Read bura-pabir 1 Timothli 5 Bible Online

1 Timothli 5 - bura-pabir bible

1 Timothli 5

¹Ga aɗiya mpa aka mdə na olta gə wa, amma ka gə gari alari apa tsa baba' nga. Ka gə gari aka maɗadakwi apa da maɗama' nga.

²Ka gə gari aka mwanki na ol'ola apa da mayar nga, ka aka maɗankwi apa da ngkwarma nga, ka ɗəffu na kəcəkəcari.

³Ka gə wul darajar mwanki na kughung, na aɗi ka mdər dlar ɗa damwa wa.

⁴Amma ma mwala kughung na ka maɗa'ni aɗi, wala kəkayeri arni aɗi, to ka da baɗitə ncanta aka mjir kutakəyir ɗa abbər da asəndə Hyel atar wulwul mwala ni, kamnyar atar apani antə da ata mzhi ntəmta ghər tə mjir yar ɗa hara ata kəra ɗa. Tsuwa jili su apani ana ndzi ɓɗaku ata nca Hyel.

⁵Mwala kughung na akwa tur dlar ka jirkur, na shini, kula mdər dlar ni wala duku, tsa ata vəkər ka Hyel tədəku, akwa hara adduwa pci ka viri alari kamnyar bara dlara.

⁶Amma mwala kughung na akwa bara nggatə msərakur ndzəndziyirni daci, arni tsa ku kurtə mti, wala tə tsa tsu ka mpikə ni.

⁷Ka gə thlipə suayeri ngəni aka mjir ikələziya, kamnyar ka da ndzi mji na kula sur nggəla akəma mji.

⁸Amma kəlara mdə na aɗi akwa hir wul yangkurari wa, apa mjir kutakəyirni ma shang wa, tsa ku nggəlar addinərni, ka ndzi ɗimi ta mdə na kula addin.

⁹Ga aɗiya huvə rəbutə thləma mwala kughung akwa nca mwanki na kughung wa, tar ma tsa ku mzhitə məva ngkwakumari ka olkur, tsuwa tar ma tsa kəl sal ka duku daci.[2]

¹⁰Tsuwa tar ma tsa ku hara suayeri na ɓɗakɓɗaku tə mdə ku hara seɗari. Watau ka tsa ndzi abbər tsa mwala na ku kəlantə maɗa'ni akwa laku na kalkalari, tsuwa tsa mwala na hir dlu mətəpi, mwala na ku dlar mjir Hyel akwa kutar kanaɗikur, ka dlar mji na akwa bwani, mwala na ku hamta kərni akwa hara ɓɗakkur akwa kəlara bwa.

¹¹Amma ga aɗiya rəbutə thləma mwanki kughung na tsu kusta akwa nca kughungayeri wa. Kamnyar ma sakatə nggukər dza ku səm ɗəffa ɗa, da ata ndəkəmtadzi ka Kristi, ka bara kəl sal ka damwa.

¹²Apani da akwa ndəkərəngkər bwani aka kəra ɗa atar ɓəli alkawal tə da kətə ntangkəma ni.

¹³Bamnda ngəni ma, da akwa thlipə ndzəndzi gapani, akwa kadla ata kəi ata kəi. Tsuwa da aɗi akwa ndzəndzi gapani daci wa, amma har da akwa ndwara, ka hau mnya ɗa akwa sur mji gapangapani, ka pəla suayeri na aɗi kalkal ka da pəla wa.

¹⁴Antə kuji ka mwanki kughung na tsu kusta ni kəl sal, ka da wutə maɗankyar, ka da wul kutakəyir ɗa. Antə apani dawayeri ar mburu aɗi ata wutə lakur mnya ɗimi ata kəra mburu wa.

¹⁵Kamnyar mwanki kughung laga ku kurtə pəramta ka nutə Shatan.

¹⁶Ma mwala aɗi na Krishan na ka yangkurayerari kughung, to, ka tsa dlar ɗa, ta da asə ndzi kəla aka ikələziya. Kamnyar atar apani mjir ikələziya ata wutə lakur dlar kughungayeri na kula mdər dlara.

¹⁷Ka mdə nar olkur aka mji na ol'ola na ana hara kəthlər ɓɗaku akwa ikələziya, ka mdə ntə ɗa ɓɗaku, apa mjir ngkər ndərər Hyel ka mjir thlipə ndərər Hyel ma wa.

¹⁸Kamnyar kakaɗu ku pəla abbər, “Ga aɗiya hartə mnya thla sakatə ga akwa kəthlər ka tsa akwa dəkə mthli wa,” ka tsuwa abbər, “Kalkal ka mdər kəthlər wutə watsəɓərni.”

¹⁹Ga aɗiya dlu ndərər burka tə mdə sənta ala ga ata kəra mdə na ola akwa ikələziya wa, tar ma tsa ka seɗayeri suɗa wala makər.

²⁰Tsuwa shanga mji na akwa ləkəma akwa hara biku, ka gə mnya ala ɗa akəma mji, kamnyar ka mambila mji thlivəra.

²¹I akwa tsaktə nga akəma Hyel ka Kristi Yesu ka mjirthlentərhyel na ɓɗakkarkara, abbər ka gə ɓəlatə tsawayeri ngəni, kula ncantə hirkər wala zumzumkur.

²²Ga aɗiya huvə vəngkər tsi ar barka aka mdə wa, tsuwa ga aɗiya paktə kər ka mda akwa bikərni wa. Amma ka gə namtə kər nga kəcəkəcari.

²³Ga aɗiya jaktə sa yimi mtathlaku shini wa, amma ka gə sa yimər anap na mumwasu raka kamnyar ka tsa dlar nga akwa kuri shilkər kuta ga, ka shilkayeri damwa na ana damitə nga tədəku ni.

²⁴Bikər mji laga ana ndzi ata bəbal ka mdə wuta, akwa mwa akəma ɗa ka mwantə ɗa akəma shariya. Amma bikər mji laga ana sə səɓəla ata bəbal aghəli.

²⁵Tsu apani tsuwa kəthlərayeri na ɓɗakɓɗaku ana ndzi ata bəbal, tsuwa wala ma da aɗi ata bəbal kulini wa, da amzhi ɗuwardzi ba saka madi wa.