Read bura-pabir Ibrani 3 Bible Online

Ibrani 3 - bura-pabir bible

Ibrani 3

¹Kamnyar ngəni, maɗama'na na ɓɗakkarkara, giri natə Hyel ku kəga giri tsu ni, ka giri dzama ɓɗaku ata kəra Yesu na Aposəl ka Prist na ola, apatə yeru akwa ngkərari ni.

²Tsa ku ndzi ka jirkur aka Hyel na carɓəla ni, tsu apatə Musa ku ndzi ka jirkur akwa kəthlərərni akwa mbwar Hyel ni.

³Amma kalkal ka mdə na səli na olari aka Yesu ta Musa, tsu apatə kalkal ka mdər hən mbwa wutə daraja təramta mbwa tə tsa hən ni.

⁴Kamnyar kəlara mbwa na aɗi mdə laga an həna, amma mdə na hən shanga su an Hyel.

⁵Musa ku ndzi mafar Hyel na ka jirkur akwa kəthlərərni akwa mbwar Hyel, antə tsa ku gari ata kəra su tə Hyel ata sə pəlari akəmazi.

⁶Amma Kristi na Ɓzər ni, an ata kəra kutakəi ni swakti, tsuwa mburu an mjir kutakəyir Hyel ni, ma mburu ku ləkəma ka kəsi hamta jirər mburu ɓəɓal kula thlivəra, ka mbərsa ka su tə mburu akwa vəkər abbər mburu ata sə wutari ni.

⁷Antə tsu apatə Mambəl na Ɓɗakkarkara ku pəla, “Ashina, ma giri ku nggatə kurakari,

⁸giri aɗiya namtə ɗəffa giri ɓəɓal wa apatə kəkayeri ar giri ku hara, vir tə da ngkərtə ni akwa mtakə ni.

⁹Anda antə kəkayeri ar giri ku ngkərtə ra ka wutə kəthlərərna ar məva nfwarkumari.

¹⁰Apani ɗəffi ku ɓzi ata kəra ɗa, antə I pəla, ‘Parang da akwa sha akwa dzamər ɗa, da aɗi ana hir hara su tə I pəla ala ɗa wa.’

¹¹Antə ɗəffi ɓza har tə I kahyel abbər, ‘Da aɗi ata ləkwa vəi ghərəmtaghərərna ni cap wa.’ ”

¹²Maɗama'na, ka giri hara hangkal ta giri asə ndzi ɗimi, kula hamta jiri, har ka giri sə shinadzə bwahili aka Hyel na ka mpikə wa.

¹³Amma ka giri tsaktə nvwa giri tədək viri, akwa zaman tə mburu akwa “Ashina” ni, ta mda asə pwaktəmta giri atar biku, ka giri hara kər ɓəɓalkur.

¹⁴Kamnyar mburu ata ndzi mjir kəthlər ata kəma duku ka Kristi, ma mburu ku kəsi hamta jiri tə mburu kəgari akwa tsa ni ɓəɓal har kurər mpika mburu.

¹⁵Apatə kakaɗər Hyel pəla, “Ashina ma giri ku nggatə kurakari, giri aɗiya namtə ɗəffa giri ɓəɓal wa, apatə kəkayeri ar giri hara vir nda ni.”

¹⁶Tsuwa kəga wan nggatə kuraka Hyel, amma wala apani, da hara kər ɓəɓalkur nə ri? Aɗi mji tə Musa səɓəla ka da akwa Masar ni wa ya?

¹⁷Tsuwa kəga wa antə ɗəffa Hyel ɓza adzə ɗa akwa məva nfwarkumari nə ri? Aɗi ka mji na hara biku nda wa ya, mji na mtəgəmtadzi ka mshiyir ɗa leɓleɓu akwa mtakə ni?

¹⁸Tsuwa kəga wa antə tsa kahyel abbər da aɗi ata ləkwa vəi ghərəmtaghərərni wa nə ri? Ai tsu mji na nggəlar kələngkər alari ni.

¹⁹Apani mburu ata mzhi wuta abbər da aɗi mzhi ləkwa vəi ghərəmtaghərərni wa ni kamnyar tur hamta jirər ɗa.