Read bura-pabir Joshuwa 9 Bible Online

Joshuwa 9 - bura-pabir bible

Joshuwa 9

¹Aghəla saka laga təng shanga kuthlyayeri na aɓəla bwanda Thlyagha Jodan ni nggatə labar ata kəra laku tə mjir Israila səma akwa ni. Nayeri ni an kuthlyayeri ar mjir Hitti, ka mjir Amor, ka mjir Kanana, ka mjir Perizzi, ka mjir Hivi, ka mjir Yebusi, na akwa tsəɗi ɗəɗəgəlayeri, ka na ata kusar garayeri na abwar ramta, ka na ata mnya Manda Meditereniya, har ka pudza aka garayeri ar Lebanon.

²Sakatə kuthlyayeri ngəni ku nggatə labar ni, antə da tsaptədzi ka paktə sojayeri arɗa kamnyar dlər Joshuwa ka mjir Israila.

³Amma sakatə mjir Gibeyon nggatə su tə Joshuwa hara aka Yariko ka Ai,

⁴antə da ɗəmha abbər arɗa da ata hara su ka da zwalitə Joshuwa. Antə da mwari ka namtə susəma laga raka, ka pu akwa bufayeri na hagalhagalari, ka putə bufayeri ni ata hila kwarayeri arɗa, ka fatə zamzamiyayeri ar yimər anap na hagalhagalari tə mdə ku ghəra akwa nam ɗa.

⁵Antə da hatə ɓaɓiyayeri na hagalhagalari tə mdə ku ghəra akwa ndəɓwari, ka hatə ləptayeri na hagalhagalari tə mdə ku ghəra akwa tsəngdləhari. Antə da fatə buradi na ul'ulari, na ka mpururu.

⁶Antə da təra mwari ahar Gilgal akwa vəi fəliyir mjir Israila, ka pəla aka Joshuwa ka mjir Israila, “Yeru thlata akwa tsəɗi na ciju ka si. Antə kulini, mbwi giri alkawal ka yeru.”

⁷Amma mjir Israila pəla aka mjir Hivi ni abbər, “Kamnyar mə tə ka yeru mbwi alkawal kəga giri ri? Nuhum giri azi kudzəha adzə yeru.”

⁸Antə da pəla aka Joshuwa abbər, “Yeru an buɗar giri.” Antə Joshuwa yu ɗa abbər, “Giri an wa ri? Tsuwa giri thlata ama ri?”

⁹Antə da pəla, “Yeru thlata akwa tsəɗi na ciju, zanuwa, kamnyar yeru ku nggatə labar ata kəra MTHLAKU na Hyelər giri, ka shanga suayeri tə tsa hara akwa Masar.

¹⁰Tsuwa yeru ku nggatə shanga su tə tsa hara aka kuthlyayeri na suɗa ar mjir Amor, na abwar raghəi ka Jodan, watau su tə tsa hara aka Kuthli Sihon na ahar Heshbon ka Kuthli Og na ar Bashan na ka ndzi ahar Ashtaroth.

¹¹Mji ol'olər yeru ka shanga mjir tsəɗiyir yeru an pəla ala yeru abbər ka yeru ɗəmhə susəma tə yeru ata lənggu ni kəgari, ka yeru si wutə giri, ka yeru pəla ala giri abbər yeru an buɗar giri antə ka giri mbwi alkawal ka yeru.

¹²Wul giri susəmər yeru ni bu. Hwatu susəmər yeru ni gərgər sakatə yeru thlata avəi akwa kəyayeri ar yeru, vir tə yeru səɓəla abbər yeru ata si adzə giri ni. Amma wul giri kulini da ku uli ka hara mpururu.

¹³Tsuwa zamzamiya nayeri ni bilən sakatə yeru nghyantə ɗa ka yimər anap. Amma wul giri kulini da ku hali akwa thləhumtadzi. Tsuwa ləptər yeru kəga ɓaɓiyir yeru ni shang haləmtadzi akwa lənggu ngəni ciju ni.”

¹⁴Antə mjir Israila kətsə susəmər mjir Gibeyon ni ka wulha, kula da tsəkwitə MTHLAKU ata kər.

¹⁵Antə Joshuwa ku ndzi msəra ka mjir Gibeyon, ka mbwi alkawal ar ndzi msəra kəga da, kamnyar ka tsa zhar ɗa ka mpika. Tsuwa mji ol'olər Israila ku hara ala ɗa alkawal abbər da ata kəsi alkawal ni.

¹⁶Aghəla vir makər ka mbwi alkawal kəga mjir Gibeyon ni, antə mjir Israila nggaɓəla abbər mji tə da mbwi alkawal kəga da ni da an ntəwulər ɗa na kudzəhə ka da.

¹⁷Antə mjir Israila ləkwa lakur pakɓəla vəi tə mji ngəni ata. Akwa vir na makərkur antə da mzhitə bərniyayeri ar mji ngəni. Tsuwa bərniyayeri ngəni an Gibeyon, ka Kefira, ka Beyeroth, ka Kiriyath Yeyarim.

¹⁸Amma mjir Israila aɗi hir tsi ɗa wa kamnyar tə mji ol'olər ɗa ku kurtə kəta ala ɗa alkawal akwa thləma MTHLAKU na Hyelər Israila. Antə shanga mji ku nggungguni ata kəra mji ol'olər ɗa ni.

¹⁹Amma mji ol'ol ni pəla, “Yeru ku kurtə kətə alkawal ala ɗa akwa thləma MTHLAKU na Hyelər Israila, antə kulini mburu amzhi tsəkwar ɗa wa.

²⁰Ngəni an kura su tə mburu ata mzhi harari, dwali ka mburu zhar ɗa ka mpika, kamnyar alkawal tə mburu kəta ala ɗa, ta ɗəffə bwarbwarkur ar Hyel asə thlata ata kəra mburu.”

²¹Antə mji ol'olər Israila ni jaktə pəla aka mjir ɗa abbər, “Zhar giri ɗa ka mpika, amma ka da ndzi mjir nta udzəm ka mjir ɗəm yimi aka mjir mburu.” An su tə mji ol'ol ni pəla.

²²Antə Joshuwa ku kəga mjir Gibeyon ni ka pəla ala ɗa, “Kamnyar mə tə giri pwaktə yeru abbər giri thlatə ciju, amma giri azi kudzəha nə ri?

²³Antə təng tə giri ku hara apani ni, baɗitə ka kulini, Hyel ku shuwumta giri. Antə tədəku mjir giri ata ndzi mafayeri, ka mjir nta udzəm, ka mjir ndəkər yimi kamnyar kəyir Hyelərna.”

²⁴Antə da shinau aka Joshuwa abbər, “Zanuwa, yeru hara ngəni ni kamnyar yeru ku nggata abbər MTHLAKU na Hyelər nga ku hara alkawal aka Musa na mafarni, abbər tsa ata hamta ala giri shanga tsəɗi ni, ka tsa tsəgəi shanga mji na akwa tsəɗi ni kamnyar giri, antə yeru akwa thlivər giri ka duna. Antə yeru hara su ngəni kamnyar tə yeru akwa thlivər mpika yeru.

²⁵Antə ar yeru kulini, yeru akwa tsiya ga, hara kəlara su tə gə wuta abbər ɓɗaku ka tsuwa kalkal ka gə hara ala yeru.”

²⁶Antə Joshuwa ku hara apani, tsa msərantə ɗa akwa tsiya mjir Israila, tsa aɗi zhar tə mjirni tsəgəi ɗa wa.

²⁷Amma tsu vir nda antə Joshuwa vu tə mjir Gibeyon ndzi mjir nta udzəm, ka mjir ndəkər yimi aka mji ka kamnyar bagaɗi aka MTHLAKU, akwa kəlara vəi tə tsa ku carɓəla kamnyar ka mdə vəngkər alari səli ata. Antə har ba ashina an su tə mjir Gibeyon ni ana hara.