Read bura-pabir Joshuwa 4 Bible Online

Joshuwa 4 - bura-pabir bible

Joshuwa 4

¹Sakatə shanga mji ku kuri fəlɓəla Thlyagha Jodan ni, antə MTHLAKU pəla aka Joshuwa,

²“Carɓəla mji kumnya suɗa akwa nca mji ngəni, mdə pal akwa kəlara nyarmbwa.

³Ka gə tsawa ala ɗa ka waskəi akwa nca ɗa na kumnya suɗə ni kətə pela na ola ata ɗəffa Thlyagha Jodan, ata vəi tə pristayeri thləthlatə ni. Pəla ala ɗa ka da fatə pelayeri ni, ka ləɓəla ka da, ka da pwi ɗa akwa vəi tə giri ata fəli ata ashina.”

⁴Antə Joshuwa ku kəga mji na kumnya suɗa tə tsa carɓəla akwa nyarmbwayeri ar Israila ni,

⁵ka pəla ala ɗa, “Mwa giri akəma Akwati Alkawal ar MTHLAKU na Hyelər giri har ka giri mzhitə ɗəffa Jodan. Ka waskəi kətə pela ata pathlahari, pela pal kamnyar kəlara nyarmbwar mjir Israila.

⁶Antə pelayeri ngəni ata ndzi ala giri seɗar ɗangta ala giri ata kəra su tə MTHLAKU ku hara. Akəmazi, ma maɗa' giri ku yuwa abbər, ‘Man karapur pela nayeri ni ala giri ri?’

⁷Ka giri pəla ala ɗa abbər yimər Thlyagha Jodan na akwa hwi ni an thlamtadzi sakatə Akwati Alkawal ar MTHLAKU akwa təramta akwa thlyagha ni. Antə ba saka madi pelayeri ngəni ata ndzi sur ɗangta aka mjir Israila.”

⁸Antə mjir Israila ku hara apatə Joshuwa ku tsawa ala ɗa. Da fatə pelayeri pal pal kumnya suɗa ata ɗəffa Jodan ni, kalkal ka hangkur nyarmbwayeri na akwa Israila, tsu apatə MTHLAKU ku tsawa aka Joshuwa. Antə da ləɓəla akwa thlyagha ni kəgari ka mwari akwa vəi tə da fəli ata, ka pwi ɗa anda.

⁹Antə Joshuwa ncigəi pelayeri damwa kumnya suɗa ata ɗəffa Jodan ni, ata vəi tə pristayeri na akwa kəl Akwati Alkawal thləthlatə ni. Antə pelayeri ngəni tsu anda har ba ashina.

¹⁰Antə pristayeri na akwa kəl Akwati ni thləthlata ata vəi duku ata ɗəffa Jodan, har tə mdə kuri shanga su tə MTHLAKU tsawa aka Joshuwa abbər ka tsa pəla aka mji ni. Hyel pəla ka Joshuwa pəla ala ɗa ka da hara kalkal apatə Musa tsawa alari. Antə mji ni ku hangkər ka ləɓəla akwa thlyagha ni.

¹¹Sakatə shanga ɗa ku ləɓəla abwanda ata mnya thlyagha ni, antə pristayeri na ka Akwati Alkawal ar MTHLAKU ni si ka təramta, ka pwa akəma ɗa apa na hwatu.

¹²Mjir nyarmbwar Ruben, ka na ar Gad, ka retar nyarmbwar Manasse na ku ɗəmhədzi kamnyar mpa, ku si ka dlu kəma akəla mji, apatə Musa pəla ala ɗa.

¹³Kudzəha ka mji dəpu nfwarkumari an ɗəmhədzi ka kari mpa, ka fəlɓəla abwanda, ka mwari akwa bəbal Yariko kamnyar mpa ni.

¹⁴Su tə MTHLAKU hara vir nda ni ku haptə səliyir Joshuwa ata nca shanga mjir Israila, antə da ku thlivər ɗəffari akwa shanga ndzəndziyir mpikari, tsu apatə da ku thlivər ɗəffa Musa.

¹⁵Antə MTHLAKU pəla aka Joshuwa

¹⁶ka tsa pəla aka pristayeri na akwa kəl Akwati Alkawal ni ka da səɓəla kazhar kuta Thlyagha Jodan ni.

¹⁷Antə Joshuwa ku tsawa aka pristayeri ni ka da səɓəla kazhar Jodan.

¹⁸Antə sakatə pristayeri na akwa kəl Akwati Alkawal ar MTHLAKU ni səɓəla akwa thlyagha ni, tə səla ɗa tsəkwar di ul'ula, təng yimi ni baɗitə hwi təkəma ka nghyantə thlyagha ni har akwa puɓəladzi ata mnyari apa na hwatu.

¹⁹Akwa vir na kumkur ar thliya na ntangkəma antə mji ni fəlɓəla Jodan, ka fəli akwa Gilgal ata kəla Yariko, təbwar raghəi.

²⁰Anda antə Joshuwa ncimta pelayeri na kumnya suɗə tə da fata akwa Jodan ni.

²¹Antə Joshuwa pəla aka mjir Israila abbər, “Akəmazi ma maɗa' giri ku sə yu giri abbər, ‘Man karapur pelayeri ngəni ala giri ri?’

²²Ka giri pəla ala ɗa abbər mjir Israila ku təramta akwa Thlyagha Jodan ata di ul'ula.”

²³Kamnyar tə MTHLAKU na Hyelər mburu vu tə yimər Thlyagha Jodan ni shuwumtadzi kamnyar mburu, har tə mburu təramta akwa ka ləɓəla, tsu apatə tsa vu tə Manda Duwathlu shuwumtadzi kamnyar ka kəkayeri ar mburu təramta ni.

²⁴Tsa hara ngəni kamnyar ka giri sənda abbər MTHLAKU an ka dunar kuthlikur, ka tsuwa kamnyar ka giri thlivər ɗəffa MTHLAKU na Hyelər giri har ba saka madi.