Read bura-pabir Joshuwa 5 Bible Online

Joshuwa 5 - bura-pabir bible

Joshuwa 5

¹Sakatə shanga kuthlyayeri ar Amor na abwar ramta ka Jodan, ka shanga kuthlyayeri ar Kanana na ata mnya Manda Meditereniya nggatə laku tə MTHLAKU shuwumta Thlyagha Jodan akwa, har tar tə mjir Israila ku təramta, antə hyala ɗa nthlə ɗa, har mda aɗi akwa nca ɗa na mbil ka dunar nggitə ndəra aka mjir Israila kəra wa.

²Tsuwa tsu akwa saka nda antə MTHLAKU pəla aka Joshuwa, “Ka gə namtə ingdlayeri ka pela jinatu, ka gə thlamta kaciya aka mjir Israila kəgari.”

³Antə Joshuwa ku namtə ingdlayeri ar pela jinatu, ka thlamta kaciya aka mji shilər Israila akwa vəi laga tə mda ana kəga Gibeyath Haaraloth, watau Gar Kaciya.

⁴Nggədza su na hara tə Joshuwa thlamta kaciya ala ɗa ni. Shanga mji shili na ku səɓəla akwa Masar, watau shanga mji na ku mzhi mwari akwa mpa ni ku mtəgəmtadzi sakatə da akwa mwa akwa mtakəu aghəla səɓəlar ɗa akwa Masar ni.

⁵Wala tə shanga mji na səɓəla akwa Masar ni ku thla kaciya, shanga mji tə mdə yaɓəla ɗa ata laku akwa mtakə ni aɗi thla kaciya wa.

⁶Kamnyar mjir Israila ku hara məva nfwarkumari akwa mwa akwa mtakəu, har tə shanga mji shili na ku mzhi ləkwa mpa, na səɓəla akwa Masar ku mtəgəi, kamnyar tə da aɗi kələngkər aka MTHLAKU wa. Da mtəgəmtadzi kamnyar MTHLAKU ku kurtə kahyel ala ɗa abbər tsa aɗi ata hamta ala ɗa tsəɗi tə tsa kahyel ar hamtari aka kəkayeri arɗa ni wa, watau tsəɗi na ɓɗaku, na ata ya su ni.

⁷Antə nayeri ni an maɗa' ɗa tə Hyel thlenta ata vəya ɗa. Da antə Joshuwa thlamta ala ɗa kaciya ni, kamnyar mda aɗi hara ala ɗa kaciya ata laku ni wa.

⁸Aghəla tə Joshuwa ku kuri thla kaciya aka shanga mji shili ni, antə da ndzəndzi tsu akwa vəi tə da fəli ata ni, har tar tə mbəlkər kaciya ni kura.

⁹Antə MTHLAKU pəla aka Joshuwa, “Ashina I ku kələmta rutə na ata kəra giri akwa Masar nda.” An su na hara tə mda ana kəga vəi ndaga Gilgal har ba ashina ni.

¹⁰Antə akwa tahakər vir na kumnya nfwarkur ar thliya ni, sakatə mjir Israila ni ku ndzəndzi akwa Gilgal akwa bəbalər Yariko, antə mjir Israila hara Kucalər Fəlɓəla Kəi ni.

¹¹Səɓəla ɗəpari aghəla vir kucali ni, an vir na ntangkəma tə da baɗitə səm sur fakər tsəɗi Kanana. Da kwasə buradi na kula yist, ka ɓɗə mthli ptsaptsa.

¹²Aghəla tə da baɗitə səm sur fakər tsəɗi nda antə manna ni thlamtadzi. Antə mjir Israila aɗi jaktə wutə manna ni kəra wa. Antə mjir Israila ni ku baɗitə səm sur fakər tsəɗi Kanana akwa saka ndaga ka ləkəma kəgari.

¹³Sakatə Joshuwa hara kudzəhə ka Yariko, tə tsa haptə ncari abbər tsa ata wul su, təng tsa wutə mdə laga athləthlata akəmari ka katsakar ntsuntsa akəlari. Antə Joshuwa mwari adzə ni ka yu ni abbər, “Gə kamnyar yeru nənga gə kamnyar dawayeri ar yeru ri?”

¹⁴Antə mdə ni shinau ka pəla, “Awa, I azi apa olər sojayeri ar MTHLAKU. An səyirna kulini ni.” Antə Joshuwa ku ndla ata di ka aduta alari, akwa pəla, “I an mafar nga, man tə ga ata bara kəi hara ala gə ri, mdərkəi?”

¹⁵Antə olər sojayeri ar MTHLAKU ni pəla alari, “Ntsui ɓaɓiyir nga, kamnyar vəi tə ga athləthlata ata ni tsa an vəi na ɓɗakkarkara.” Antə Joshuwa ku hara apatə mdə ni pəla alari.