Read bura-pabir 1 Timothli 4 Bible Online

1 Timothli 4 - bura-pabir bible

1 Timothli 4

¹Mambəl ku pəlaɓəla ata bəbal abbər akwa sakar kurər duniya, mji laga ata sə pumta hamta jirər ɗa, ka da nutə mambəlayeri na ar thlandər, ka surthlipayeri na ar shatan.

²Jili surthlipayeri ngəni ata thlata akəla mjir thlandər na shimnya natə dzamər ɗa ku mti, apa su tə mdə mbamta ka u'u.

³Da an mji na ana thlipa abbər aɗi kalkal ka mdə kəldzi wa, ka tsuwa ka mdə zhar səm susəmayeri laga. Amma da ka kəra ɗa ku sənda ka hamta jiri abbər Hyel an alaktə susəmayeri ni, tsuwa kalkal ka mdə dlu ɗa ka gwaɗita.

⁴Kamnyar shanga su tə Hyel an alakta, suari ɓɗaku. Tsuwa mda aɗiya nggəlar su wala duku wa, ma mdə ku kurtə dlu suari ka gwaɗita.

⁵Kamnyar mdə ku kurtə kəcimta ni atar ndərər Hyel ka adduwa.

⁶Ma ga ku thlipə suayeri ngəni aka maɗaməma, ga ata ndzi mdər kəthlər na pwa ar Kristi Yesu, mdə na kəlkəla akwa ndərər hamta jiri ni ka tsuwa sur thlipə na ɓɗaku natə ga akwa nuwari har ba ashina ni.

⁷Amma ka gə hara ciju ka makumdlayeri na aɗi ata haptə səliyir Hyel wa ka na cakucaku. Ka gə vu kəra ga akwa thlipə su na ata namtə nga ka gə ndzi mdər Hyel.

⁸Wuyamta dza ana dlar dza mda akwa laku laga, amma thlipər bara ndzi mdər Hyel ana dlara akwa kəlara bwa, kamnyar tsa ata hara ka gə ndzi ka mpika akwa ndzəndziyir ngə na kulini japu ka na akəmazi.

⁹Gari ngəni an jiri, natə kalkal ka mdə dlu ka tsi suɗsuɗa.

¹⁰Kamnyar an su na hara tə mburu ana kəthlər ka duna ka ləkəma ka ntsari ni, kamnyar mburu akwa vəkər ka Hyel na ka mpika, na Mdər mbantə shanga mji, na olari mji na ku hamta jiri.

¹¹Ka gə thlipa ala ɗa suayeri ngəni, ka gə wuta abbər waskəi ku thlipta.

¹²Ga aɗiya hir ka mdə wala duku rutə nga abbər kamnyar tə gə tsu ɓzəngkyar wa. Amma ka gə ndzi sur thlipa aka shanga mji na ka hamta jiri, atar gariyir nga, ka halər nga, ka atar laku tə gə hir mji akwa, ka atar hamta jirər nga, ka kəcəkəcəkurər nga.

¹³Akwabə I asi, ka gə ləkəma ka karatə kakaɗər Hyel aka mji, ka ngkər labar, ka thlipə ala ɗa.

¹⁴Ga aɗiya gyal ka cauta na abwar mambəl natə gə dluwa akwa sakatə naɓiyayeri gari ata kəra ga, sakatə mji na ol'olər ikələziya pungkər tsiya ɗa ata kəra ga akwa kiɗa ala gə barka nə wa.

¹⁵Ka gə ləkəma ka hara kəthlərayeri ngəni, ka hamta kəra ga swakti ala ɗa, kamnyar ka shanga mji wutə ləkəmar nga.

¹⁶Ka gə hara hangkal ka laku tə ga akwa ndzəndzi akwa, ka tsuwa su tə ga akwa thlipari. Ka gə ləkəma ka hara suayeri ngəni, kamnyar atar hara apani, antə ga ata mbantə kər nga ka mjir ngga nga.