Read bura-pabir 2 Thlassalonika 3 Bible Online

2 Thlassalonika 3 - bura-pabir bible

2 Thlassalonika 3

¹I akwa bara hartə gari ni, maɗaməma, ka kiɗa, abbər, ka giri hara ala yeru adduwa. Ka giri hara adduwa kamnyar ka ndərər Hyel ni ləkəma ka titiləmtadzi taktar, tsuwa ka mji dlu ni ka daraja akwa kəlara bwa, tsu apa sakatə tsa si ala giri.

²Tsuwa ka giri hara adduwa ka Hyel msərantə yeru ta mji na kəmanggar ka ɗimi ni. Kamnyar aɗi shanga mji an hamta jiri aka labar ni wa.

³Amma Mthlaku ka jirkur, antə tsa ata dunautə giri ka ɓəlatə giri lapiya ta mdə na ɗimi ni.

⁴Tsuwa yeru ku mbərsa ka Hyel abbər giri akwa hara suayeri tə yeru tsawa ala giri ni, tsuwa giri ata ləkəma kəgari.

⁵Ka Mthlaku pwar giri kamnyar ka giri ndzi mjir hir mda apa Hyel, ka ndzi ka mbwiɗəffu apa Kristi.

⁶Kulini, maɗaməma, yeru akwa hamta ala giri tsawa akwa thləma Mthlakər mburu Yesu Kristi, abbər ka giri psi lakur shanga maɗaməma na akwa ndzəndzi kula hara kəthlər, na aɗi akwa nu tsawayeri tə yeru hamta ala giri wa ni.

⁷Ai giri ma giri ku sənda abbər kalkal ka giri thlipə surharar yeru, kamnyar sakatə yeru adzə giri, yeru aɗi ncantə halər nggəlar hara kəthlər wa.

⁸Yeru aɗi hir səm susəmər mdə kula yeru mtəmta wa. Yeru ku hara kəthlər pci ka viri, akwa fa vəi gərgər kamnyar yeru aɗi akwa bara ka yeru vəngkər ghəra aka kəlara mda akwa nca giri wa.

⁹Yeru hara apani ni, aɗi abbər yeru kula dunar bara dlara akəla giri wa, amma kamnyar ka yeru vəi surthlipa ala giri tə ka giri nuwa.

¹⁰Kamnyar ai wala sakatə yeru adzə giri ni, yeru ku tsawa ala giri abbər, “Kəlara mdə na aɗi ata kəthlər wa, tsa aɗiya səm susəm wa.”

¹¹Kamnyar yeru ku nggata abbər mji laga akwa nca giri aɗi akwa hir kəthlər wa, su aɗi tə da akwa harari wa, tar hau mnya akwa wujirər mji daci.

¹²Antə jili mji apani ni, yeru akwa hamta tsawa ka tsaktə ɗa akwa thləma Mthlaku Yesu Kristi, abbər ka da ngkahədzi ka hara kəthlər ka jirkur, kamnyar ka da wutə susəmər mnya ɗa.

¹³Amma ar giri maɗaməma, giri aɗiya ghəra akwa hara ɓɗakkur wa.

¹⁴Ma mdə na ku nggəlar ta kələngkər aka su tə yeru pəla akwa wasika ngəni ni, ka giri vədza hangkala giri alari, ka giri hwi dzari kamnyar ka tsa ləkwa səli.

¹⁵Giri aɗiya namtə ni apa tsa dawar giri wa, amma ka giri tsaktə ni apatə giri ata hara aka ɓzərma.

¹⁶Kulini ka Mthlakər msərakur surni, na ala giri msərakur tədəku akwa shanga su. Ka Mthlaku ndzi adzə shanga giri.

¹⁷I na Bulus an rəbutə thlawardzi ngəni ka tsi surna. Ngəni an seɗarna akwa kəlara wasikarna. An laku tə I ana rəbuta akwa.

¹⁸Ka Mthlakər mburu Yesu Kristi hara ɓɗakkur aka shanga giri.