Read bura-pabir Ibrani 10 Bible Online

Ibrani 10 - bura-pabir bible

Ibrani 10

¹Kamnyar təng tə tsawu ni an dludzi daci ar suayeri na ɓɗakɓɗaku na ata si akəmazi, tsa aɗi an na jirari ni wa. An su na hara tə saɗakayeri natə mda ana hamta sakanda ata məva ata məva ni, aɗi mzhi kəcimta bikər mji na si akwa vəngkər səli ni wa ni.

²Kamnyar ma abbər saɗakayeri ni an mzhi kəcimta bikər mjir vəngkər səli ni ka duku daci, tə da aɗi akwa jaktə ngga apa da tsu ka biku wa, ai sakani mdə ku zhar ləkəma ka hamta saɗaka ni.

³Amma saɗakayeri ni akwa dingngga vu ka mji dzama ata kəra bikər ɗa məva ata kəra məva ni.

⁴Kamnyar mamshir gyalayeri ka kwiyayeri amzhi kələmta bikayeri wa.

⁵Apani sakatə Kristi ku si akwa duniya, tsa pəla, “Aɗi saɗakayeri kəga sur hamta antə ga akwa barari wa, amma dza tə gə ɗəmha ali ni.

⁶Ga aɗi akwa nggatə msərakur ar saɗaka mbamba ka saɗakayeri damwa na ar kəcimta biku wa.

⁷Antə I pəla abbər, ‘Nggədza ra, Hyelərna I ku si kamnyar kəi hara apatə gə hira, apatə mdə ku rəbuta ata kəri akwa Kakaɗər nga.’ ”

⁸Ntangkəma tsa pəla abbər, “Ga aɗi bara saɗakayeri, wala sur hamta, wala saɗaka mbamba, wala saɗakar kəcimta biku wa, tsuwa ga akwa nggatə msərakurər ɗa wa.” Tsa pəla apani wala tə tsawa an thlamta abbər ka mdə hara.

⁹Antə tsa jaktə pəla abbər, “Nggədza ra, I ku si kamnyar kəi hara su tə gə hira.” Ngəni akwa ncanta abbər mdə ku vəi tsawu na ntangkəma ni athlimbəli, kamnyar ka mdə vətə na suɗkurari ni.

¹⁰Kamnyar su tə Hyel akwa barari an ka mburu ndzi kəcəkəcari ɓɗakkarkara atar saɗakar dza Yesu Kristi natə tsa hara ka duku daci ni.

¹¹Kəlara viri pristayeri ni ana thləthlata kamnyar hara kəthlərər ɗa, ar hamta saɗakayeri na jili duku ata kər ata kər, saɗakayeri na amzhi kələmta biku wa.

¹²Amma sakatə Kristi ku hamta saɗaka duku daci kamnyar bikər mburu, antə tsa ndzəndzi abwa mazəma Hyel.

¹³Təng akwa saka ndaga tsa akwa sək ka mdə vu ka dawayeri arni ndzi kulahər putə səlari.

¹⁴Kamnyar atar saɗaka ngəni duku ni, tsa ku namtə mji tə mdə kəcimta ɗa tə da ndzi kəcəkəcari ndəlang ba saka madi.

¹⁵Antə Mambəl na Ɓɗakkarkara tsuwa ku hara ala mburu seɗa ata kərari. Kamnyar ntangkəma tsa pəla,

¹⁶“Ngəni an alkawal tə I ata harari ka mjirna ni vir nda, ndə Mthlaku. I ata sə pu tsawayeri arna akwa ɗəffa ɗa, kəi rəbutə ɗa tsuwa akwa kəra ɗa.”

¹⁷Antə tsa jaktə pəla tsuwa abbər, “I aɗi ata ɗangtə bikayeri arɗa, kəga sur harar ɗa na ɗimi ni kəra wa.”

¹⁸Apani ma mdə ku kurtə ka tifəmta biku aka mda, mda aɗi ata jaktə tur saɗaka kamnyar kəcə biku kəra wa.

¹⁹Kamnyar ngəni maɗama'na, mburu ku mbərsa abbər mburu ata ləkwa Vəi na Ɓɗakkarkara ta Shang ni atar mamshir Yesu.

²⁰Tsa ku kəlar ala mburu lakur mpika na bilənari, atar lapəli na ntaudzi na ndzi apa dzari ni.

²¹Tsuwa mburu ka prist na ola natə tsa an ata kəra kəyir Hyel ni.

²²Antə apani ka mburu shahədzi kudzəhə ka Hyel ka ɗəffər jirkur, ka hamta jiri na gyang. Ka mburu shahədzi ka ɗəffu natə mdə ku kəcimta ni ta watsəɓər biku, ka dza natə mdə ku kəcimta ka yimi na ɓɗaku.

²³Ka mburu kəsi su tə mburu akwa vəkər kəgari ni, natə mburu ana pəla ni, ɓəɓal kula kənggərardzi, kamnyar mdə na hara ala mburu alkawal ni tsa ka jirkur.

²⁴Ka mburu dzama ata kəra lakwayeri tə mburu ata mzhi dunautə nvwa mburu akwa hirkur ka hara ɓɗakkur.

²⁵Mburu aɗiya nggəlar hara tsaptədzər vəngkər səli natə mburu tsəli kəgari ni wa, apatə mji laga akwa harari ni. Amma ka mburu ləkəma akwa ntsantə nvwa mburu, ka mburu jakjakə harari ata kər ata kər, apatə mburu akwa wul Vir ni akwa hara kudzəhə ni.

²⁶Kamnyar ma mburu ata hara biku dzakdzakku aghəla tə mburu ku kurtə səndə jirkur, saɗaka damwa aɗi tə mdə ɗəmha kamnyar kələmta biku kəra wa.

²⁷Su na mbila an shariya na mwavər na ata thlivərantə mda, ka u'u na mwavər na ata mbamta mjir nggəlar ndərər Hyel.

²⁸Kəlara mdə na ku ɓəli tsawur Musa mda ata tsi ni kula kətadza, ma har mji suɗa wala makər ku hamta seɗa ata kərari abbər tsa ku hara biku jiri.

²⁹Apani ata ndzi mwavər ka duna aka mdə na ku rutə Ɓzər Hyel, ka gyal ka mamshir alkawalər Hyel na kəcimta ni ta biku, ka mnya ɗimi ata kəra Mambəl na Ɓɗakkarkara!

³⁰Kamnyar mburu ku səndə mdə na pəla abbər, “Ntə dawa an surna, I an ata ntəmtari.” Tsuwa tsa jaktə pəla, “Mthlaku ata sə hara shariya aka mjirni.”

³¹Tsa sur thlivər diya ka mdə tərkwa tsiya Hyel na ka mpika!

³²Amma ɗangtə giri virayeri na təramta nda bu. Aghəla tə giri ku wutə parakər Hyel ni, giri ku nggitə bwani jiri, ka kəɗar shul bwaniyayeri zumzum.

³³Mdə ku nggənggəl giri ka hara ala giri bwani ata bəbal. Saka laga tsuwa giri ana hir paktə kər ka mji na akwa ɗar bwaniyayeri apani.

³⁴Tsuwa giri ku kətadzə mji na ku ɗar bwani akwa pərsəna, ka hara kucali sakatə mdə dlutsə kariyir giri, kamnyar giri ku sənda abbər giri tsu ka su hang na təramta ndaga ka ɓɗakkur na ata ndzi ba saka madi.

³⁵Antə dza giri aɗiya mtə wa, kamnyar tsa ka watsəɓə na ola.

³⁶Amma tar ka giri nggita kamnyar ka giri mzhi hara su tə Hyel akwa barari, ka giri sə dlu su tə Hyel hara alkawalari ni.

³⁷Kamnyar apatə kakaɗu ku pəla abbər, “Aɗi ata fəi wa, tsa na akwa si ni ata si kula shamta saka.

³⁸Antə mjirna na ka jirkur ata wutə mpika atar hamta jiri. Amma mdə na ku shinadzə bwahili I aɗi ata nggatə msərakurərni wa.”

³⁹Amma ar mburu, mburu aɗi jili mji na ana ngka ka bwahili, ka sha ni wa, amma mji na ka hamta jiri, na ata wutə mbantədzi.