Read bura-pabir Ibrani 13 Bible Online

Ibrani 13 - bura-pabir bible

Ibrani 13

¹Ka giri ləkəma ka hirdzi apa mji kəga maɗama' ɗa.

²Giri aɗiya nggəlar dlu mətəpi ka kucali wa, kamnyar atar apani har mji laga ku dlu mjirthlentərhyel ka wulwul ɗa kula da sənda.

³Ka giri ɗangtə mji na akwa pərsəna, apa giri an akwa pərsəna ni kəga da, ka ɗangtə mji tə mda akwa hara ala ɗa bwani, apa giri akwa ngga bwani ni akwa dza giri.

⁴Ka shanga mji namtə kəldzi ka tsa ndzi su na ka daraja. Ka sal ka mwala ndzi ka jirkur aka nvwani akwa kəldzi, kamnyar Hyel ata sə hara shariya aka mjir hara karwakur kəga mjir ləka.

⁵Ndəkəmta gir kər giri ka halər hir kwaba, ka su na akəla giri ni mzhi giri. Kamnyar Hyel ku pəla, “Ba saka madi I aɗi ata psəmta ngə wa, I aɗi ata fwari ata kəra gə hun wa.”

⁶Kamnyar ngəni mburu ata mzhi pəla su kula thlivəra abbər, “Mthlaku andər dlar ra, antə I aɗi ata thlivər wa. Man tə mda ata mzhi hara ali ri?”

⁷Ka giri ɗangtə mji na ol'olər giri, na ngkər ala giri ndərər Hyel. Ka giri wul laku tə da ndzəndzi akwa, har ka kuri tsikəra ndzəndziyir ɗa akwa, ka giri nu dəlpər hamta jirər ɗa ni.

⁸Yesu Kristi aɗi ana palidzə wa, apatə tsa aɗi naha, antə tsa aɗi ashina, tsuwa apani antə tsa ata ndzi har ba saka madi.

⁹Giri aɗiya zhar ka surthlipayeri na bilən bilən na ata shamta mdə ni kələmta hangkala giri wa. Kamnyar ata hara ɓɗaku ka giri wutə dunautədzi atar ɓɗakkur tə Hyel akwa harari, aɗi atar tsawayeri na ata kəra susəm wa. Kamnyar suayeri ngəni aɗi ana dlar mji na ana ɓəla ɗa wa.

¹⁰Tsuwa mburu ka bagaɗi ar hamta saɗaka natə pristayeri na ana kəthlər akwa mbwar vəngkər səli na ar duniya ni, aɗi ata mzhi səm su anda wa.

¹¹Kamnyar akwa tsawu na waci, pristayeri na ol'ola ana səntə mamshir mwaɓiyayeri akwa vəi na Ɓɗakkarkara apa saɗakar kələmta biku, ka da mbamta dza mwaɓiyayeri ni aɓəla ata hildi.

¹²Tsu apani tsuwa Yesu ku ɗar bwani ka mta ata hildi, kamnyar ka tsa kəcimta bikər mburu atar mamshirni.

¹³Antə mburu atəra mwari adzə ni aɓəla ata hildi ni, ka mburu ɗar jili bwani tə tsa ɗar ni.

¹⁴Kamnyar mburu aɗi ka bərni na ata ndzi ba saka madi akwa duniya ni wa, antə mburu akwa bara bərni na akwa si ni.

¹⁵Antə apani tar ka mburu dingngga hamta saɗakar huwa aka Hyel atar Yesu, watau ka mburu hu darajar thləmari ka mnya mburu.

¹⁶Giri aɗiya zhar ta hara ɓɗakkur wa, wala ndəkəi su tə giri kəgari kəga nvwa giri wa, kamnyar jili saɗakayeri apani ana ndzi msəra aka Hyel.

¹⁷Ka giri kələngkər aka mji na ol'ola ata kəra giri, ka giri nu su tə da pəla ala giri, kamnyar parang da akwa ɓəla mpika giri, kalkal apatə da ata sə hamta labar ar kəthlərər ɗa aka Hyel. Antə ka giri kələngkər ala ɗa kamnyar ka da mzhi hara kəthlər ni ka kucali, kula ɗəffə ɓzəɓza, kamnyar ma apani wa, da aɗi ata mzhi dlar giri wa.

¹⁸Ka giri hara ala yeru adduwa, kamnyar yeru ku mbərsa abbər ɗəffa yeru kəcəkəcari, tsuwa yeru akwa bara ka yeru hara su na kalkal akwa shanga ndzəndziyir yeru.

¹⁹Antə I akwa kiɗə giri ka ɗəffi shang abbər ka giri hara ali adduwa kamnyar ka Hyel hara kəi jaktə ngka adzə giri taktar.

²⁰Hyel ku thlentə Yesu na Mthlakər mburu akwa mtəmta atar mamshir alkawal na ba saka madi. Atar apani antə Yesu ku ndzi Mdər Ɓəla na Ola ar təma. I akwa kiɗa abbər ka Hyelər Msərakur ni nghyantə giri ka shanga su na ɓɗakɓɗaku kamnyar ka giri mzhi haratə su tə tsa akwa barari akəla giri atar Yesu Kristi ba saka madi. Amin.

²²I akwa kiɗə kəra giri maɗama'na abbər ka giri vədzə hangkala giri aka su tə I pəla ala giri akwa wasika ngəni raka ni.

²³Tsuwa I akwa bara ka giri sənda abbər mdə ku psi ɓzərma' mburu Timothli. Antə ma tsa ku si adzə ra ɗəm, yeru ata paktə mwari ka tsa ka yeru ra wuli giri.

²⁴Ka giri thlawar shanga mji na ol'olər giri, ka shanga mjir Hyel. Tsuwa maɗama' mburu na ahar Italiya akwa thlawar giri.

²⁵Ka Hyel kətadzə shanga giri ka tsa hara ala giri ɓɗakkur.