Read bura-pabir Joshuwa 6 Bible Online

Joshuwa 6 - bura-pabir bible

Joshuwa 6

¹Ata saka nda mjir Yariko ana hartə nyarfayeri ar ləvəi akwa kuta bərniyir ɗa kamnyar thlivər mjir Israila. Antə mda aɗi na ata mzhi ləvəi wa, tsuwa mda aɗi na ata mzhi səɓəla wa.

²Antə MTHLAKU pəla aka Joshuwa, “Wula, I ku hamta ala gə Yariko, ka kuthlirni, kəga sojayeri arni shang akwa tsiya ga.

³Ga ka sojayeri ar nga ata mwari ka kalaktə bərni ni ka pal akwa kuta pci tədəku mnyar vir ngkwa.

⁴Ka gə vu ka pristayeri murfa waskəi ka təmbəla gam akwa tsiyari, ka da mwa akəma Akwati Alkawal ni akwa sakatə giri akwa kalaktə bərni ni. Akwa vir na murfəkur, ga ka sojayeri ar nga ata kalaktə bərni ni ka murfa, ka pristayeri ni akwa mbur təmbəlayeri ni.

⁵Ma sakatə giri ku nggatə ɗa ku ndəkərtə mbur təmbəlayeri ni ka fəi, ka gə vu ka shanga mji putə kuraku ka duna. Antə katangga ar bərni ni ata ndlagamtadzi, tə shanga sojayeri ni ata puvidzi akwa kutadi, kəlara mda ata ləvəi ata vəi tə tsa thləthlata adza.”

⁶Antə Joshuwa na ɓzər Nun ku kəga pristayeri ka pəla ala ɗa abbər, “Kəta giri Akwati Alkawal ar MTHLAKU ni, ka pristayeri laga murfa mwa akəma Akwati ni, ka təmbəlayeri ar gam akwa tsiya ɗa.”

⁷Antə Joshuwa tsawa aka mji abbər, “Thlatə giri, ka giri baɗitə kalaktə bərni ni, ka mji na ka kari mpa ni dlu kəma, ka mwa akəma Akwati Alkawal ar MTHLAKU ni.”

⁸Aghəla tə Joshuwa ku gari aka mji ni, antə pristayeri na murfa na ka təmbəlayeri murfə ni, dlu kəma akwa mbur təmbəlayeri ni, ka Akwati Alkawal ar MTHLAKU ni akwa nu ghəla ɗa.

⁹Antə mji na ka kari mpa ni ku dlu kəma akəla pristayeri na akwa mbur təmbəlayeri ni, ka mambila mji na ka kari mpa akwa nu ghəla Akwati Alkawal ni. Tsuwa akwa shanga saka ngəni ni mda akwa ləkəma ka mbur təmbəl.

¹⁰Amma Joshuwa ku tsawa aka mji abbər, “Giri aɗiya hara kuraku wa, wala zhar ka mdə nggatə kuraka giri wa. Tsuwa giri aɗiya pəla su wa, har tar vir tə I ku tsawa ala giri abbər ka giri hara kuraku. Antə sakanda giri ata hara kuraku!”

¹¹Antə tsa pəla aka mji ni ka da kalaktə bərni ni ka Akwati Alkawal ar MTHLAKU ni ka pal. Antə da ku mwari, ka ngka tsu akwa vəi fəliyir ɗa ka pəpəi anda.

¹²Apani Joshuwa ku thlatə ɗəɗəpə mbing antə pristayeri ni kətə Akwati Alkawal ar MTHLAKU ni.

¹³Antə pristayeri na murfa na ka təmbəlayeri murfa akwa tsiya ɗa ni, ku pwa akəma pristayeri na akwa kəl Akwati Alkawal ar MTHLAKU ni, ka ləkəma ka mbur təmbəl ni. Tsuwa mji na ka kari mpa ni akwa mwa akəma pristayeri, ka mambila ɗa aghəla Akwati Alkawal ni. Tsuwa akwa shanga sakar mwar ɗa ngəni, mda akwa mbur təmbəlayeri ni.

¹⁴Tsuwa akwa vir na suɗkur ni, da kalaktə bərni ni ka pal, ka jaktə ngka akwa vəi fəliyir ɗa. Antə da ləkəma ka hara apani har vir ngkwa.

¹⁵Akwa vir na murfəkur antə da thlatə ɗəɗəpə mbing sakatə vir abaka kura, ka jaktə kalaktə bərni ni apatə da tsəli kəgari, amma akwa saka ngəni da kalaktə ka murfa. Təng vir nda antə da kalaktə bərni ni ka murfa.

¹⁶Antə akwa kalaktər ɗa na murfəkur ni, sakatə pristayeri ɗəmhəɗəmhari kamnyar mbur təmbəlayeri ni, antə Joshuwa tsawa aka mjirni ka pəla, “Putə giri ləlu! Kamnyar MTHLAKU ku hamta ala giri bərni ni!

¹⁷Mdə ku hamta bərni ni ka shanga su na akwa aka MTHLAKU kamnyar ka mdə ɓdləmta ni. Tar Rahab na karwa ni, kəga mjirni antə ka giri zhar ɗa ka mpika, kamnyar tə tsa ku ɗuwar mjir wul ashira tsəɗi tə mburu thlentə ni.

¹⁸Amma giri aɗiya kəl su tə kalkal ka mdə hilantə wa, ta giri asə ndəkərəngkər asar aka kəra giri ka shanga mjir Israila, har ka mdə kurəmta giri.

¹⁹Shanga su tə mdə namtə ka adzərfa, wala ka dinar, wala ka əmza, wala ka liya mənggəl, ata ndzi aka MTHLAKU. Antə ka mdə pwi ɗa akwa vəi pwi su na ar MTHLAKU.”

²⁰Sakatə Joshuwa ku kuri hamta ala ɗa laku, antə pristayeri ni mbur təmbəlayeri ni. Təng təkəma mji ni putə kuraku ka duna, antə katanggar bərni ni ndlagamtadzi ata di. Antə sojayeri ni puvidzi akwa bərni ni, kəlara mdə ləvəi ata vəi tə tsa thləthlata adza, antə da ku dlərəmta bərni ni.

²¹Antə da kurəmta shanga su na akwa ka katsakar. Da tsəgəi shanga mji, shili ka mwanki, maɗangkyar kəga mji halhala, thla kəga təma kəga kwara shang.

²²Antə Joshuwa pəla aka mji suɗa na ra wul ashira tsəɗi ni abbər, “Mwar giri akwa mbwar karwa ni, ka giri fwaɓəla ni kəga mjirni apatə giri ku hara alkawal alari.”

²³Antə da ku mwari ka fwaɓəla ni, kəga mjir kutakəyirni, ka shanga yangkurayerari, ka mwantə ɗa kudzəhə ka vəi fəliyir mjir Israila.

²⁴Antə sojayeri ar Israila ku mbamta bərni ni ka u'u, ka shanga suayeri na akwa, tar suayeri tə mdə nam ka dinar, wala adzərfa, wala əmza, wala liya mənggəl. Suayeri ngəni da fatə ɗa ka ra pwi ɗa akwa mbwar pwi su na ar MTHLAKU.

²⁵Amma Joshuwa ku msərantə mpika Rahab na karwa ni, ka mjir kutakəyirni, ka shanga yangkurayerari, kamnyar tə tsa ku ɗuwar mjir wul ashira di natə tsa thlenta akwa Yariko ni. Antə Rahab ku ləkəma ka ndzəndziyirni akwa Israila, tsuwa kəkayeri arni aɗi akwa nca ɗa ba ashina.

²⁶Antə Joshuwa ku tsaktə mjir Israila ata saka ndaga abbər, “Ka MTHLAKU shuwumta kəlara mdə na pəla tsa ata jaktə hənɓəla bərni Yariko. Akwa nci səlari, yarakəmarni na ɓzər sal ata mta, akwa ɓəli kərari, gajirni na ɓzər sal ata mta.”

²⁷Antə MTHLAKU ku ndzi ata vəi duku ka Joshuwa, tə thləmari ku tuwa akwa shanga tsəɗi ni.