Read bura-pabir Joshuwa 8 Bible Online

Joshuwa 8 - bura-pabir bible

Joshuwa 8

¹Antə MTHLAKU pəla aka Joshuwa, “Ga aɗiya thlivər wa, tsuwa ga aɗiya shishiɓə wa. Fatə shanga sojayeri ni ka giri ləmta ra dlər Ai. I ata hamta ala gə kuthlir Ai, ka mjirni, ka bərniyirni, ka tsəɗiyirni shang.

²Su tə gə hara aka Yariko ka kuthlirni antə ga ata hara aka Ai ka kuthlirni. Amma akwa saka ngəni giri ata mzhi fatə kariyir ɗa kəga mwaɓiyayeri arɗa aka kəra giri. Ka giri ɗuwamtadzi atar bwahila bərni ni, ka sə səɓəla kula səndər ɗa, ka pungkərdzi aka bərni ni.”

³Antə Joshuwa ka sojayeri arni ku thlatə ka təra mwari ahar Ai. Tsuwa Joshuwa ku carɓəla sojayeri na katsala ta shang dəpu makkumari ka thlentə ɗa aviri,

⁴ka tsawa ala ɗa abbər, “Mwar giri, ka giri ɗuwamtadzi abwahila bərni ni. Amma giri aɗiya ndzi ciju ka vəi ni ka duna wa, ka giri ɗəmhədzi kamnyar pwa ata kəra ɗa.

⁵Antə yeru ka mambila sojayeri na adzə ra ata shahədzi kudzəhə ka bərni ni. Ma sakatə mjir Ai ku səɓəla abbər da ata mpa yeru apatə da hara ntangkəma ni, yeru ata shinardzi ka yeru hwi.

⁶Antə da ata nu yeru har tar ma yeru ku ndəkərəmta ɗa ciju kazhar kutadi, kamnyar da ata kəta abbər yeru akwa hwi ɗa tsu apatə yeru hara akwa saka na təramta.

⁷Antə giri ata puɓəladzi akwa vəi ɗuwardzər giri ka pungkərdzi aka bərni ni ka mpa, ka dlutsa. Kamnyar MTHLAKU na Hyelər giri ata hamta bərni ni ala giri.

⁸Ma sakatə giri ku səm di ni, ka giri hatə u'u. Ka giri mbərsa abbər giri ku hara tsu apatə MTHLAKU ku tsawa ala giri. Ngəni an tsawurna ala giri.”

⁹Antə Joshuwa ku salamtə ɗa, tə da mwari akwa vəi tə da ata ɗuwamtadzi, akwa daɓwa Bethlel ka Ai, təbwar ramta ka Ai. Ar Joshuwa vir nda tsa pi tsu akwa vəi fəliyir ɗa ata kəma duku kəga mjirni.

¹⁰Səɓəla ɗəpari antə Joshuwa thlatə ɗəɗəpə mbing ka tsaptə sojayeri arni, ka mji ol'olər Israila, ka pwa akəma sojayeri ni akwa mwari ahar Ai.

¹¹Antə shanga sojayeri na adzə ni ku təra mwari kudzəhə ka di ni, ka fəli təbwar yala ka Ai, ka mular laga akwa daɓwa ɗa ka Ai.

¹²Antə Joshuwa fatə mji apa dəpu ntəfu ka ɗuwamta ɗa akwa daɓwa Bethlel ka Ai, təbwar ramta ka di ni.

¹³Antə mdə pugəi sojayeri ni akwa vəyayeri na kalkalari, ɗəmhəɗəmhari kamnyar mpa. Mdə pwi mji na hangari təbwar yala ka bərni ni, ka pwi mji na ata ɗuwamtadzi ni təbwar ramta ka bərni ni. Ar Joshuwa tsa pi akwa kuta mular ni.

¹⁴Sakatə kuthlir Ai wutə sojayeri ar Israila ni, antə tsa ka shanga sojayeri arni ɗəmhədzi taktar, ka dli ləɓəla səɓəla ɗəpari, ka mwari akwa vəi laga na awul Mular Jodan, kamnyar kəɓa ka sojayeri ar Israila ni akwa mpa. Kuthli ni aɗi sənda abbər mji laga ku ɗuwamtadzi təbwahila di ni kamnyar sə pwa ata kəra ɗa ka mpa wa.

¹⁵Antə Joshuwa ka shanga mjirni namta apa mdə ku mula ala ɗa, ka ngka ka bwahili akwa hwi mwari təbwar mtakəu.

¹⁶Tsuwa shanga mjir di ni mdə ku kəgaɓəla ɗa ata kəma duku ka da nu ghəla mjir Israila. Antə akwa nu ghəla mjir Israila ni, mjir Israila ku ndəkərəmta ɗa ciju kazhar di ni.

¹⁷Mda aɗi wala duku na mbila akwa Ai wala Bethlel na kula ləɓəla ka nu ghəla mjir Israila ni wa. Da zhar nyarfayeri ar di ni kəlar kəlarari ghalala kula mdər gadi, ka nu ghəla mjir Israila.

¹⁸Antə MTHLAKU pəla aka Joshuwa, “Ndəraɓəla tsiya ga na ka gali ni ka gə ncantə təbwar bərni Ai, kamnyar I ata hamta bərni ni ala ga.” Antə Joshuwa ku ndəraɓəla tsiyari na ka gali ni ka ncantə təbwar bərni ni.

¹⁹Təkəma tə Joshuwa haptə tsiyari, təng mji na ɗuwamtadzi ni puɓəladzi taktar, ka hwi ləkwa bərni ni, ka səm di ni, ka hatə u'u təkəma.

²⁰Antə sakatə mjir Ai shinar kəma ɗa abwahili, təng nggədza ɗerər bərni ni akwa ləmta aharhyel. Tsuwa laku aɗi tə da ata mzhi msəra abwani wala abwanda kəra wa, kamnyar mjir Israila na hwi ləkwa mtakə ni ma ku shinardzi akwa səntə mpa ata kəra ɗa.

²¹Kamnyar sakatə Joshuwa ka mjirni ku wuta abbər mji na ɗuwardzi nda ku kurtə səm di ni, har tə ɗerər di ni akwa ləmta aharhyel, antə da shinaghəl kəma ɗa, ka tsəgəi mjir Ai.

²²Antə mjir Israila na pudzi akwa kutadi ni səɓəla akwa kutadi ni, ka ləkwa nu ghəla mjir Ai akwa tsəgəi ɗa. Antə mjir Ai wuta abbər mjir Israila ku kurtə kalaktə ɗa akwa kəlara bwa, abwani ka abwanda. Antə mjir Israila tsəgəi ɗa shang, mda aɗi na msərəmta wa, tsuwa mda aɗi na mbil ka mpikə wa.

²³Amma ar kuthlir Ai, da ngkəi ni ka mwantə ni aka Joshuwa.

²⁴Sakatə mjir Israila ku kuri tsəgəi shanga mjir Ai na nu ghəla ɗa akwa mtakə ni, antə da ngka akwa Ai ka tsəgəi shanga mji na mbila akwa kutadi ni.

²⁵Antə hangkur shanga mjir Ai shili ka mwanki natə mdə ku kurəmta vir nda an dəpu kumnya suɗa.

²⁶Kamnyar Joshuwa aɗi ɓəlhə tsiyari tə tsa ndəraɓəla ka gali akwa ni wa, tar tə mdə kuri tsəgəi shanga mjir Ai.

²⁷Tar mwaɓiyayeri kəga kariyayeri daci an mbila akwa di ni, antə mjir Israila ku fatə ɗa, kamnyar apani antə MTHLAKU pəla aka Joshuwa ka tsa hara.

²⁸Apani antə Joshuwa ku mbamta Ai, ka namtə ni tə tsa ndzi fya, apatə tsa aɗi har ba ashina.

²⁹Tsa mbwamta kuthlir Ai ata nfwa ka zhar mshiyirni tsu ata har tahaku. Sakatə pci akwa təri antə Joshuwa pəla ka mdə kəli mshiyirni. Antə mdə ku kəli mshiyirni ata nfu ni ka psəmta akwa nyarfur ləvəi akwa di ni. Antə da tsaɓəngkər alari pela hang, na tsu aɗi anda har ba ashina.

³⁰Antə Joshuwa həntə bagaɗi aka MTHLAKU na Hyelər Israila ata Gar Ebal.

³¹Tsa namtə bagaɗi ni kalkal apatə Musa na mafar MTHLAKU ku tsawa aka mjir Israila, apatə mdə ku rəbuta akwa Kakaɗər Tsawa ar Musa, abbər, “Ka mdə həntə bagaɗi ni ka pelayeri tə mda aɗi marəmta wa, wala pukthli ni ka liya wa.” Antə da ku hamta saɗaka mbamba ata bagaɗi ni aka MTHLAKU, ka hamta saɗakar jakə mwardzi.

³²Anda ata nca mjir Israila, antə Joshuwa ku rəbwaɓəla tsawur Musa ata pelayeri ni.

³³Antə shanga mjir Israila mətəpi kəga mjir di, mji ol'ola kəga kwakunayeri, kəga alkaliyayeri shang, ku ndəkəidzi ka bwa suɗa. Mji bwaduku thləthlata akəma Gar Gerizim, mji bwaduku tsuwa akəma Gar Ebal, akwa wuldzi kəga mji na aɓəla bwanda ata Gar Gerizim ni, ka mjir Lawi na pristayeri ni akwa daɓwa ɗa akwa kəl Akwati Alkawal ar MTHLAKU. Kamnyar ngəni an laku tə Musa na mafar MTHLAKU ku tsawa abbər ka mjir Israila thləthlata akwa, kəlara sakatə pristayeri ata vədza ala ɗa barka.

³⁴Aghəla nda antə Joshuwa ku karatə shanga ndərayeri na akwa Kakaɗər Tsawur Musa, ka barkayeri, kəga ndərayeri ar shuwumta mda ala ɗa, apatə Musa ku rəbuta akwa kakaɗə ni.

³⁵Ndər aɗi wala pal akwa nca tsawayeri ar Musa, na kula Joshuwa karatəmta akəma shanga mjir Israila na tsaptədzi, kəga mwankir ɗa, kəga maɗa' ɗa, kəga mətəpiyayeri shang na ka ndzi akwa nca ɗa ni wa.