Read bura-pabir Ibrani 5 Bible Online

Ibrani 5 - bura-pabir bible

Ibrani 5

¹Kamnyar kəlara prist na ola natə mji carɓəla, mdə vəi ni kamnyar ka tsa hara kəthlər ata vəya mji akəma Hyel, ka tsa hamta cautayeri kəga saɗakayeri kamnyar kəcimta bikayeri

²Təng tə tsa ka kərari tsa kətəikətəyari ni, tsa ata səndə laku tə tsa ata mwa ka mji na hara biku kula səndər su, tə mdə pwaktəmta.

³Apani kamnyar tə tsa kətəikətəyari ni, ku ndzi dwali ka tsa hamta saɗaka kamnyar bikərni ka tsuwa kamnyar bikər mji tsuwa.

⁴Tsuwa mda aɗi wala duku na ana ndzi kuthli təng kamnyar abbər tsa akwa bara jili olkur ngəni wa, amma tar ma Hyel an kəga ni, tsu apatə tsa kəga Haruna.

⁵Tsu apani tsuwa aɗi Kristi an haptə səliyir kərari abbər ka tsa ndzi prist na ola wa. Awa, Hyel an carɓəla ni, ka pəla alari, “Ga an Ɓzər na, ashina I ku ndzi Təddar nga.”

⁶Tsuwa tsa ku jaktə pəla akwa vəi damwa abbər, “Ga an prist na har ba saka madi, tsu akwa laku tə Melkizedek ndzi akwa.”

⁷Sakatə Yesu tsu akwa duniya ni, tsa ku hara adduwayeri ka kiɗə suayeri ka tuwa na mwavər ka shimwi. Tsa hara adduwa ni aka Hyel na ka dunar mbantə ni ta mta. Antə Hyel ku nggatə tuwarni kamnyar tsa ana thlivər ɗəffa Hyel.

⁸Wala tə Yesu Ɓzər Hyel ni, tar tə tsa thliptə kələngkər aka su atar bwani tə tsa ɗari ni.

⁹Atar su ngəni antə Hyel namtə ni tə tsa ndzi Prist na Ola na ciɗəɗu, tə tsa ndzi baɗitər mbantədzi na ba saka madi aka shanga mji na ku kələngkər alari.

¹⁰Apani Hyel ku namtə ni prist na olta shang, tsu akwa laku tə Melkizedek ndzi prist ni.

¹¹Suayeri aɗi hang tə kalkal ka yeru pəla ala giri ata kəra su ngəni, amma da su na mwavər tə ka mdə mzhi ngkərɓəlari, təng tə giri amzhi nggaɓəla su mbwaɗi wa.

¹²Kamnyar kulini kalkal ka giri ndzi maləmayeri, amma ba kulini giri tsu akwa tur ka mdə thlipa ala giri su na ntangkəma ata kəra ndərər Hyel. Ata vəya ka giri səm susəma na kəkəsari, giri tsu akwa sa uwa.

¹³Kamnyar kəlara mdə na tsu akwa sa uwa, tsa tsu ɓzəngkyar, tsa asəndə lakur hara su na kalkal wa.

¹⁴Susəm na kəkəsu an kamnyar mji na ol'ola, mji na ata mzhi kəthlər ka anggara ɗa ka ndəkɓəla daɓwa su na ɓɗaku ka su na ɗimi.