Read bura-pabir Ibrani 2 Bible Online

Ibrani 2 - bura-pabir bible

Ibrani 2

¹Antə tar ka mburu vədzə hangkala mburu aka su tə mburu nggatə ni, ta hangkala mburu asə ndəkəmtadzi kəgari.

²Kamnyar gari tə mjirthlentərhyel[1] pəla aka kəkayeri ar mburu ni an jiri, antə mdə ku ɗi kəlara mdə na ku nggəlar nggari, wala nggəlar kələngkər akari, apatə shariya thlamta.

³Ka, apa madi tə mburu ata msər ri, ma mburu ku nggəlar jili mbantədzi ngəni ol natə Mthlaku ka kərari an baɗitə psəmnya ala mburu ni? Kamnyar mji na ku nggatə labar ni ku hara seɗari abbər gari ni jiri.

⁴Tsuwa Hyel ka kərari ku jakəngkər seɗarni ata kəra arɗa ni atar hamta seɗayeri, ka surndatayeri, ka kəthlərayeri na ol'ola, ka atar hamta cautayeri na ar Mambəl na ɓɗakkarkara apatə tsa akwa barari.

⁵Tsuwa Hyel aɗi ɗəmha abbər ka duniya na ata si, tə mburu akwa gari ata kər ni ndzi akira mjirthlentərhyel wa.

⁶Kamnyar mdə ku pəla akwa vəi laga abbər, “Mdə mə laga ri har tə ga ana damitədzi ata kərari ri ni, ɓzər mdə ndzang tə ga ana wulwul ni ni?

⁷Gə ku namtə ni ka tsa ndzi aghəya mjirthlentərhyel mnyar saka laga raka daci, ka haptə səliyirni atar nar səli ka olkur,

⁸ka nar kuthlikur ata kəra shanga su.” Tsuwa tə Hyel pungkir shanga su akira kuthlikurərni ni, su aɗi ama kula tsa hamta alari kuthlikur ata kər wa. Wala tə kulini ni mburu aɗi akwa wutə laku tə shanga su akirari ni wa.

⁹Amma mburu ku wutə Yesu, natə mdə namtə ni tə tsa ndzi aghəya mjirthlentərhyel mnyar saka laga raka daci ni. Kulini mdə ku tsangkər alari dzakwar kuthlikur tə tsa ndzi ka səli ka olkur, kamnyar bwaniyir mta tə tsa ɗar ata vəya shanga mji ni, tsuwa ngəni an ɓɗakkur tə Hyel hara ala mburu.

¹⁰Kamnyar Hyel an namtə shanga su, antə shanga su ni arni. Antə ma ku ndzi abbər Hyel ata səntə maɗa'ni hang ka da wutə səli, ata hara ɓɗaku ka tsa kuri namtə mdə na baɗitə kəlar nyarmbwar mbantədzi ni ka tsa ndzi cipcippu atar ɗar bwani.

¹¹Kamnyar kulini Yesu na kəcimta mji ni, ka mji tə tsa kəcimta ɗa ni, shang ka təddar ɗa duku. An su na hara tə Yesu aɗi akwa ngga səliyir pəla abbər da maɗama'ni wa ni.

¹²Kamnyar har tsa pəla aka Hyel abbər, “I ata psəmnya thləma ga aka maɗama'na, kəi fwaltə nga akwa tsaptədzər mjir nga.”

¹³Antə tsa jaktə pəla, “I ata mbərsa ka Hyel.” Antə tsa jaktə pəla abbər, “Nggədza ra kəga maɗangkyar natə Hyel na ali ni.”

¹⁴Tsuwa təng tə maɗangkyar ni ma da mji na kum ka mamshi, antə tsa ndzi tsu apa da. Tsa hara apani ni kamnyar tar ma tsa ndzi mda kambəla tsa mzhi mta, kamnyar tar atar mtərni antə tsa ata mzhi ɓəli duna shatan na ka duna ata kəra mtə ni.

¹⁵Akwa laku ngəni antə tsa mbuli shanga mji na ndzi apa da akwa mafakur parang kamnyar thlivər mtə ni.

¹⁶Kamnyar mburu ku sənda abbər Yesu aɗi si kamnyar dlar mjirthlentərhyel wa, amma kamnyar dlar mji na kəkar Ibrahim.

¹⁷Apani ku ndzi dwali alari ka tsa ndzi apa maɗama'ni ni akwa kəlara bwa, kamnyar ka tsa ndzi Prist na ola na ka kətadza ka jirkur akəma Hyel. Apani antə tsa ata mzhi ndzi saɗakar kələmta watsəɓər bikər mburu.

¹⁸Antə təng tə tsa ka kərari ku ɗar bwani akwa sakar ngkərtədzərni ni, tsa ata mzhi dlar mburu akwa kəlara sakatə mburu ku ləkwa ngkərtədzi.