Read bura-pabir 2 Thlassalonika 2 Bible Online

2 Thlassalonika 2 - bura-pabir bible

2 Thlassalonika 2

¹Kulini ata kəra səyir Mthlakər mburu Yesu Kristi, ka laku tə mburu ata tsaptədzi kamnyar kəɓa ka tsa ni, yeru akwa kiɗə giri, maɗaməma, abbər,

²hyala giri aɗiya nthlə giri təkəma wa, wala ka hangkala giri thlata abbər virər Mthlaku ku kurtə si wa. Wala ma mdə laga an pəla abbər tsa nggata akəla mambəla, wala akəla mdə laga, wala ma da an pəla abbər da wuta akwa pal akwa nca wasikayeri ar yeru, giri aɗiya mbərsa ka da wa.

³Giri aɗiya hir ka mdə pwaktə giri wa. Kamnyar vir ngənda aɗi ata si wa, tar ma mdə ku hara kər ɓəɓalkur katagu, tə kuthlir kər ɓəɓalkur ni ku si, mdə tə mda ata shamta ni ni.

⁴Tsa an akwa hara dawakur ka kəlara su na ɓɗaku ni, na hir haptə kərari, na akwa hara dawakur ka shanga su na ku tsəkwar thləma Hyel ni, wala tsuwa mdə tə mda akwa vəngkər alari səli ni. Har ma tsa ku lətə kujara akwa mbwar Hyel akwa namtə kərni abbər tsa an Hyel ni.

⁵Giri amzhi ɗangtari wa ya? Ai təng tə I adzə giri nda I ku pəla giri suayeri ngəni.

⁶Kulini kurani giri asəndə su na akwa ngkatə ta tsa asi ni, kamnyar tsa amzhi si kula sakar səyirni ni hara wa.

⁷Kamnyar mdər kər ɓəɓalkur ni ku baɗitə hara kuthlikurərni akwa ɗuwari, amma mdə na akwa ngkatari ni ata ləkəma ka ngkatari har ka vədza aka sakatə Hyel ata kələmta ni.

⁸Aghəla nda antə mda ata sə haɓəla mdər kər ɓəɓalkur ni ata bəbal, amma tar akwa sakatə Mthlaku Yesu ku si. Antə Yesu ata tsi ni ka shambarər mnyari, ka tsa shamta ni ka darajar səyirni.

⁹Mdər kər ɓəɓalkur ni ata sə si kamnyar hara kəthlər aka Shatan, antə tsa ata si ka hara surndatayeri, kəga seɗayeri, kəga kəthlərayeri na ol'ola, amma shanga ɗa jabu jabu.

¹⁰Tsa ata kəthlər ka kəlara jili ɗimikur madi kamnyar pwaktə mji na akwa lakur shashakur, kamnyar da aɗi hir dlu jirkur ka da wutə mbantədzi wa.

¹¹Antə Hyel ata thlentə pwaktə na ola ata kəra ɗa na ata vu ɗa ka da mbərsa ka kəlara su na thlandər,

¹²kamnyar ka Hyel sə ɗi shanga mji na aɗi mbərsa ka jirkur wa, mji na hir nggatə msərakur su na ɗimi ni.

¹³Ku ndzi dwali ala yeru ka yeru usar Hyel tədəku kamnyar giri, maɗaməma, giri natə Hyel ku hir giri. Kamnyar Hyel carɓəla giri ka giri baɗitə wutə mbantədzi atar kəcəkəcəkur ar Mambəla, ka atar mbərsa ka jirkur.

¹⁴Kamnyar suayeri apani antə Hyel kəga giri atar labar na msəra natə yeru ngkər ala giri ni. Tsa kəga giri ni kamnyar ka giri sə wutə jili səli ar Mthlakər mburu Yesu Kristi ni.

¹⁵Antə maɗaməma, ka giri thləthlatə gyang, ka giri kəsi jirkur natə yeru thlipa ala giri ni, suayeri tə yeru pəla ala giri nca ka nca, ka natə yeru rəbuta ala giri akwa wasika.

¹⁶Kulini ka Mthlakər mburu Yesu Kristi surni, ka Hyel na Təddar mburu, na hir mburu, na ala mburu shiktədzi na akur wa, ka vəkər na ɓɗak laga atar kətadzərni ni,

¹⁷shiktə ɗəffa giri, ka dunautə giri akwa shanga kəthlərayeri kəga gariyayeri na ɓɗakɓɗaku.