Read bura-pabir Ibrani 12 Bible Online

Ibrani 12 - bura-pabir bible

Ibrani 12

¹Antə təng tə mburu ka dlamar mjir seɗayeri hang na ku kalaktə mburu ni, mburu apumta shanga suayeri na akwa ngkatə mburu ni, ka biku na ku bartə dza mburu ɓəɓal ni, ka mburu putə hwiyir akəlakəla na akəma mburu ni ka nggitər su.

²Ka mburu putə nca mburu ata Yesu, na nggilanga hamta jirər mburu ka tsuwa mdər nghyaɓəla ala mburu hamta jirər mburu ni, natə kamnyar kucali na akəmari tsa ku nggitə udzəm kadləkadla. Apani tsa ku namtə sur səli abbər su laga wa, antə kulini tsa andzəndzi abwa mazəma dəkəl kuthlikurər Hyel.

³Wul giri laku tə Yesu mbwi ɗəffari ata kəra ɗimikur tə mjir biku hara alari ni bu, abbər tsu nggwa giri aɗiya ghər ka pumta su tə giri akwa harari ni wa.

⁴Kamnyar akwa mpar giri ka biku ni, har ba kulini nggitə sur giri aɗi mwanta aka tə mdə tsi giri wa.

⁵Nənga giri ku fwari gariyir dunautə mda tə Hyel hara ala giri sakatə tsa akwa gari ala giri apa maɗa'ni nə ri? Kamnyar tsa pəla, “Ɓzərna, ga aɗiya gyal ka ɗya tə Mthlaku akwa hara ala gə wa, wala ka dza gə mta sakatə tsa akwa ɗi ngə wa.

⁶Kamnyar Mthlaku ana ɗi mdə tə tsa hirhira, ka ɗi kəlara ɓzər tə tsa ku dluwa.”

⁷Nggitə giri bwani tə giri akwa ɗarari ni, kamnyar bwani ana thlipə su aka mda. Ka giri sənda abbər Hyel akwa ɗi giri apa giri maɗakutari. Nənga ɓzər madi an ama kula baba'ni ana ɗi nə ri?

⁸Kamnyar ma har mda aɗi ɗi giri apatə mda ana ɗi shanga maɗangkyar wa, to, giri ata ndzi miɗar, amma aɗi maɗa' kutakəi wa.

⁹Bamnda ngəni ma, ai mburu ka təddayeri na abwar dza na ana ɗi mburu, tsuwa mburu ana na ɗa səli. Azha aɗi kuji ka mburu kələngkər aka ɗya na ar Təddar mburu na abwar mambəl ni, kamnyar ka mburu ndzi ka mpikə wa ya?

¹⁰Kamnyar təddayeri ar mburu na abwar dza ana ɗi mburu mnyar məvayeri laga raka, akwa laku tə da wuta abbər tsa təramta ala ɗa. Amma ar Hyel tsa ana ɗi mburu kamnyar dlar mburu, kamnyar ka mburu sə ndzi ɓɗakkarkara apa tsa.

¹¹Kəlara ɗi tə mda ana hara ala mburu, akwa sakari ni tsa ana kəta, aɗi msəra wala raka wa. Amma aghəla nda, tsa ana səntə watsəɓər jirkur ka msərakur aka shanga mji na ku thliptə su atar ɗi ni.

¹²Kamnyar ngəni antə ka giri haptə tsiya giri na ghərghərari, ka giri dunautə ɓunja giri na kula duna.

¹³Ka giri namtə lakwayeri ar giri kamnyar ta səla giri na abdala ni asə kuri ntsuɓəladzi, ata vəya ka da kuri ndzi lapiya.

¹⁴Ka giri vu duna giri akwa bara lakur ndzi ka msəra ka shanga mji, ka bara lakur ndzi kəcəkəcari akəma Hyel, kamnyar kula kəcəkəcəkur mda aɗi na ata wutə Mthlaku wa.

¹⁵Ka giri wuta abbər mda aɗi akwa nca giri na ata ndzi kula wutə ɓɗakkur na akəla Hyel ni wa. Tsuwa ka giri wuta abbər mda aɗi na ndzi apa nfu na ɗəɗahu na ata kəla, ka sənta ala giri damitədzi, ka hilantə mji hang wa.

¹⁶Tsuwa ka giri hara hangkal ta mdə laga akwa nca giri asə ndzi mdər ləka, wala nggəlar Hyel apa Isuwa, na ɗələmta olkur ar yarakəmakurərni ata kəra susəmər kwatam duku daci ni.

¹⁷Kamnyar aghəla nda apatə giri asənda, tsa ku sə bara ka tsa dlu barka akəla baba'ni, amma mda aɗi hira alari wa. Kamnyar tsa aɗi wutə lakur tubi ɗəm wa, wala tə tsa ku kiɗə barka ni har ka shimwi.

¹⁸Giri aɗi si adzə Gar Sinai natə mda ata mzhi wutari ka tsəkwar ni wa, wala adzə u'u na akwa mba vəlvəl, wala adzə kuthlu na mənggəl pələku, wala adzə zhimaru,

¹⁹wala adzə mbur təmbəl, wala kurakəu na akwa gari tə mjir nggari ni kiɗa abbər tsa aɗiya ləkəma ka gari ni kəra wa ni wa.

²⁰Da kiɗa apani ni, kamnyar da mzhi nggitə su tə mdə tsawa ala ɗa ni wa, abbər, “Wala an mwaɓi na ku tsəkwar gar ni, mda ata ndzəndzəh ni ka pela ka tsi ni.”

²¹Jiri vəi ni sur wul wa, kamnyar akwa thlivərantə mdə kamta, har wala Musa ka kərari ku pəla, “I ku yakatə ka duna kamnyar thlivəra!”

²²Amma giri ku si adzə Gar Sihiyona, adzə bərni na ar Hyel na ka mpika, watau Urushalima na amtazi ni, ka adzə mjirthlentərhyel na dlama dlama na ata vəi duku.

²³Giri ku si adzə tsaptədzər yarakəmayeri na maɗa' Hyel, natə mdə ku rəbutə thləma ɗa amtazi, adzə Hyel ka kərari na an alkali ata kəra shanga su, ka adzə mambəlayeri ar mjir jirkur natə mdə ku kəcimta ɗa ndəlang.

²⁴Giri ku si adzə Yesu ka kərari, mdər nam daɓwa mburu ka Hyel akwa sakar alkawal ngəni bilən ni, ka adzə mamshi ngəni tə mdə pshita, na akwa gariyir su na ɓɗakari təramta mamshir Habila ni.

²⁵Antə ka giri hara hangkal, ta giri anggəlar mdə na akwa gari ala giri ni. Kamnyar ma mjir Israila na nggəlar kələngkər aka mdər duniya na akwa tsaktə ɗa ni aɗi msər wa, apa madi tə mburu natə mdə na amtazi an akwa tsaktə mburu ni, ata sə msər ri?

²⁶Akwa saka ndaga kuraka Hyel ku kənggərantə duniya. Amma kulini tsa ku hara alkawal abbər, “I ata jaktə kənggərantə duniya ka pal ka damwa, tsuwa aɗi duniya ni shini wa, amma japu ka vəi na amtazi ni tsuwa.”

²⁷Ndər ngəni, “Ka pal ka damwa” ni akwa ncanta abbər mda ata famta suayeri tə mdə kənggərantə ni, watau shanga su tə Hyel alaktə ni, kamnyar ka suayeri na akənggərantədzi wan mbila.

²⁸Antə təng tə mburu akwa dlu kuthlikur na akənggərantədzi wa ni, ka mburu usar Hyel, ka vəngkər səli alari akwa laku na ata ndzi msəra alari, ka thlivər japu ka səlita,

²⁹kamnyar Hyelər mburu ni ndzi apa u'u na ana mbamta su.