Read bura-pabir Ibrani 1 Bible Online

Ibrani 1 - bura-pabir bible

Ibrani 1

¹Waci, Hyel ku kəɗar gari aka kəkayeri ar mburu atar naɓiyayeri akwa lakwayeri zumzum.

²Antə kulini akwa virayeri na akwa tsikərari ni tsa gari ala mburu atar Ɓzər ni. Atar Ɓzər ni antə Hyel ku namtə duniya ka shanga su na akwa. Tsuwa tsu tsa antə Hyel carɓəla abbər ka shanga su ndzi arni.

³Tsa an akwa hamta parakəu ar səliyir Hyel, tsuwa tsa an dludzər Hyel ni, tsuwa tsa akwa kəsi duniya ni ka shanga su na akwa atar ndərərni na ka duna. Aghəla tə tsa ku kəcimta mji ta bikayeri, antə tsa ndzəndzi amtazi atar mazəma Hyel, na ka Səli ta Shang.

⁴Atar apani antə Ɓzər Hyel ku wutə olkur na təramta ar mjirthlentərhyel, tsu apatə thləm tə Hyel na alari ni ku təramta arɗa ni ka daraja.

⁵Kamnyar Hyel aɗi ɗar pəla aka mdərthlentərhyel laga abbər, “Ga an Ɓzərna, ashina I ku ndzi Təddar nga.” Tsuwa mda aɗi tə Hyel ɗar pəla alari abbər, “I ata ndzi Təddarni, antə tsa ata ndzi Ɓzərna” wa.

⁶Amma sakatə tsa akwa thlentə Ɓzərni na yarakəma akwa duniya ni, tsa pəla, “Ka shanga mjirthlentərhyel vəngkər səli alari.”

⁷Tsuwa ata kəra mjirthlentərhyel ni, Hyel pəla, “Hyel ana mzhi namtə mjirthlentərni ka da ndzi apa shambar, ka mafayeri arni ndzi apa kyanggyara u'u.”

⁸Amma aka Ɓzər ni, tsa pəla, “Dəkəl kuthlikurər nga, gə na Hyel ni, ata ndzi har ba saka madi. Zwalər jirkur an zwalər kuthlikurər nga.

⁹Jirkur antə ga ana bara ka mdə hara, ga ku nggəlar wutə mda akwa hara ɗimikur! An su na hara tə I na Hyelər nga ku carɓəla ngə ni, ka fəi kəma ga ka malər kucali, ka haptə səliyir nga ta nvwa nga.”

¹⁰Tsuwa tsa ku pəla abbər, “Təng akwa baɗitari, Mthlaku antə gə nci səla duniya, ka namtə vəyayeri na amtazi ka tsiya ga.

¹¹Da ata sə sha, amma ar nga gə tsu aɗi, shanga ɗa ata sə hala apa zhaɓi.

¹²Ga ata sə pərtə ɗa apa ləptu, mda ata sə pal ɗa apatə mda ana pal ləptu. Amma ar nga, ga aɗi ana palidzə wa, məva ga ana kurkur wa.”

¹³Hyel aɗi ɗar pəla aka mdərthlentərni abbər, “Ndzəndzi abwa mazəmi, tar mi ku namtə dawayeri ar nga ka da ndzi kulahər putə səla gə” wa.

¹⁴Jiri, shanga mjirthlentərhyel ni mambəlayeri ar kəthlər daci. Antə Hyel ana thlentə ɗa ka da ra dlar mji na ata sə wutə mbantədzi ni.