Read bura-pabir 2 Timothli 3 Bible Online

2 Timothli 3 - bura-pabir bible

2 Timothli 3

¹Amma ka gə sənda abbər akwa virayeri na akwa kurari, mji ata sə ɗar bwani ka duna.

²Kamnyar mji ata sə hir kəra ɗa daci, ka hir kwaba. Da ata sə ndzi mjir gaya, mji na hir haptə kər, mjir nggənggəl mda, mjir mula aka mji na ya ɗa, mji na kula gwaɗita, ka mjir nggəlar shanga su na ɓɗakkarkara.

³Da ata ndzi mji na kula kətadza, mjir kəsi mda akwa kuta, mjir hilantə thləma mdə, mji na kula ngkahədzi, mji na kəmanggar, mji na ana hir su na ɓɗaku wa.

⁴Da ata ndzi mjir ɓəli alkawal, mji na kula hangkal, mji na ku təksanta ɗəffa ɗa, mji na hir ngga msərakur ta hir Hyel.

⁵Akəma mji da ata namtə kərɗa apa da mjir nu Hyel, amma surharar ɗa akwa ncantə da akwa nggəlar dunarni. Ka gə hwi jili mjir hara su apani.

⁶Kamnyar har mji laga akwa nca ɗa ana ləvəyar mji, ka ləɓtə ɗəffa mwanki natə kəra ɗa aɗi ɗəwul wa, natə biku ku təra kərathla ɗa, mwanki tə nggukər su ana dəɓar ndəkərəmta hangkala ɗa wa.

⁷Tədəku mwanki ngəni akwa thlipə su, amma ba kulini da aɗi nggaɓəla jirkur ni wa.

⁸Kamnyar tsu apatə Yannes ka Yambres ku nggəlar ndərər Musa, antə mji ngəni ku nggəlar jirkur. Da mji tə kəra ɗa aɗi dzəpu wa, kamnyar da aɗi ka hamta jiri na jirari wa.

⁹Amma da aɗi ata ləkəma kəgari ka fəi wa, kamnyar vəi cakukurər ɗa ni ata sə səɓəla ata bəbal, tsu apa ar Yannes ka Yambres nda.

¹⁰Amma ar nga, ga ku nu surthlipərna, ka wutə laku tə I ana ndzi akwa, ka səndə su tə I vəi akəmi. Ga asəndə hamta jirərna, ka mbwiɗəffərna, ka laku tə I hir mji akwa, ka laku tə I nggitə su akwa.

¹¹Ga asəndə jili bwaniyayeri tə mji hara ali, ka bwaniyayeri tə I ɗari. Ga asəndə bwaniyayeri na wutə ra ahar Antakiya, ka Ikoniya, ka Listəra. Amma Hyel ku msərantə ra akwa shanga ɗa.

¹²Jiri, kəlara mdə na akwa bara ndzi mdər nu Hyel atar Kristi Yesu, tsa ata ɗar bwani.

¹³Amma mji na ɗimi ɗimi kəga mjir pwaktə mda, na ana bara ndzi su laga, ata sə vərvər ləkəma akwa ɗimikur ni, da akwa pwaktə mji, tsuwa mji akwa pwaktə ɗa.

¹⁴Amma ar nga, ka gə ləkəma ka ndzi ka jirkur akwa su tə gə thlipta, ka hamta jiri akari ni, təng tə ga asəndə mji tə gə thlipta akəla ɗa ni.

¹⁵Ka gə ɗangta abbər təng sakatə gə tsu ɓzəngkyar, antə gə səndə Kakaɗayeri na Ɓɗakkarkara, na ata mzhi thlipa aka mdə lakur wutə mbantədzi atar hamta jiri aka Kristi Yesu.

¹⁶Shanga ndərayeri tə mdə rəbuta akwa Kakaɗər Hyel ni da an ndərər Hyel, antə kalkal ka mdə kəthlər kəgari kamnyar thlipa, ka tsaktə mda, ka ngkərwa mda, ka thlipə lakur ndzi ka ɓɗakkur aka mda,

¹⁷kamnyar ka mdər Hyel ndzi nghyinghyari ka ɗəmhəɗəmhari kamnyar hara kəlara kəthlər na ɓɗaku.