Read bura-pabir 2 Timothli 2 Bible Online

2 Timothli 2 - bura-pabir bible

2 Timothli 2

¹Ar ngə ɓzərna, ka gə ndzi ɓəɓal atar ɓɗakkur tə Hyel hara ala ga akwa Kristi Yesu ni.

²Tsuwa shanga su tə ga ku nggata akəli, tə mji hang ku ndzi seɗari, ka gə hamta aka mji na ka jirkur na ata mzhi thlipa aka mji damwa tsuwa.

³Ka gə nggitə bwani ata kəma duku kəga yeru, apa soja na pwa ar Kristi Yesu.

⁴Ai soja aɗi na akwa kəthlər, na ata hir vu kərni akwa sur duniya wa, kamnyar mwaɓər kəlara soja an ka tsa hara su na ata kəskəra mdərkəyirni.

⁵Mdər hwi na ana hwihwi, amzhi wutə watsəɓa wa, tar ma tsa ku nu tsawayeri.

⁶Ai kalkal ka mdər tsuhwa na ku hara kəthlər ka duna, an wutə riɓar fakə ni na ntangkəma.

⁷Dzama ata kəra su tə I akwa pəla ala gə ni, kamnyar Mthlaku ata na gə dunar nggaɓəla shanga su.

⁸Ka gə ɗangtə Yesu Kristi, na ku thlata akwa mtəmta, na thlata akwa nyarmbwar Dauda, apatə I ku ngkər akwa labar na msəra ani.

⁹Kamnyar labar na ngəni msəra tə I akwa ngkərari ni antə I akwa ɗar bwani ngəni, har ka məsəsal akwa səli apa I mdər hara ɗimikur ni. Amma ndərər Hyel aɗi akwa məsəsal wa.

¹⁰Antə I ata nggitə shanga su ma ku ndzi abbər ata hara ka mji wutə mbantədzi ka wutə səli na akurkur wa atar Kristi Yesu ni.

¹¹Gari ngəni ni jiri, na pəla, “Ma mburu ku mti ata kəma duku ka tsa, mburu ata sə ndzi ka mpika ata kəma duku ka tsa.

¹²Ma mburu ku nggita, mburu ata sə hara kuthlikur ata kəma duku ka tsa. Ma mburu ku kampikər ni, tsa ata kampikər mburu.

¹³Wala ma mburu ndzi kula jirkur tsu tsa ata ndzi ka jirkur, kamnyar tsa amzhi kampikər kərni wa.”

¹⁴Ka gə ɗangta ala ɗa suayeri ngəni, ka gə tsaktə ɗa akəma Mthlaku, abbər da aɗiya beɗi ata kəra ndərayeri wa, kamnyar ampaniyari aɗi wa, tar ka tsa hilantə mjir nggari daci.

¹⁵Ka gə vu duna gə swaiswai ka wuta abbər ga ku ndzi mdə tə Hyel ata mzhi mbərsa ka tsa. Ka gə ndzi mdər kəthlər na aɗi ata ləkwa səli ata kəra kəthlərərni wa, ka gə thlipə ndərər Hyel akwa laku na kalkal ka jirkur.

¹⁶Ka gə hwi shanga gariyayeri na aɗi ata haptə səliyir Hyel wa, kamnyar jili gari ngəni ana vu ka mdə vərvər hara ciju ka Hyel.

¹⁷Tsuwa jili gari ngəni ana ndzi apa daɓwa na ana bəzəka ka kwasəmnya kumər dza mda. Tsuwa Himenayus ka Filetus ana hara jili gari ngəni.

¹⁸Da ku pəramta kazhar jirkur, akwa pəla ai mdə ku kurtə thlata akwa mtəmta, ka ndəndatə mji laga akwa hamta jirər ɗa.

¹⁹Amma jirkur ar Hyel tsu athləthlatə gyang apa səla mbwa tə mdə nci ka pela, ka rəbutə ngəni ata na akwa pəla, “Mthlaku asəndə mji na arni.” Ka tsuwa abbər, “Ka kəlara mdə na ana kamnya thləma Mthlaku zhar hara ɗimikur.”

²⁰Akwa kəyir mdər gəna, aɗi tasayeri tə mdə nam ka dinar wala adzərfa daci antə mda ana wutə wa, amma kugwayeri aɗi tə mdə nam ka udzəm, wala həi. Laga mdə nam ni kamnyar kəthlər na ka daraja, laga tsuwa kamnyar kəthlər na kula daraja.

²¹Apani kəlara mdə na ku kəcimta kərni kazhar suayeri na kula daraja, tsa ata ndzi kari kəthlər na ka daraja, kari tə mdə vəi dzak kamnyar ka mdərkəi an kəthlər kəgari, na ɗəmhəɗəmhari kamnyar shanga kəthlər na ɓɗakɓɗaku.

²²Apani ka gə hwi ta nggukayeri na ar dakwikur, ka gə vu hangkala ga akwa bara ndzi mdə na ka jirkur, ka hamta jiri, ka hirkur, ka msərakur, ata kəma duku kəga mji na ana vəngkər səli aka Mthlaku ka ɗəffa ɗa kəcəkəcari.

²³Amma ga aɗiya hir ka su paktə nga ka beɗiyayeri na gapangapani kula kər wa. Kamnyar gə ma ga ku sənda abbər da ana kura akwa mpa.

²⁴Tsuwa aɗi kalkal ka mdər kəthlər ar Mthlaku ndzi mdər beɗi wa, amma tar ka tsa ndzi ka hangkal aka waskəi, ka maləm na asəndə thlipə su, tsuwa ka tsa ndzi mdər mbwiɗəffu.

²⁵Tsuwa ka tsa ndzi mdər mzhi ngkərwa dawayeri arni akwa kutar hangkalkur. Kamnyar nuhum Hyel asə na ala ɗa lakur tubi ka da sə səndə jirkur,

²⁶ka sə ngka akwa hangkala ɗa, ka msər ta dərkur Shatan. Kamnyar hwatu shatan ku kurtə ka ngkəi ɗa ka namtə ɗa mjir hara kəlara su tə tsa hira.