Read bura-pabir Ibrani 4 Bible Online

Ibrani 4 - bura-pabir bible

Ibrani 4

¹Təng tə har ba kulini alkawal tə Hyel hara ala mburu tsu aɗi ni, kuji ka mburu hara hangkal ta mburu asə ni ta ləkwari.

²Kamnyar mburu ku nggatə labar na msəra ni, tsu apa da. Amma ngəni msəra ni aɗi dlar ɗa wa, kamnyar da aɗi dlu ka hamta jiri wa.

³Kamnyar tar mburu na ku hamta jiri ni an ata wutə ghərəmtaghər ndaga. Kamnyar tsa ku pəla, “Antə ɗəffi ɓza har tə I kahyel abbər, ‘Da aɗi ata ləkwa vəi ghərəmtaghərərna ni cap wa.’ ” Hyel pəla apani, wala tə tsa ku kurtə kuri kəthlərərni təng tsu akwa sakatə tsa nci səla duniya.

⁴Kamnyar tsa ku gari ata vəi laga akwa kakaɗərni ata kəra vir na murfəkur ni abbər, “Akwa vir na murfəkur antə Hyel ghərəmtaghəra akwa shanga kəthlər tə tsa akwa harari.”

⁵Antə tsa jaktə pəla abbər, “Da aɗi ata ləkwa vəi ghərəmtaghərərna ni cap wa.”

⁶Waci mdə ku ngkər labar ngəni msəra ni ata kəra vəi ghərəmtaghər ni, amma mji na baɗitə nggatə labar ni aɗi mzhi ləkwari wa, kamnyar da nggəlar kələngkər aka Hyel. Antə ba kulini saka tsu aɗi kamnyar nggwa ka mji ləkwa.

⁷Antə Hyel ku ɗəmhə vir damwa, “Ashina” ni. Aghəla məvayeri hang, antə Hyel jaktə pəla gari ngəni, apatə mdə jaktə nutə ndərərni nangna ni, abbər, “Ashina, ma giri ku nggatə kurakari, giri aɗiya namtə ɗəffa giri ɓəɓal wa.”

⁸Kamnyar ma Joshuwa an na ɗa ghərəmtaghəra, sakani Hyel aɗi ata jaktə gariyir vir ghərəmtaghər damwa na akwa sisi wa.

⁹Apani ngəni ku ncanta abbər har ba kulini vir ghərəmtaghər na olari akwa sək mjir Hyel.

¹⁰Kamnyar kəlara mdə na ku ləkwa ghərəmtaghər na ar Hyel, tsa ata wutə ghərəmtaghəra akwa kəthlərərni tsu apatə Hyel ghərəmtaghəra akwa arni ni.

¹¹Antə kuji mburu hangkər ka mburu ləkwa ghərəmtaghəra na ndagə ni, ta mburu asə ni ta ləkwari atar nu sur harar mji na kula kələngkər ni.

¹²Kamnyar ndərər Hyel ni ka mpika, ka duna tsuwa. Mnyari ata səma ta kəlara katsakar na ka mnyari suɗa, akwa ntsəvəi har ɗəffa mda, ka ndəkəmta daɓwa mpika ka mambəla, ka daɓwa məngdla ka pərɗa, kamnyar ka tsa nggaɓəla dzamər ɗəffa mda ka shanga mwaɓərni.

¹³Su aɗi akwa duniya ni na amzhi ɗuwardzi ta Hyel wa. Shanga su kəlarkəlarari ata bəbal akəmari. Tsuwa tsa antə shanga mburu ata sə pəla mnya mburu akəmari.

¹⁴Antə təng tə mburu ka Prist na olta shang, watau Yesu na Ɓzər Hyel, na ntamta vəi na amtazi ka mwari akəma Hyel ni, kuji mburu kəsi hamta jirər mburu ni ɓəɓal.

¹⁵Kamnyar mburu aɗi ka prist damwa na ata nggaɓəla ala mburu vəi mtathlakkurər mburu wa, tar tsu tsa tə mdə ku ngkərtə ni akwa kəlara bwa apa mburu, amma wala apani tsa aɗi hara biku wa.

¹⁶Antə mburu antsətədzi, ka mburu mwari akəma dəkəl kuthlikurər Hyel na ka kətadzə ni, ka tsa dlar mburu akwa kəlara sakatə mburu akwa tur dlara.