodan ni, antə pristayeri na akwa kəl Akwati Alkawal ni təramta akəma ɗa.

¹⁵Ngəni an sakar səvəi ka sur fakəu, sakatə Thlyagha Jodan ni ana nghyi ka yimi har ka puɓəladzi. Amma təkəma tə pristayeri na akwa kəl Akwati ni hau səla ɗa akwa mnya yimi ni,

¹⁶təng yimi na akwa hwi səghəi ni thləthlata. Tsa tsaptədzi ata vəi duku ciju apa gar, akwa di laga ka thləmari Adam, kudzəhə ka Zarethlan. Yimi na akwa hwi ka ləghəi akwa Manda Araba, natə tsa an Manda Una ni, thlamtadzi ata kəma duku. Antə mji ni fəlɓəla thlyagha ni akwa vəi laga na awul Yariko.

¹⁷Antə pristayeri na akwa kəl Akwati Alkawal ar MTHLAKU ni mwari akwa kuta Thlyagha Jodan ni ata ɗəffu, ka thləthlata ata di ul'ula, akwa sək ka shanga mjir Israila ni təramta.