Read bura-pabir 1 Timothli 2 Bible Online

1 Timothli 2 - bura-pabir bible

1 Timothli 2

¹Na ntangkəma, I akwa pəla abbər, ka gə hara adduwa kamnyar shang mji ka kiɗa abbər ka Hyel dlar ɗa. Ka gə kiɗə Hyel ata vəya ɗa, ka usar Hyel kamnyar ɗa.

²Ka gə hara ngəni kamnyar kuthlyayeri, ka shanga mambila mji na ka olkur, kamnyar ka shanga mburu ndzi lapiya ka hangkala mburu pəpəipəpəyari, akwa thlivər ɗəffa Hyel, ka ndzi mjir Hyel, ka ndzi ka mdəkur ata nca mji.

³Ngəni ɓɗaku, tsuwa tsa an su na ɓɗaku akəma Hyel na Mdər mbantər mburu,

⁴na akwa bara ka shanga mji wutə mbantədzi ka səndə jirkur.

⁵Kamnyar Hyel duku an aɗi, tsuwa mdə duku an aɗi na ata namtə daɓwa Hyel ka mji, tsuwa mdə ngəni an Kristi Yesu.

⁶Tsa an hamta mpikari kamnyar pəli shanga mji. Ngəni an labar tə Hyel hamta aka duniya akwa saka na kalkalari.

⁷Ngəni an su na hara tə Hyel carɓəla ra ka namtə ra mdər ngkər labar ka aposəl ni, kamnyar kəi thlipa aka shanga mji na aɗi mjir Yahudi wa labar ar hamta jiri ka jirkur. Tsuwa jirkur antə I akwa pəlari, aɗi thlandər wa.

⁸I akwa bara abbər akwa kəlara vəi vəngkər səli, ka mji shili hara adduwa, ka tsiya ɗa haptəhaptari ahar hyel, kula ɗəffə ɓzəɓza, tsuwa kula beɗi.

⁹Tsuwa I akwa bara abbər ka mwanki dəɓatə kərɗa ka kari na kalkalari, ɓɗaku, na ata ncanta abbər da mji na nkahənkahari, aɗi ka dəɓar shishirkər wa, wala sur dəɓa ar dinar wa, wala natə mdə nam ka liya laga ɓɗaku, wala jili zhaɓi na ka masari mwavər kamtə wa.

¹⁰Amma kalkal mwanki na ana ncanta abbər da mjir thlivər ɗəffa Hyel ni ncanta atar hara kəthlər na ɓɗakɓɗaku.

¹¹Ka mwanki dləɓ səri akwa sakatə mdə sal akwa thlipa ala ɗa su, ka da ndzi ka kələngkər akwa shanga su.

¹²I aɗi hir ka mwanki thlipa aka mji shili wa, wala ka mwanki ndzi ka olkur ata kəra mji shili wa, amma ka da ndzi ɗiɗi.

¹³Kamnyar Adam an mdə namtə ntangkəma, kambəla Hauwa.

¹⁴Tsuwa aɗi Adam antə Shatan pwaktəmta wa, amma mwala antə tsa pwaktəmta, ka ndzi mdər biku.

¹⁵Amma wala apani mwala ata sə wutə mbantədzi atar ya maɗankyar ma tsa ku mnidzi akwa hamta jiri, ka hirkur, ka namtə ndzəndziyirni ɓɗakkarkara, ka ndzi nkahənkahari.