Read bura-pabir Ibrani 11 Bible Online

Ibrani 11 - bura-pabir bible

Ibrani 11

¹Hamta jiri an ndzi ka mbərsa ata kəra suayeri natə mburu vu akwa ɗəffa mburu, tsa an ndzi ka mbərsa ata kəra suayeri tə mburu aɗi wutə ka nca wa.

²Atar hamta jiri antə mji na waci mzhi wutə mdəkur ata nca Hyel.

³Atar hamta jiri antə mburu ku nggaɓəla abbər atar ndərər Hyel antə mdə alaktə duniya ka shanga su na akwa, apani su tə mburu akwa wutari ni səɓəla akwa su tə mburu amzhi wutari wa.

⁴Hamta jiri an hara tə Habila ku hamta saɗaka aka Hyel ɓɗakta ar Kayinu. Atar hamta jirərni ngəni antə Hyel namtə ni abbər tsa mdə na ka jirkur, kamnyar Hyel ku dlu cautərni. Jiri Habila ku mti, amma atar hamta jiri tsa tsu akwa gari.

⁵Atar hamta jiri antə mdə kətə Enok ka ləmta ka tsa, antə tsa aɗi mtə wa. Tsuwa mda aɗi wutə ni wa, kamnyar tə Hyel ku kətə ni. Kamnyar akəmata Hyel akətə ni ni, mdə ku pəla abbər tsa ku hara su na kəskəra Hyel.

⁶Tsuwa ma kula hamta jiri, mda aɗi na amzhi hara su ka kəskəra Hyel wa. Kamnyar kəlara mdə na akwa bara si adzə Hyel, tar ka tsa hamta jiri abbər Hyel aɗi, tsuwa tsa andər hamta watsəɓa aka mji na ku bara ni ka jirkur.

⁷Hamta jiri an hara tə Nuhu nggatə tsaktə tə Hyel hara alari ata kəra suayeri tə mda aɗi wutə katagu wa. Apani tsa ku kələngkər aka Hyel, ka martə shar ni kamnyar mbantə mjir kutakəyirni. Atar ngəni Nuhu ku ncanta abbər shanga mambila mjir duniya ni ku hara biku, tsuwa arni tsa ku ndzi mdər fa kifər jirkur na thlata atar hamta jiri.

⁸Hamta jiri an hara tə Ibrahim kələngkər aka Hyel sakatə tsa kəga ni abbər ka tsa ləɓəla, ka mwari akwa tsəɗi natə tsa ku hara alkawalər hamta alari apa kifa. Ibrahim ku ləɓəla kazhar tsəɗiyirni kula səndə vəi tə tsa akwa mwari akwa.

⁹Atar hamta jiri antə tsa ndzi apa mətəpi akwa tsəɗi tə Hyel hara alari alkawalari ni. Antə tsa ku ndzi akwa tentayeri ni ata vəi duku ka Ishaku ka Yakub, mji na fa jili kifər alkawal tsu apa tsa ni.

¹⁰Kamnyar Ibrahim akwa putə ncari ata bərni natə mdə ku vəi səlari ɓɗaku, natə Hyel an ɗəmha ka hənta.

¹¹Atar hamta jiri antə Saratu ku wutə dunar kətə hur, wala tə sakarni ku təramta, kamnyar tsa ku sənda abbər mdə na hara alkawal ni ka jirkur.

¹²Antə apani, atar mdə duku, na ku hali har ka mzhitə mnya mta, mdə ku yaɓəla nyarmbwa na ka mji hang apa sasəlkayeri na ata kutahyel, ajikatədzi wa apa wuyakər mnya manda.

¹³Shanga mji nayeri ni ku mti tsu akwa hamta jirər su tə Hyel hara ala ɗa alkawalari ni. Da aɗi dlu su tə Hyel hara alkawalari ni wa, amma da ku wutə ni tsu ciju, ka nggatə msərakur wutari, har ka hamta seɗa ata bəbal abbər da mətəpi ka mjir lənggu akwa duniya ngəni ni.

¹⁴Kamnyar mji na akwa gari apani ni ku ncanta ata bəbal abbər da akwa bara tsəɗi na ar kəra ɗa.

¹⁵Ma abbər da an tsu akwa bara tsəɗi tə da zhari aghəli ni, ai sakani da ku ngka təng ɗəm.

¹⁶Amma su na hara an, da akwa bara tsəɗi na ɓɗakta ndaga, watau tsəɗi na amtazi ni. Antə apani Hyel aɗi akwa ngga ka mdə kəga ni abbər tsa Hyelər ɗa wa, kamnyar tsa ku namtə ala ɗa bərni laga.

¹⁷Atar hamta jiri antə Ibrahim hamta saɗaka ka ɓzərni Ishaku, sakatə Hyel akwa ngkərtə ni ni. Apani Ibrahim tə Hyel hara alari alkawal ni, ku ndzi ɗəmhəɗəmhari kamnyar hamta saɗaka ka ɓzərni na duku shini ni,

¹⁸wala tə Hyel ku pəla aka Ibrahim abbər, “Atar Ishaku antə ga ata wutə kəkayeri natə I hara ala gə alkawalari ni.”

¹⁹Ibrahim akwa dzama abbər wala ma Ishaku an mta, Hyel ata mzhi thlentə ni akwa mtəmta. Antə mda ata mzhi pəla abbər Ishaku ku mti, antə Hyel thlentə ni ka mpika, ka hamta ni aka baba'ni Ibrahim.

²⁰Atar hamta jiri antə Ishaku vədzə barka aka Yakub ka Isuwa ata kəra suayeri na ata si akəmazi.

²¹Atar hamta jiri antə Yakub vədzə barka aka maɗa' Yusuf pal pal akwabə tsa amta, ka vəngkər səli aka Hyel, sakatə tsa rwatidzi ata kəra zwalərni

²²Atar hamta jiri antə Yusuf, sakatə tsa abaka mta, ku gari ata kəra ləɓəlar mjir Israila akwa Masar, ka pəla ka da sə fatə ɗethlərni ma sakatə da akwa təra.

²³Atar hamta jiri antə mji na ya Musa ku ɗuwar ni mnyar thliya makər, aghəla tə da yaɓəla ni. Kamnyar da wuta abbər ɓzər ni dakwi, tsuwa da aɗi akwa thlivər tsawur kuthli ni wa.

²⁴Atar hamta jiri antə Musa, sakatə tsa ku kəla, ku nggəlar ta mda akəga ni ɓzər ngkwar kuthli.

²⁵Tsa wuta abbər kuji ka tsa ɗar bwani kəga mjir Hyel, ta ka tsa nggatə msərakur ar saka laga raka, ka fangkər kələr biku ata kərari.

²⁶Tsa wuta abbər kuji ka tsa ɗar bwani kamnyar Kristi ta ka shanga gənar Masar ni ndzi arni, kamnyar tsa akwa putə ncari ata watsəɓə na olari akəmazi.

²⁷Atar hamta jiri antə Musa ku zhar Masar kula thlivər ɗəffə bwarbwarkur ar kuthli. Tsa thləthlatə ka duna nggita akwa nggitə shanga su, apa tsa akwa wul Hyel na awutədzi wa ni.

²⁸Atar hamta jiri antə tsa ku vəi Kucalər Fəlɓəla Kəi, ka tsawa abbər ka mdə pshitə mamshi ata nyarfayeri, ta Sur kurəmta yarakəma ni asə tsəkwar mjir Israila.

²⁹Atar hamta jiri antə mjir Israila mzhi təramta akwa Manda Duwathlu, ata di na ul'ulari. Amma sakatə mjir Masar pəla da ata təramta akwa tsuwa, təng yimi ni jaktə ngka ka pungkərdzi ata kəra ɗa ka kurəmta ɗa.

³⁰Atar hamta jiri antə mjir Israila ku mwa ka kalaktə katanggar Yariko mnyar vir murfa, antə katangga ni ku ndla ka ɓəgələmtadzi.

³¹Atar hamta jiri antə mda aɗi tsi Rahab na karwa ni, ata kəma duku kəga mji na nggəlar kələngkər aka Hyel ni wa, kamnyar tsa ku dlu mjir wul ashira tsəɗi ni ka kucali.

³²Antə man tə kəi pəla damwa ri? Saka aɗi ali kəi gari ata kəra Gideyon, ka Barak, ka Samsən, ka Yefthla, ka Dauda, ka Samiwal, ka naɓiyayeri ni wa.

³³Atar hamta jiri antə mji ngəni ku mpa ka səm kuthlikurayeri, ka ncantə jirkur akwa kəthlərər ɗa, ka dlu su tə Hyel hara alkawalari ala ɗa, ka hartə mnya tsəngiyayeri,

³⁴ka tsəgəi u'u na mwavər, ka msərəmta mtər katsakar. Wala tə da kula duna ni, da ku wutə duna, ka ndzi katsalayeri na ol'ola akwa mpa, har ka kədləmta sojayeri ar tsəɗi damwa tə da putə hwi ka təra.

³⁵Atar hamta jiri antə mwanki laga ku jaktə dlu yangkura ɗa natə mdə thlenta akwa mtəmta. Amma mdə ku hara bwani aka mji laga akwa nca ɗa, tə da nggəlar shinadzə bwahili aka Hyel ka mdə msərantə ɗa ni. Da nggəlari, kamnyar da akwa bara ka mdə sə thlentə ɗa ka da wutə mpikə na təramta ngəni.

³⁶Apani mji laga ɗar bwani atar mnya ɗimi, ka dlaɓwa, mji laga har mdə ku hambwa ɗa akwa pərsəna, ka mbwamta ɗa akwa məsəsal.

³⁷Mdə ku ndzəndzəh mji bwaduku ka pela, ka thlagau ɗa ka bwa suɗa ka zartau, ka tsəgəi bwaduku ka katsakar. Bwadukwa ɗa ku ndzi kula su, har da akwa ha kəsəm təmayeri, ka ar kwiyayeri ka kadlə kəgari. Apani da ku ndzi mji turtura, akwa ɗar bwani, taratarari.

³⁸Har da ku ndzi ɓɗakta da andzi akwa duniya ni, tə da akwa kadla akwa mtakəu kəga garayeri, akwa pi akwa kur pela kəga kuayeri na akira di.

³⁹Shanga mji ngəni ku hara thləm na ɓɗaku kamnyar hamta jirər ɗa, amma wala apani mda aɗi wala duku akwa nca ɗa na ku dlu shanga su tə Hyel hara alkawalari ni wa.

⁴⁰Kamnyar Hyel ku ɗəmhə su na ɓɗakta ni ala mburu, tsuwa tsa aɗi akwa bara ka da wutə su tə da mwaɓta atar hamta jirər ɗa ni kula mburu akwa wa.