Read bura-pabir Joshuwa 7 Bible Online

Joshuwa 7 - bura-pabir bible

Joshuwa 7

¹MTHLAKU ku tsawa aka mjir Israila abbər da aɗiya kəl su tə mdə ku pəla ka mdə hilantə wa, amma da aɗi kələngkər wa. Mdə laga aɗi akwa nca ɗa ka thləmari Akan na ɓzər Karmi, na ɓzər Zabdi, na ɓzər Zera, akwa nyarmbwar Yahuda, na ku fatə suayeri laga. Antə ɗəffa MTHLAKU ku ɓzə ka duna ata kəra mjir Israila.

²Antə Joshuwa ku thlentə mji laga ahar Yariko ka da mwari ahar Ai, bərni na abwar raghəi ka Bethlel, kudzəhə ka Bethlaven. Tsa thlentə ɗa ka pəla, “Mwar giri, ka giri ra wulɓəla ashira di ni.”

³Antə sakatə da ku mwari ka ngka, ka pəla aka Joshuwa abbər, “Aɗi ata tur ka shanga mji an mwari akwa dlər mjir Ai ni wa. Thlentə mji wala apa dəpu suɗa wala makər daci ka da mwari, mda aɗiya ghərantə shanga mji wa, kamnyar mji na anda ni yiɗauwa daci.”

⁴Antə apa mji dəpu makər akwa nca mji ni an təra ka mwari anda. Amma mjir Ai ku kədləmta ɗa.

⁵Mjir Ai kurəmta mji makkumari ka ngkwa akwa nca sojayeri ar Israila. Da baɗitə kədlə mjir Israila ni tsu akwa nyarfur di ni har ka mzhitə Shebarim, ka tsəgəi ɗa ata ləghəyir gar ni. Antə mjir Israila ku yakata ka duna, tə dza ɗa ku mti shatu apa yimi ata di.

⁶Antə Joshuwa ka mji ol'olər Israila thləthləhumta ləptayeri arɗa, ka ndla ka kəma ɗa ata di akəma Akwati Alkawal ar MTHLAKU. Antə da ndzi tsu apəpəi ka kəma ɗa ata di ni har tahaku, ka pungkər bərbər ata kəra ɗa kamnyar ɗəffa ɗa na ɓza.

⁷Antə Joshuwa pəla, “Sha ku wutə yeru, MTHLAKU na ka Duna ta Shang! Kamnyar mə tə gə səntə yeru aɓəlabwana Jodan nə ri? Ga akwa bara hamta yeru aka mjir Amor ka da kurəmta yeru ya? Ma yeru an sənda, sakani yeru ku ndzi tsu aɓəla bwanda Jodan!

⁸Kulini man tə kəi pəla ri, Mthlaku, təng tə dawayeri ku kədləmta mjir Israila?

⁹Kamnyar mjir Kanana ka shanga mambila mjir tsəɗi ni ata nggatə labar ni, antə da ata kalaktə yeru ka shamta thləma yeru ata kəra duniya! Antə man tə ga ata sə harari kamnyar səliyir thləma gə na ol nə ri?”

¹⁰Antə MTHLAKU pəla aka Joshuwa, “Thlata! Kamnyar mə tə gə ndla ka mnya ɗəffa ga ata di apani ri?

¹¹Mjir Israila ku hara biku. Da ku ɓəli alkawal tə I hara ka da. Da ku fatsə suayeri laga natə I pəla ala ɗa ka da hilanta. Da həlta ɗa, ka thlandər ata kər, ka pwi ɗa akwa nca kariyir ɗa.

¹²An su na hara tə mjir Israila anggitə thləthlata akəma dawayeri arɗa wa ni. Da akwa hwi ɗa, kamnyar tə kulini da ka kəra ɗa ku ndzi su tə kalkal ka mdə hilanta! I aɗi ata ndzi adzə giri kəra wa, tar ma giri ku hilantə su tə mdə pəla ka giri hilantə ni.

¹³Thlata! Ka gə ɗəmhə mji ni kamnyar si adzə ra. Pəla ala ɗa ka da ɗəmhədzi kamnyar vir na ɗəpa. Kamnyar I na MTHLAKU na Hyelər Israila akwa pəla, ‘Mjir Israila, giri tsu ka suayeri tə I pəla ka giri hilantə ni akəla giri! Antə giri aɗi ata mzhi nggyari dawayeri ar giri wa, tar ma giri ku pumta ɗa.

¹⁴Ma ɗəɗəpa ka giri si akəma ata nyarmbwa ata nyarmbwa. Antə nyarmbwa natə I ku kəɓəla, da ata si akəma ata kutakəi ata kutakəi. Tsuwa kutakəi tə I ku kəɓəla da ata si akəma mdə pal pal.

¹⁵Antə mdə natə mdə ku wutə kari tə mdə pəla ka mdə hilantə ni akəlari, mda ata mbamta ni, kəga mjir kutakəyirni, ka shanga su na ku ndzi arni ka u'u. Kamnyar tsa ku hara sur səli na ɗimi atar ɓəli alkawalərna, I na MTHLAKU.’ ”

¹⁶Antə Joshuwa ku thlatə ɗəɗəpə mbing səɓəla ɗəpari, ka səntə mjir Israila akəma ata nyarmbwa ata nyarmbwa, antə mdə ku kəɓəla nyarmbwar Yahuda.

¹⁷Antə tsa ku səntə mjir nyarmbwar Yahuda akəma ata nyarmbwa ata nyarmbwa, antə mdə ku kəɓəla nyarmbwar Zera. Antə tsa səntə mjir nyarmbwar Zera akəma ata kutakəi ata kutakəi, antə mdə ku kəɓəla kutakəyir Zabdi.

¹⁸Antə tsa səntə mjir kutakəyir Zabdi akəma mdə pal pal, antə mdə ku kəɓəla Akan na ɓzər Karmi, na kəkar Zabdi, na akwa nyarmbwar Zera, akwa nyarmbwar Yahuda.

¹⁹Antə Joshuwa pəla aka Akan, “Ɓzərna, wul olkur səliyir MTHLAKU na Hyelər Israila ka gə pəla ali jirkur. Pəla ali su tə gə hara, ga aɗiya ɗuwar ali wa.”

²⁰Antə Akan shinau aka Joshuwa, “Jiri kam, I ku hara biku aka MTHLAKU na Hyelər Israila. Tsuwa nggədza su tə I hara ni.

²¹I wuta akwa nca suayeri tə yeru dlutsə ni ləptu laga ɓɗaku jili ar mjir Babila, ka liyar adzərfa aru suɗa, ka tsuwa zwalər dinar natə kəgəɓkurari ku təramta retar kilogram. Apani I ku ngguktə ɗa ka duna, antə I ku fatə ɗa ka ɗuwamta. I lamta ku akira tentərna ka ɗuwamta ɗa akwa, ka adzərfa akirari.”

²²Antə Joshuwa thlentə mji laga, tə da putə hwi ka mwari akwa tentər Akan, ka wutə suayeri ɗuwarɗuwarari akwa tentərni, ka adzərfa ni akira ɗa.

²³Antə da fwaɓəla suayeri na akwa tent ni, ka sənta aka Joshuwa ka shanga mjir Israila, ka pwi ɗa akəma MTHLAKU.

²⁴Antə Joshuwa ka shanga mjir Israila kətə Akan na ɓzər Zera, ka adzərfa ni, ka ləptu ni, ka zwalər dinar ni, ka maɗa'ni shili ka mwanki, kəga thlayeri arni, kəga kwarayeri arni, kəga təmarni, ka tentərni, ka shanga su tə tsa kəgari, ka mwantə ɗa akwa Mular Akor.

²⁵Antə Joshuwa pəla, “Kamnyar mə tə gə səntə bwani ata kəra mburu ri? MTHLAKU ata səntə bwani ata kəra ga ashina!” Antə shanga mjir Israila ləkwa ndzəndzəh ni ka pela har tə tsa mta. Antə da ndzəndzəhtə mjir kutakəyirni tsuwa ka mbamta ɗa kəga kariyir ɗa shang ka u'u.

²⁶Antə da tsaptə pelayeri na ol'ola lyaɗəm ata kəra Akan, natə ba ashina pelayeri ni tsu aɗi. Aghəla ngəni antə ɗəffa MTHLAKU ku pəpəi. An su na hara tə mda ana kəga vəi ngəni har ba ashina abbər Mular Bwani ni.